MEPUZHO AFUMA KU BATANGA

Mambo ka Yesu o ajijile ne mipolo saka akyangye kusangula Lazalasa byonka byo kyalumbululwa mu Yoano 11:35?

▪ Mwayilatu kisemwa tujila ne mipolo inge muntu ye twatemwa wafwa. Nangwa kya kuba wamutemenwe bingi Lazalasa, Yesu kechi wajijile na mambo a kuba’mba Lazalasa wafwile ne. Byambo byanembele Yoano bimwesha kuba’mba wajijile mambo waumvwijile lusa balongo ne balunda nanji Lazalasa.—Yoa. 11:36.

Yesu kechi wayile na kumona Lazalasa byo aumvwinetu amba wakolwa kuba’mba akamubuke ne. Kinembelo kyaamba’mba: “[Yesu] byo aumvwine amba [Lazalasa] wakolwa, waikajile konka ko ajinga moba abiji.” (Yoa. 11:6) Mambo ka Yesu o abujile kuyako bukiji? Paji kyamulengejile kubula kuba bino. Waambile’mba: “Kino kikola kechi kya lufu ne, bino kyo kya lukumo lwa Lesa, kuba amba Mwana Lesa atumbijikilwemo.” (Yoa. 11:4) Onkao mambo, Yesu wakebelenga kupa ‘Lesa lukumo’ kupichila mu lufu lwa kwa Lazalasa. Mu ñanyi jishinda? Yesu wayukile’mba usakuba kya kukumya byo asakusangula mulunda nanji mu kilende.

Byo esambilenga na baana banji ba bwanga, Yesu waesakenye lufu ku tulo. O ene mambo o abuujile baana banji ba bwanga amba, “mbena kuya na kumubusha.” (Yoa. 11:11) Kwi Yesu, kusangula Lazalasa kwajingatu nobe nsemi ubena kubusha mwananji walaala. Onkao mambo, lwine lufu lwa kwa Lazalasa kechi lwakonsheshe kumukola ku muchima ne.

Pano ki ka kyamulengejile kujila ne mipolo? Binembelo byakumbula buno bwipuzho. Yesu byo amwene Maliya nyenga ya kwa Lazalasa ne bakwabo saka bajila, “waumvwine bingi bulanda kabiji kyamukolele bingi ku muchima.” Kumona byo bajijilenga kwalengejile Yesu ‘kumvwa bulanda.’ Kyo kyamulengejile ‘wajila ne mipolo.’ Yesu waumvwine bingi bulanda byo amwene balunda nanji na kuyanda.—Yoa. 11:33, 35.

Kino kyamwekele kimwesha kuba’mba Yesu uji na bulume bwa kusangula bafwa kabiji bakekala na bumi jibiji ne butuntulu bwa mubiji bwalumbuluka mu ntanda ipya. Kabiji kimwesha ne kuba’mba Yesu umvwa bingi lusa pa kumona bulanda bwa bantu babena kujila umvwe muntu ye batemwa wafwa na mambo a lufu lwaletele Adama. Kishinka kikwabo kyo tufunjilako ke kya kuba’mba twafwainwa kumvwinanga lusa babena kujila mulongo wabo wafwa.

Yesu wayukile kuba’mba usakumusangula Lazalasa. Nangwa byonkabyo, wajijile ne mipolo mambo waumvwijile lusa balunda nanji. Ne atweba lusa lwakonsha kwitulengela ‘kujila pamo na boba bajila.’ (Loma 12:15) Kujila kechi kumwesha kubula lwitabilo mu lusanguko ne. Yesu witushijile kya kumwenako kya kumwesha lusa lwa kine kupichila mu kujila ne mipolo nangwa kya kuba wayukile’mba usakusangula Lazalasa.