Kitango 34
Ki Ka Kyubiwa Inge Twafwa?
WAFWAINWA wayuka kuba’mba bantu ano moba bakota, kubela, ne kufwa. Nangwatu banyike nabo bafwa. Nanchi wafwainwa kuchina lufu nangwa muntu wafwa nyi?— Nanchi wayuka kyubiwa umvwe twafwa nyi?—
Ano moba kafwako muntu wakifwilepo bino apa wabwela wasanguka, wakonsha kwitubula byo kikala ne. Bino Yesu, Mufunjishi Wayukisha byo ajinga panopantanda kwajingapo muntu umo. Twakonsha kufunjilako ku uno muntu kyubiwa ku bantu umvwe bafwa. Uno muntu wajinga mulunda nanji Yesu kabiji waikalanga mu Betani, muzhi wajingatu pepi na Yelusalema. Jizhina janji wajinga Lazalasa, kabiji wajinga na banyenga yanji babiji, ba Mata ne Maliya. Akitwaya tumone byaamba Baibolo pa kyaubiwe.
Juba jimo Lazalasa wabelele bingi. Bino Yesu wakajinga kwalepa bingi. Onkao mambo, ba Mata ne Maliya batumine muluwe kwi Yesu amba Lazalasa kolojabo wabela bingi. Baubile bino mambo bayukile amba Yesu wakonsha kumubuka. Nangwa byonkabyo, Yesu kechi wajinga dokotala ne, bino wajinga na bulume bwamupele Lesa bwa kubuka bikola byonse.—Mateo 15:30, 31.
Yesu saka akyangye kwiya na kumumona ne, Lazalasa wabelele bingi kabiji ne kufwa wafwile. Bino Yesu waambijile baana banji ba bwanga amba Lazalasa walaala tulo, kabiji amba usakuya na kumubusha. Baana ba bwanga kechi bakwatankenye byaambile Yesu ne. Yesu wabwelele wibabula mu jishinda japela kumvwa’mba: “Lazalasa wafwa.” Kino kimwesha amba lufu luji nobe ka?— Ee, lufu luji nobe tulo twine. Ke tulo twine kya kuba muntu kechi wakonsha nangwa kulota ne.
Yesu waile kwi Mata ne Maliya. Kabiji kwajinga balunda nabo bavula. Baishile na kwibatekenesha mambo kolojabo wafwile. Mata byo aumvwine amba Yesu ubena kwiya, waile na kumutundaila. Maliya naye walupukile na kumona Yesu. Wajinga bingi na bulanda ne kujila wajijilenga, kabiji waponejile ku maulu a kwa Yesu. Balunda nanji Maliya nabo bamulondejilenga saka bajila.
Mufunjishi Wayukisha waipwizhe ko bamubikile Lazalasa. Bantu bamutwajile Yesu ku kilende ko bamuzhikile Lazalasa. Yesu byo amwene bantu bonse kasa bajila, naye watendekele kujila. Wayukile byo kikola ku muchima umvwe wafwisha mutemwe obe.
Ku kilende bazhikileko jibwe, onkao mambo Yesu waambile’mba: “Fumyaiko jibwe.” Abya baubile bino nyi?— Mata walangulukile’mba kechi kyawama kuba bino ne. Waambile’mba: “Nkambo, pano kanunke; mambo wafwile pano ke moba ana.”
Bino Yesu wamwambijile’mba: ‘Amiwa kechi najikwimwambila namba, umvwe mwitabile, musakumona lukumo lwa Lesa, amu?’ Yesu waambile’mba Mata usa kumona kintu kyakonsha kumuletela Lesa lukumo. Nga Yesu waubilepo ka? Byo bafumisheko jibwe, Yesu walombele kwi Yehoba. Kepo abijikile na jiwi jikatampe amba: “Lazalasa, lupukaimo.” Abya walupukilemo nyi?—
Nga obewa, nanchi wakonsha kubusha muntu walaala nyi?— Ee, umvwe wabijika na jiwi jikatampe wakonsha kubuka. Abya wakonsha kubusha muntu walaala tulo twa lufu nyi?— Ine. Nangwa ubijikepotu na jiwi jikatampe byepi, muntu wafwa kechi wakonsha kubuka ne. Obewa ne amiwa nangwatu muntu uji yense kafwako kyo twakonsha kuba ne.
Bino Yesu aye wapusanako bingi. Uji na bulume bwamupele Lesa. Onkao mambo, byo aichile Lazalasa, kwaubiwe kintu kya kukumya. Muntu wafwile pa moba ana walupukilemo mu kilende! Waikele jibiji na bumi! Watendekele kupema, kwenda, ne kwamba. Ee, Yesu wamusangwile Lazalasa mu bafu.—Yoano 11:1-44.
Pano akilangulukapo pa kino: Ki ka kyaubiwe kwi Lazalasa byo afwile? Nanchi kwajingapo kintu kimo kyafumine mu mubiji wanji ne kuya na kwikala ku mpunzha ikwabo nyi? Nanchi mweo wa kwa Lazalasa waile kwiulu nyi? Abya wajinga mumi pa moba ana kwiulu na Lesa ne na bamalaika nyi?—
Ine. Akivuluka byaambile Yesu. Waambile’mba Lazalasa walaala. Kikala byepi umvwe walaala? Umvwe uji mu tulo twine, kechi wakonsha kuyuka bibena kubiwa ne, ke ibyo nenyi?— Nangwatu umvwe wabuka, kechi wakonsha kuyuka maawala o walaala ne, kanatu watala pa nkoloko.
Byo byo kiji ne ku bafu. Kafwako kyo bayuka ne. Kafwako kyo bomvwa ne. Kabiji kafwako kyo bakonsha kuba ne. Byo byo kyajinga ne kwi Lazalasa. Lufu lujitu nobe tulo twine kya kuba muntu kafwako kyo akonsha kuvuluka ne. Baibolo washimuna’mba: “Bafu kafwako kyo bayuka ne.”—Musapwishi 9:5, 10.
Kabiji akilangulukapo ne pa kino: Umvwe Lazalasa wajinga mwiulu pa oa moba ana, nanchi kechi umvwe washimikizhengapo nenyi?— Kabiji inge wajinga mwiulu, nanchi Yesu umvwe wamufumishemo ne kumubwezha panopantanda nyi?— Ine, kwalepeshatu!
Pano bino, bantu bavula bamba’mba tuji na mweo, kabiji amba mweo utwajijila kwikala mumi panyuma ya lufu. Bamba’mba mweo wa kwa Lazalasa wajinga mumi ku mpunzha imo. Bino Baibolo kechi byo byo aamba ne. Waamba’mba Adama muntu mutanshi kulengwa kwi Lesa wajinga “mweo.” Kabiji Baibolo waamba’mba Adama byo alengele mambo, wafwile. Mweo wanji wafwile. Waikele ‘ke mufu,’ kabiji wabwelele ku mushiji ko bamufumishe. Baibolo waamba’mba baana ba kwa Adama baswaine bundengamambo ne lufu.—Ntendekelo 2:7; 3:17-19; Kubala 6:6; Loma 5:12.
Ee, kino kibena kumweshatu patoka’mba mweo kechi kintu kiikela mu mubiji ne. Atweba bonse twi mweo. Bantu byo baswana bundengamambo kufuma kwi Adama, Baibolo waamba’mba: ‘Awa mweo ulenga mambo ye ukafwa.’—Ezikyo 18:4.
Bantu bamo bachina bingi bafu. Bakana ne kuya ku bilende amba myeo ya bafu yakonsha kwibakozha. Nanchi muntu wafwa wakonsha kukozha muntu uji na bumi nyi?— Ine.
Kabiji bantu bamo balanguluka’mba bafu bakonsha kubwela jibiji mu mipashi na kumona aba bakiji bomi. Onkao mambo bebashilapo ne kajo kuba’mba beye baje. Pano bino bantu boba bino bintu kechi bayuka byaamba Lesa pa mambo a bantu bafwa ne. Umvwe twaitabila byaamba Lesa, kechi tukachinanga bafu ne. Kabiji umvwe tumusanchila Lesa pa kwitupa bumi, tukamweshanga kino kupichila mu kuba bintu byo aamba.
Bino wakonsha kushikisha’mba: Nanchi Lesa ukasangula banyike bafwa nyi? Abya kine ukoba kino nyi? Twaya twisambe pa kino.
Akitwaya tutange mu Baibolo tumvwe byo aamba pa kyubiwa umvwe muntu wafwa pa Salamo 115:17; 146:3, 4; ne Yelemiya 2:34.
[Kipikichala pa jipa 179]
Yesu wamuba byepi Lazalasa?
[Kipikichala pa jipa 180]
Lazalasa wajinga byepi kimye kyo afwile?
[Kipikichala pa jipa 181]
Mambo ka o twafwainwa kubujila kuchina bafu?