Kutundaika Bantu ne Kwibakosesha

NANGWA kya kuba bakalume ba Lesa babena kupita mu makatazho, bafwainwa kutana lutundaiko mu kipwilo kya bwina Kilishitu. Pa kuba’mba batundaikwe, kikatakata bakulumpe mu kipwilo bafwainwa kumona’mba majashi ne mafunde o bamba abena kutundaika bantu. Bakulumpe mu kipwilo bafwainwa kwikala “kya kuleyelamo mwela, kabiji nobe kya kufyamamo pa kwiya kinkunkwila, kabiji nobe tukola tuji na mema mu ntanda yauma, kabiji nobe kimfute kya jibwe jikatampe, jiji mu kiselebwa.”—Isa. 32:2.

Umvwe mwi mukulumpe mu kipwilo, nanchi majashi enu akwasha ne kutekenesha bantu nyi? Nanchi akosesha aba babena kwibikako kwingijila Yehoba mu bukishinka nyi? Nanchi apana bulume bwa kukosako na kuba kyaswa muchima wa Lesa nangwa kya kuba bantu bauba milengulwila kabiji ne kukana byo twibasapwila nyi? Ibyepi inge kya kuba bamo mu luonde baji na binyenge, babena kuyanda na mambo a kubula mali nangwa baji mu misongo ibula kubukwa? Mwakonsha ‘kukosesha balongo benu na byambo bya pa kanwa kenu.’—Yoba 16:5.

Kimye kyo mubena kwamba jashi, kyo kimye kyo mwafwainwa kukwashishamo balongo benu kwikala na luketekelo ne bulume mwi Yehoba ne mu lunengezho lo anengezha.—Loma 15:13; Efi. 6:10.

Bavululaimo Bintu Yehoba byo Auba. Jishinda jawama kukwashishamo bantu kwikala bakosa ke kupichila mu kumwesha Yehoba byo akwashanga bantu kala mu bimye bya malwa.—Loma 15:4.

Yehoba wabujile Mosesa “kumukosesha muchima” Yoshua bena Isalela saka bakyangye kutwela mu Ntanda ya Mulaye, ayo pa kyokya kimye mwakijinga balwanyi babo. Nga Mosesa waubile byepi kino? Mosesa wavulwileko bena Isalela bonse ne Yoshua mwine saka aji ponka bintu Yehoba byo ebobijile kimye kyo bafumine mu Ijipita. (Mpitu. 3:28; 7:18) Kabiji Mosesa waambile ne pe Yehoba byo ebakwashishe kushinda bena Amoli. Kepo Mosesa akambizhe Yoshua amba: “Kosa ne kuchinchika.” (Mpitu. 31:1-8) Umvwe mubena kukeba kukosesha balongo benu, nanchi mwibakwasha kupichila mu kwibavululako bintu Yehoba byo ebobila kala nyi?

Kimye kimo bantu banemenwa bingi na makatazho o bajimo kya kuba kebalanguluke ne kuba’mba kana bakamonapo bintu byawama bya Bufumu nyi, nangwa ne. Bavululaiko kuba’mba bintu Yehoba byo alaya ukebifikizha.—Yosh. 23:14.

Mu byalo bimo balongo betu bebakanya ku kafulumende kusapwila mambo awama. Mu bimye bya uno mutundu, bakulumpe mu kipwilo babutemwe bakonsha kukwasha bakwabo ba mu lwitabilo kukosa kupichila mu kwibabula byapichilemo batumwa ba kwa Yesu Kilishitu. (Byu. 4:1–5:42) Kabiji kwibavululako Lesa byo aendeshe bintu kwesakana na byo banemba mu buku wa Eshita, kwakonsha kwibakwasha bingi kukosa.

Kimye kimo bantu bamo beyatu na kutanwa ku kupwila kwa kipwilo bino kechi bakomenako ku mupashi ne. Bakonsha kulanguluka’mba Lesa kechi ukebalekelako mambo ne, na mambo a byubilo byatama byo baubanga mu bwikalo bwabo. Kampe mwakonsha kwisamba nabo pe Yehoba byo aubile na Mfumu Manase. (2 Moba. 33:1-16) Nangwa mwakonsha kwamba pa bantu bajinga mu Kolinda bapimpwile bwikalo bwabo ne kwikala ke bena Kilishitu kabiji ne kwibabingisha kwi Lesa.—1 Ko. 6:9-11.

Nanchi bamo babena kulanguluka’mba makatazho o babena kupitamo abena kumwesha’mba Lesa wafumyapo bibusa byanji pe abo nyi? Mwakonsha kwibavululamo byapichilemo Yoba kabiji ne byo bamubijile bibusa pakatampe na mambo a kulama bulumbuluke bwanji kwi Yehoba. (Yoba 1:1-22; 10:1; 42:12, 13; Sala. 34:19) Balunda nanji Yoba bamulangulukijilenga’mba kuji mambo amo o alengele amulengejile kuyanda. (Yoba 4:7, 8; 8:5, 6) Bino ba Paulo ne Banabasa byo bakoseshenga baana ba bwanga ne ‘kwibafunjisha kukelwa mu lwitabilo,’ baambile’mba: “Mu bya malwa byavula mo mo tutwelela mu bufumu bwa Lesa.” (Byu. 14:21, 22) Byonkabyo, ne anweba mwakonsha kukosesha babena kupita mu bya malwa kupichila mu kwibabula’mba kuchinchika mu bimye bya malwa ko kukebewa ku bena Kilishitu bonse kabiji kwanema bingi ku meso a Lesa.—Mana. 27:11; Mat. 24:13; Loma 5:3, 4; 2 Timo. 3:12.

Koseshai banteleki benu kulanguluka pa mashinda Yehoba o afikizhizhamo milaye yanji mu bwikalo bwabo. Kupichila mu kwibavululako bintu bimo, bakonsha kumona Yehoba byo ebakwasha, byonkatu byo alaya. Mu Salamo 32:8, tutangamo amba: ‘Amiwa nkakubula ne kukufunjisha jishinda jo ukayamo; nkakubulanga maana ne jiso jami saka jikutala.’ Kupichila mu kukwasha banteleki benu kuvuluka Yehoba byo ebatangijila nangwa kwibakosesha, mukebalengela kwimwena bene amba Yehoba wibata muchima kabiji ne kuba’mba ukebakwasha mu makatazho onse o babena kupitamo pa kino kimye.—Isa. 41:10, 13; 1 Pe. 5:7.

Mweshai Lusekelo mu Bintu Lesa byo Abena Kuba Lelo Jino. Pa kutundaika balongo benu, tongolai bintu Yehoba byo abena kuba lelo jino. Umvwe kemwambe pa byobyo bintu kumwesha’mba ne anweba mwamwenamo lusekelo, mukakwasha banteleki benu nabo kumwenamo lusekelo.

Ambai pe Yehoba byo etukwasha kuchinchika makatazho a mu bwikalo. Witumwesha jishinda jawama jo twafwainwa kwikelamo. (Isa. 30:21) Walumbulula ene mambo o kwaikela bumbanzhi, nshinji, buyanji, bikola, lufu kabiji ne kwitubula byo akafumyapo bino bintu byonse. Witupa balongo betutemwa. Witupa kya bupe kikatampe bingi kya kwisamba nanji mu lulombelo. Witupa jishuko ja kwikala Batumonyi banji. Watwajijila na kwitumwesha kuba’mba Kilishitu wamwikazha kala pa bufumu mwiulu kabiji ne kuba’mba moba a kupelako a buno bwikalo bukote katatakatu apwe.—Lum. 12:1-12.

Kununga pa bino bintu byawama, kuji ne kubuñana kwa mwanzo kabiji ne kushonkena kwa nkambi. Umvwe kemwambe na lusanchilo pa bino bintu ne pa lunengezho lwawama lo banengezha, mukakosesha bakwenu kubula kuleka kupwila pamo na balongo babo.—Hebe. 10:23-25.

Masawakya amwesha bibusa bya Yehoba pa mwingilo wetu wa mu bujimi, nao akonsha kukosesha bingi bakwetu. Ba Paulo ne Banabasa byo bajinga pa lwendo lwa kuya ku Yelusalema mu myaka kitota kitanshi, baletejile ‘balongo bonse lusekelo lukatampe’ byo bebashimikizhe kwaluluka kwa Bangetila. (Byu. 15:3) Ne anweba mwakonsha kuletela balongo lusekelo umvwe mwibabulako bintu byawama byamwekele.

Kabiji bantu bakonsha kutundaikwa bingi umvwe mwibakwasha kumona buneme bwa bintu byo babena kuba. Batakaikai na mambo a byo babena kwingilako mwingilo wa bwina Kilishitu. Takaikai boba babena kubula kwingilako pakatampe na mambo a bukote ne kukolwakolwa pano bino saka babena kuchinchika mu bukishinka. Bavululaiko kuba’mba Yehoba kechi ukalubako butemwe bo bejimwesha jizhina janji ne. (Hebe. 6:10) Lwitabilo lumweka panyuma ya lweseko ke kintu kyanema bingi. (1 Pe. 1:6, 7) Balongo betu bakeba kwibavululako pa kino.

Ambainga na Muchima Yense pa Mambo a Luketekelo lwa Kulutwe. Milaye ya Lesa ya bintu bibena kwiya kulutwe ikosesha bingi bonse bamutemwa. Apo kampepo bamo mu luonde baumvwapo javula ino milaye. Pano bino, umvwe kemwambe na muchima yense pa mambo a ino milaye, mwakonsha kwiimwesha nobe yafika kala, kukwasha bantu kwiiketekela’mba ikafika kabiji ne kwibalengela kwikala na michima ya lusanchilo. Kwingijisha bintu byo mwafunda mu Sukulu wa Mwingilo wa Lesa kukemukwasha kuba bino.

Yehoba ye mwine utundaika bantu banji ne kwibakosesha. Nangwa byonkabyo, mwakonsha kwingijila nanji pamo kutundaika ne kukosesha bantu. Umvwe kemwambe ku kipwilo, kyo kimye kyo mwafwainwa kutundaikilamo bantu ne kwibakosesha.