Fundainga Mambo A Lesa

Mwakonsha Kuyuka Byepi Mpopwelo ya Kine?

Kino kibaba kyaamba pa mepuzho kampe o mwakiipuzhapo kala kabiji kyamwesha ne po mwakonsha kutana mikumbu mu Baibolo wenu. Bakamonyi ba kwa Yehoba bakatemwa bingi kwisamba nenu pa ino mikumbu.

1. Nanchi kujitu bupopweshi bwa kine bumo nyi?

Yesu wafunjishe baana banji ba bwanga bupopweshi bumotu bwa kine. Buno bupopweshi buji nobe jishinda jaya ku bumi. Yesu waambile pa jino jishinda amba: “Bejitana bachechetu.” (Mateo 7:14) Lesa utambwilatu mpopwelo yaimena pa bukine buji mu Mambo anji. Bapopweshi bakine bonse bakwatankana mu lwitabilo lumo.—Tangai Yoano 4:23, 24; 14:6; Efisesa 4:4, 5.

2. Mambo ka bupopweshi bwavula o bwitelela’mba bena Kilishitu?

Bangauzhi ba bubela batwala mungi bwina Kilishitu kabiji bebwingijisha kumwenamo kajilo. Monka mwaambijile jimo Yesu, bebepekezha kwikala nobe “mikooko” yanji, pano bino byubilo byabo biji nobe misuka ikaji. (Mateo 7:13-15, 21, 23) Buno bwina Kilishitu bwa bubela bwatendekele panyumatu ya lufu lwa baana ba bwanga ba kwa Yesu.—Tangai Byubilo 20:29, 30.

3. Ñanyi bintu bimo byavwangwa mu mpopwelo ya kine?

Bapopweshi bakine banemeka Baibolo amba Mambo a Lesa. Bebikako kwikela monka mwayila mafunde ajimo. Onkao mambo, bupopweshi bwa kine bwapusana na bupopweshi bwaimena pa milanguluko ya bantu. (Mateo 15:7-9) Bapopweshi bakine kechi bafunjisha bintu byo babula kuba ne.—Tangai Yoano 17:17; 2 Timoti 3:16, 17.

Bupopweshi bwa kine bunemeka jizhina ja Lesa, Yehoba. Yesu wayukanyikishe jizhina ja Lesa. Wakwashishe bantu kuyuka Lesa ne kwibafunjisha kulomba amba jizhina ja Lesa jizhile. (Mateo 6:9) Ku mpunzha ko mwikala, ñanyi bupopweshi butundaika bantu kwingijisha jizhina ja Lesa?—Tangai Yoano 17:26; Loma 10:13, 14.

4. Mwakonsha kuyuka byepi bapopweshi bakine?

Bena Kilishitu bakine basapwila Bufumu bwa Lesa. Lesa watumine Yesu kwiya na kusapwila Bufumu. Bufumu bwa Lesa bo bonkatu bukapwisha makatazho a bantu. Yesu watwajijile kwamba pa buno bufumu kufika ne juba jo afwile. (Luka 4:43; 8:1; 23:42, 43) Waambijile baana banji ba bwanga kusapwila Bufumu bwa Lesa. Umvwe muntu wimusolomoka ne kwamba pa Bufumu bwa Lesa, mulanguluka amba uji mu ñanyi bupopweshi?—Tangai Mateo 10:7; 24:14.

Baana ba bwanga ba kwa Yesu kechi ba pano pa ntanda ibi ne. Kechi bevwanga mu bya bumulwila ntanda nangwa mu milukuchi yubiwa mu kimasamasa ne. (Yoano 17:16) Kabiji kechi boba byubilo byatama ne bya bono ne.—Tangai Yakoba 1:27; 4:4.

5. Nga bwina Kilishitu bwakine buyukanyikilwa ku ka?

Bena Kilishitu bakine betemwa abo bene na bene. Mu Mambo a Lesa, bafundamo kunemeka bantu ba mitundu yonse. Nangwa kya kuba bupopweshi bwa bubela butundaika makondo a pakachi ka byalo, bapopweshi bakine abo bakana kuba bino. (Mika 4:1-4) Mu kifulo kya kutundaika makondo, abo bengijisha kimye kyabo ne nsabo yabo kukwashishamo bakwabo.—Tangai Yoano 13:34, 35; 1 Yoano 4:20, 21.

Ñanyi jibumba jifunjisha biji mu Mambo a Lesa, kunemeka jizhina ja Lesa ne kusapwila Bufumu bwa Lesa kuba’mba bo bonkatu bukapwisha makatazho a bantu? Ñanyi jibumba jimwesha butemwe ne kubula kutundaika nkondo? Bishinka bimwesha amba Bakamonyi ba kwa Yehoba.—1 Yoano 3:10-12.

Umvwe mukeba kuyukilako byavula, monai kitango 15 mu uno buku, wanembwa na Bakamonyi ba kwa Yehoba.

[Kipikichala pa peja 17]

Nanchi Baibolo Kine Ufunjisha’mba Ka?

[Kipikichala pa peja 16]

“Bamba patoka amba bamuyuka Lesa, bino bamukana kupichila mu mingilo yabo.”—Titusa 1:16