Fundainga Mambo A Lesa

Nanchi Mwaketekela Amba Bafu Bakasangulwa Nyi?

Kino kibaba kyaamba pa mepuzho kampe o mwakiipuzhapo kala kabiji kyamwesha ne po mwakonsha kutana mikumbu mu Baibolo wenu. Bakamonyi ba kwa Yehoba bakatemwa bingi kwisamba nenu pa ino mikumbu.

1. Ki ka kikobiwa ku bafu?

Yesu byo afikile ku Betani kwipi na Yelusalema, mulunda nanji Lazalasa saka afwa kala papita ne moba ana. Yesu wayile ku kilende pamo ne Mata ne Maliya, banyenga ya kwa mulobe. Papichiletu kimye kicheche, jibumba ja bantu jakonkene. Nanchi mwakonsha kufwanyikizha lusekelo lwajinga na Mata ne Maliya, Yesu byo asangwile Lazalasa nyi?—Tangai Yoano 11:20-24, 38-44.

Mata waitabijile amba bafu bakasangulwa. Ne bakalume ba Yehoba bakishinka nabo bayuka amba kulutwe Lesa ukasangula bafu kabiji bakekalanga jikwabo pano pa ntanda.—Tangai Yoba 14:14, 15.

2. Kikala byepi inge muntu wafwa?

Nangwa kya kuba bulume bwa bumi nangwa’mba “muya” ulengela bantu ne banyama kwikala bomi, kechi twi muya nangwa amba mipashi ikalatu mu mibiji ne. (Musapwishi 3:19; Ntendekelo 7:21, 22) Twi bilengwa byabumbilwe na lukungu lwa panshi. (Ntendekelo 2:7; 3:19) Umvwe bongo bwetu bwaleka kwingila, ne milanguluko yetu nayo yonaika. O ene mambo Lazalasa byo bamusangwile, kechi waambilepo byo kyajinga kimye kyo afwile ne, mambo bafu kafwako kyo bayuka ne.—Tangai Salamo 146:4; Musapwishi 9:5, 10.

Kyamwekatu patoka amba bafu kechi bayanda ne. Onkao mambo, lufunjisho lwa kuba’mba Lesa umanyika bantu inge bafwa lwabubela. Kuno ke kubepela Lesa. Mulanguluko wa kumanyika bantu mu mujilo ke wa bunya kwi aye.—Tangai Yelemiya 7:31.

3. Abya twakonsha kwisamba na bafu nyi?

Bafu kechi bamba ne. (Salamo 115:17) Pano bamalaika batama inge baamba na bantu, bakonsha kujimbaika bantu kumona amba muntu wafwa ye ubena kwamba. (2 Petelo 2:4) Yehoba wakanya kweseka kwisamba na bafu.—Tangai Mpitulukilo ya mu mizhilo 18:10, 11.

4. Bañanyi bakasangulwa?

Mu ntanda ipya ibena kwiya, bafu bavula baji mu bilende bakasangulwa. Nangwatu bantu bamo baubanga byatama na mambo a kubula kuyuka kyaswa muchima wa Yehoba, nabo bakasangulwa.—Tangai Luka 23:43; Byubilo 24:15.

Bantu bakasangulwa bakafunda bukine pe Lesa ne kwitabila mwi Yesu kupichila mu kumumvwina. (Lumwekesho 20:11-13) Aba bakasangulwa ne kuba byawama bakekala na bumi bwa myaka ne myaka pano pa ntanda. Nangwa byonkabyo, bamo bakasangulwa bakatwajijila na kuba byatama. Lusanguko lwabo lukaluka ke “lusanguko lwa kije.”—Tangai Yoano 5:28, 29.

5. Lusanguko lwitubulapo ka pe Yehoba?

Lusanguko lukekalako mambo Lesa watumine Mwananji kwiya na kwitufwila. Jino ke jishinda Yehoba jo amwesheshamo butemwe ne lusa lwanji lukatampe.—Tangai Yoano 3:16; Loma 6:23.

Umvwe mukeba kuyukilako byavula, monai bitango 6 ne 7 bya uno buku, wanembwa na Bakamonyi ba kwa Yehoba.

[Kipikichala pa peja 26]

Adama wabumbilwe na lukungu lwa panshi