Lufunjisho 12

Nanchi Kika Kimweka Pa Lufu?

Lufu lwa pusanako na bumi. Lufu lujitu pamo na kuponena mu tulo. (Yoano 11:11-14) Bafu kechi bakonsha kumvwa, kumona, kwamba, nangwa kulanguluka kintu ne. (Musapwishi 9:5, 9) Bupopweshi bwa bubela bufunjisha kuba’mba bafu baya ku ntanda ya bapashi na kwikala pamo na bashakulu babo. Abyo kechi byo bifunjisha Baibolo ne.

Bafu kechi bakonsha kwitukwasha ne, kabiji kechi bakonsha kwitukozha ne. Kyaseeka bingi ku bantu kuba bisho bya bupopweshi ne kupana milambo, abyo byo betabila kuba’mba bikatokesha bafwa pa muchima. Kino kifichisha Lesa pa muchima mambo kyaimana pa bubela bwa kwa Satana bumo. Kabiji byonkabyo kechi byakonsha kutokesha bafu pa muchima ne, mambo bafwa. Kechi twafwainwa kuchina nangwa kupopwela bafu ne. Twafwainwa kupopwela Lesa bunke.—Mateo 4:10.

Bafu bakekala bomi jibiji. Lesa ukabushisha bafu ku bumi mu paladisa pano pa ntanda. Kino kikamweka mu kimye kya kulutwe. (Yoano 5:28, 29; Byubilo bya Batumwa 24:15) Lesa wakonsha kubusha bafu byonka byo mwakonsha kubusha muntu uji mu tulo.—Mako 5:22, 23, 41, 42.

Lufunjisho lwa kuba’mba kechi tufwane bo bubela Satana Diabola boakumbanya. Satana ne bapashi banji babipa balengela bantu kulanguluka kuba’mba mipashi ya bafu yumi kabiji yoileta bikola ne makatazho a kwabo. Kimye kimo Satana ujimbaika bantu kupichila mu biloto ne bimwesho. Yehoba uzhachisha bonse besamba na bafu.—Mpitulukilo ya mu mizhilo 18:10-12.