Ñanyi Kintu Kimweka Inge Twafwa?

Nanchi mwakifwishapo kala mulongo wenu nangwa mulunda nenu nyi? Inge muntu wafwa, mwakonsha kutendeka kwiipuzha’mba: ‘Ñanyi kintu kimweka inge twafwa? Abya kine balongo betu nangwa balunda netu bafwa tukebamonapo jibiji nyi?’ Mu uno mutwe ne walondelapo, musakwimwena mikumbu iji mu Baibolo byo itutekenesha.

1. Ñanyi kintu kimweka inge twafwa?

Yesu waesakenye lufu ku kulaala tulo. Muntu walaala kechi uyuka bintu bibena kumweka ne. Pano lufu lwipasha byepi na kulaala tulo? Inge muntu wafwa, kechi umvwa misongo ne. Kechi umvwa mukose nangwa kya kuba watemenwe bingi balunda nanji ne kisemi kyanji ne. Baibolo waamba’mba: “Bantu bafwa kafwako kintu nangwa kimo kyo bayuka ne.”​—Tangai Musapwishi 9:5.

2. Mambo ka o kyawamina kuyuka bishinka pa kimweka inge muntu wafwa?

Bantu bavula bachina kufwa ne kuchinatu bantu bafwa. Pakuba byaamba Baibolo byafwainwa kwimutekenesha bingi pa kimweka inge muntu wafwa. Yesu waambile’mba: “Bukine bukemukasulula.” (Yoano 8:32) Bupopweshi bumo bufunjisha bantu amba kuji kintu kimo kilupuka mu muntu inge wafwa, abino kechi byo byaamba Baibolo ne. Kishinka ke kya kuba’mba kafwako muntu nangwa umo umanama inge wafwa ne. Byo kiji kuba’mba bantu bafwa kafwako kintu nangwa kimo kyo bayuka ne, ko kuba’mba kechi bafwainwa kwitukozha ne. Onkao mambo, kechi twafwainwa kupopwelanga bantu bafwa nangwa kuba bintu na mulanguluko wa kuba’mba babule kwituzhingijila ne.

Bantu bamo bamba’mba bakonsha kwisamba na bantu bafwa. Kwambatu kine, kafwako wakonsha kwisamba na muntu wafwa ne. Byonkatu byo twafunda, bantu bafwa “kafwako kintu nangwa kimo kyo bayuka ne.” Bonse bamba’mba besamba na balongo babo bafwa besamba na bandemona befwanyikizha kwikala bantu bafwa. Onkao mambo, kuyuka bukine pa kimweka inge muntu wafwa kwituzhikijila ku bandemona. Yehoba witukanya kwisulwa kwisamba na bantu bafwa, mambo wayuka’mba kwisamba na bandemona kwatama bingi.​—Tangai Mpitulukilo ya mu Mizhilo 18:10-12.

3. Yukai bishinka pa bikala inge muntu wafwa

Bantu bavula mwaya ntanda bamba bintu byapusana pusana bingi pa kimweka inge twafwa. Kabiji kechi bintu byonse byaitabilamo bantu bya kine ne.

• Ñanyi bintu byaitabilamo bantu mu mpunzha mo mwikala pa kimweka inge muntu wafwa?

VIDYO: Kikala Byepi Inge Muntu Wafwa? (1:19)

Tangai Musapwishi 3:20, ne kwisamba ano mepuzho:

• Kwesakana na kino kyepelo, ñanyi kintu kimweka inge muntu wafwa?

• Nanchi kino kyepelo kyaamba’mba inge muntu wafwa, mweo wanji nangwa mupashi uya ku mpunzha kukwabo ne kutwajijila kwikala mumi nyi?

Baibolo witubuula kyamwekele kimye kyafwile Lazalasa mulunda wa kwa Yesu. Byo musakutanganga Yoano 11:11-14, monai byaambile Yesu pa byajinga Lazalasa byo afwile. Kepo mwisambe ano mepuzho:

• Yesu waesakenye lufu ku ñanyi kintu?

• Kintu kyaesakenyeko Yesu ku lufu kitubuulapo ka pa bikala muntu inge wafwa?

• Mwalanguluka’mba byaamba Baibolo pa bikala muntu inge wafwa bya kine nyi?

4. Kuyuka bukine pa kimweka inge muntu wafwa kwitukwasha bingi

Inge twayuka bukine pa byo kikala inge muntu wafwa, kwitukwasha kubula kuchina muntu wafwa. Tangai Musapwishi 9:10, ne kwisamba buno bwipuzho:

• Nanchi bantu bafwa bakonsha kwitukatazha nyi?

Inge twayuka bukine buji mu Baibolo kuketuzhikijila ku bintu bya bubela bya kuba’mba twafwainwa kupopwelanga bantu bafwa. Tangai Isaya 8:19 ne Lumwekesho 4:11, ne kwisamba buno bwipuzho:

• Nanchi Yehoba umvwa byepi ku muchima kumona bantu na kupopwela nangwa kulomba bukwasho ku muntu wafwa?

5. Kuyuka bukine pa kimweka inge muntu wafwa kwitutekenesha bingi

Bantu bavula bebafunjisha’mba inge bafwa, bakebakambula na mambo a bintu byatama byo baubile kala. Pakuba atweba kitutekenesha bingi, mambo twayuka’mba inge muntu wafwa kechi uyanda nangwa kya kuba waubilenga bintu byatama ne. Tangai Loma 6:7, ne kwisamba buno bwipuzho:

• Kinembelo kyo twatanga kyaamba’mba muntu wafwa bamukasulula ku mambo o alengele. Pano mwalanguluka’mba muntu wafwa ubena kuyanda na mambo a bintu byatama byo aubile kala nyi?

Inge twamuyuka bulongo Yehoba, tukashiinwa’mba kechi umanyika bantu bafwa ne. Tangai Mpitulukilo ya mu Mizhilo 32:4 ne 1 Yoano 4:8, ne kwisamba ano mepuzho:

• Nanchi Lesa ye baambapo mu bino byepelo uji na bino byubilo, wakonsha kumanyika bantu bafwa nyi?

• Mwaswa’mba kuyuka bukine pa bikala muntu inge wafwa kutekenesha nyi? Mambo ka o mwakumbwila byobyo?

ÑANYI BISHINKA BYO MWAFUNDA?

Inge muntu wafwa, kafwako kintu nangwa kimo kyo ayuka ne. Bantu bafwa kechi bayanda kabiji kechi bakonsha kukatazha bantu bomi ne.

Mepuzho a kupitulukamo

• Ñanyi kintu kimweka inge twafwa?

• Nanchi kuyuka bukine pa bikala muntu inge wafwa kwitukwasha byepi?

• Kuyuka bukine pa bikala muntu inge wafwa kwitutekenesha byepi?

KEBAI BISHINKA BIKWABO

Monai kyambo kya “mweo”byo bekilumbulula mu Baibolo.

“Nanchi Mweo ye mu ka?” (Kibaaba kiji pa jw.org)

Kebai bishinka inge kine Lesa umanyika bantu batama mu mujilo wa helo.

Nanchi Helo Mpunzha ya Kine kwa Kumanyikila Bantu Nyi? (3:07)

Nanchi twafwainwa kuchina bantu bafwa nyi?

Mipashi ya Bantu Bafwa—Yakonsha Kwimukwasha nyi, Inyi Yakonsha Kwimukatazha? Nanchi Koiji Nyi? (buloshuwa)

Tangai bintu byatekeneshe mwanamulume umo byo ayukile bukine pa bimweka inge twafwa.

“Nasangalele pa Kutaana Mikumbu mu Baibolo” (Kyamba kya Usopa, February 1, 2015)