Lufuunjisho 13

Mwakonsha Kutaana Byepi Bupopweshi Bwakiine?

Nanchi bupopweshi bonse butookesha Lesa pa muchimanyi, inyi bumotu? (1)

Mamboka bupopweshi bwitela’mba twi Benakilishitu kyo bwavujilamo? (2)

Mwakonsha kuyuuka byepi Benakilishitu ba kiine? (3-7)

1. Yesu watendekeletu bupopweshi bwa kiine bumo bwa Benakilishitu. Nanchi ne lelo kwafwainwa kwikalatu jibumba jimotu ja bapopweshi bakiine bakwa Yehoba Lesa. (Yoano 4:23, 24; Efisesa 4:4, 5) Baibolo ifuunjisha kuba’mba bantutu bacheche bo baji mu kajishinda kacheche kaya ku buumi.—Mateo 7:13, 14.

2. Baibolo yaambijile jimo ’mba panyuma ya lufu lwa baana ba bwanga, mafuunjisho abubela ne byubilo byabula bya bwinakilishitu bikatwelelelanga pachepache mu kipwilo kya Bwinakilishitu. Bantu batama bakabongola baitabila kwibalondela mukifulo kya kulondela Kilishitu. (Mateo 7:15, 21-23; Byubilo 20:29, 30) Kyokyo tumwena bupopweshi bwavula bwapusanapusana bwitela’mba Bwinakilishitu. Twafwainwa kuyuuka byepi Benakilishitu bakiine?

3. Kiyukilo kikatampe kya Benakilishitu bakiine ke kyakuba ’mba baji na butemwe mukachi kabo. (Yoano 13:34, 35) Kechi bafuunjishiwa kulanguluka mba bakila bantu bamutundu ungi nangwa ba kikoba kingi ne. Kabiji kechi bafuunjishiwa kushikwa bantu bamu byalo bingi ne. (Byubilo 10:34, 35) Kyokyo babujila kulwila makondo. Benakilishitu bakiine belama umo ne mukwabo nobe balongo ne banyenga.—1 Yoano 4:20, 21.

4. Kiyukilo kikwabo kya bupopweshi bwa kiine ke kya kuba’mba bamembala bakyo baneemeka kya kiine Baibolo. Beitabizha ’mba Mawi a Lesa ne kwitabila byo yamba. (Yoano 17:17; 2 Timoti 3:16, 17) Basunga Mambo a Lesa kwikala akatampe kukila milanguluko ne bisho bya bantu. (Mateo 15:1-3, 7-9) Besekaeseka kuba byamba Baibolo mu buumi bwabo bwa juba ne juba. Kechi bashimikila kintu kimo ne kuba kingi ne.—Titusa 1:15, 16.

5. Bupopweshi bwa kiine bwafwainwa kuneemeka jizhina ja Lesa. (Mateo 6:9) Yesu walengeshe jizhina ja Lesa, Yehoba, kuyukanyikwa ku bakwabo. Benakilishitu ba kiine bafwainwa kuba kintu kimo. (Yoano 17:6, 26; Loma 10:13, 14) Ñanyi bantu kooko komwikala babuulako bakwabo jizhina ja Lesa?

6. Benakilishitu ba kiine bafwainwa kusapwila Bufumu bwa Lesa. Yesu waubile byonkabyo. Kimye kyonse waambanga pa lwa Bufumu. (Luka 8:1) Wakambizhe baana banji ba bwanga kusapwila ano onka mambo awama pantandaponse. (Mateo 24:14; 28:19, 20) Benakilishitu ba kiine baitabila kuba’mba Bufumu bwa Lesa tu bunke bobukaleta mutende ne kusunga bulongo ino ntanda.—Masalamo 146:3-5.

7. Baana babwanga ba kwa Yesu kechi bafwainwa kwikala balubaji lwa kino kyalo kibi ne. (Yoano 17:16) Kechi bevwanga mu byambo bya kyalo nangwa mu mapata abantu ne. Bachiinaa bwikalo buncha, byubilo, ne milanguluko yaseekamo mu ino ntanda. (Yakoba 1:27; 4:4) Mwakonsha kuyuuka kipanyi kya bupopweshi ako komuji kiji na bino biyukilo bya Bwinakilishitu bwa kiine nyi?

[Bipikichala pa peja 27]

Benakilishitu ba kiine betemwa umo ne mukwabo, bakinjika Baibolo, ne kusapwila Bufumu bwa Lesa