Lufunjisho 6

Nanchi Bafwa Bakasangulwa Nyi?

1. Ki ka kikobiwa ku bafwa?

Maliya ne mata babena kutambwila Lazalasa byo bamusangwile

Yesu byo afikile ku Betani kwipi na Yelusalema, mulunda nanji Lazalasa saka afwa kala papita ne moba ana. Yesu wayile ku kilende pamo ne Mata ne Maliya, banyenga ya kwa mulobe. Papichiletu kimye kicheche, jibumba ja bantu jakonkene. Nanchi mwakonsha kufwanyikizha lusekelo lwajinga na Mata ne Maliya, Yesu byo asangwile Lazalasa nyi?—Tangai Yoano 11:21-24, 38-44.

Mata wayukile mambo awama byo aamba pa bafwa. Wayukile kuba’mba kulutwe na lwendo Yehoba ukasangula bafwa kabiji bakekala jibiji na bumi pano pa ntanda.—Tangai Yoba 14:14, 15.

2. Kikala byepi inge muntu wafwa?

Adam’s creation, and later his death — Lesa waambijile Adama amba: “Obewa wi lukungu, ne ku lukungu ko ukabwela.”—NTENDEKELO 3:19.

Bantu bafumine ku lukungu. (Ntendekelo 2:7; 3:19) Kechi twi mipashi iji na mibiji ya bumuntu ne. Twi bilengwa byabumbilwe na lukungu lwa panshi, onkao mambo kafwako kishala na bumi mwi atweba inge twafwa ne. Inge twafwa, bongo bwetu buleka kwingila, ne milanguluko yetu nayo yonaika. O ene mambo Lazalasa kechi waambilepo byo kyajinga kimye kyo afwile ne, mambo bafu kafwako kyo bayuka ne.—Tangai Salamo 146:4; Musapwishi 9:5, 6, 10.

Nanchi Lesa umanyika bantu mu mujilo inge bafwa nyi? Baibolo byo yaamba kuba’mba bafu kafwako kyo bayuka ne, lufunjisho lwa kuba’mba Lesa umanyika bantu mu mujilo lwa bubela. Kuno ke kubepela Lesa. Mulanguluko wa kumanyika bantu mu mujilo ke wa bunya kwi aye.—Tangai Yelemiya 7:31.

3. Nanchi twakonsha kwisamba na bafu nyi?

Bafu kechi bamba nangwa kumvwa ne. (Salamo 115:17) Bamalaika batama bakonsha kwamba ne kulengela bantu kumona nobe muntu wafwa ye ubena kwamba. (2 Petelo 2:4) Yehoba wakanya kwisamba na bafu.—Tangai Mpitulukilo ya mu mizhilo 18:10, 11.

4. Bañanyi bakasangulwa?

Muntu wasangulwa babena kumufunisha pe Lesa mu Paladisa. Naye watendeka kufunjisha bakwabo basangulwa.

Bafwa bavula baji mu bilende bakasangulwa ne kwikala pano pa ntanda. Nangwatu bantu baubanga byatama na mambo a kubula kuyuka Lesa, nabo bakasangulwa.—Tangai Luka 23:43; Byubilo 24:15.

Bantu bakasangulwa bakafunda bukine pe Lesa ne kwitabila mwi Yesu kupichila mu kumumvwina. (Lumwekesho 20:11-13) Aba bakasangulwa ne kuba byawama bakekala na bumi bwa myaka ne myaka pano pa ntanda.—Tangai Yoano 5:28, 29.

5. Lusanguko lwitubulapo ka pe Yehoba?

Lesa wanengezhe kuba’mba lusanguko lwikaleko byo atumine Mwananji kwiya na kwitufwila. Onkao mambo, lusanguko ke jishinda Yehoba jo amwesheshamo butemwe ne lusa lwanji lukatampe. Umvwe bafwa basangulwa, bañanyi bo mukakebesha kumona?—Tangai Yoano 3:16; Loma 6:23.

Umvwe mukeba kuyukilapo byavula, monai bitango 6, 7 ne 10 mu buku wa Nanchi Baibolo Kine Ufunjisha’mba Ka?