KITANGO 11
‘Sambilai Kukebesha Bufumu’
1. (a) Mambo ka Yesu o akambizhe banteleki banji kusambila kukebesha Bufumu? (b) Jipuzho ka jo twafwainwa kwiipuzha atweba bene?
MU JASHI jo aambile Yesu mu Ngalilea pabapite ne myaka 1,900, wakambizhe banteleki banji amba: ‘Sambilai kukebesha bufumu, ne bololoke bwa [Lesa].’ Pano nga mambo ka o ebakambizhe kuba kino? Nanchi kimye kya Kilishitu kyakwikelamo pa Bufumu kechi kyakijinga kulutwe nenyi? Ee, bino Bufumu bwa Bumesiasa jo jishinda ja Yehoba ja kubingishishamo bumfumu bwanji ne kufikizha nkebelo yanji ikatampe ku ino ntanda. Muntu yense waumvwishishe buneme bwa bino bintu watangizhengako Bufumu mu bwikalo bwanji. Umvwe mu myaka kitota kitanshi kyajinga bino, pano nga ano moba akuba Kilishitu waikala ke Mfumu kyakonsha kupelela pi! Pano jipuzho ke ja kuba’mba, Nanchi mu bwikalo bwami mmwesha kuba’mba mbena kusambila kukebesha Bufumu bwa Lesa nyi?—Mateo 6:33.
2. Bintu ka bantu byo bakebesha?
2 Lelo jino, bantu bavula mwaya ntanda, babena kusambila kukebesha Bufumu. Babena kutumbijika bukalama bwa Bufumu byo baikala bwikalo bwashinkamanatu pakuba kyaswa muchima wa Yehoba, ne kwipana kwi aye. Bino nangwa kiji byonkabyo, bantu bavula batoñamina mu kukebesha bintu bya juba ne juba. Bantu monka bakebela mali, bipe, ne bintutu bikwabo byalusangajiko. Kabiji bebikako bingi kuyilako palutwe mu mingilo yabo yo bakeba kuba. Bwikalo bwabo bumwesha byo batabankana na kukeba bintu bya ku mubiji, ne bya kisangajimbwe. Lesa kechi bamuta ne muchima ne, nangwa kyakuba bamba’mba bamwitabila.—Mat. 6:31, 32.
3. (a) Ñanyi mutundu wa nsabo Yesu yeakambizhe baana banji babwanga kukebesha, kabiji mambo ka? (b) Mambo ka o twafwainwa kubula kubambisha michima na bintu bya ku mubiji?
3 Bino Yesu wajimwine baana banji ba bwanga’mba: “Kechi mwibikila anwe bene nsabo pano panshi ne,” mambo bino bintu kechi bikala myaka ne. Waambile’mba: “Ibikilai nsabo mwiulu” kupichila mu kwingijila Yehoba. Yesu wakambizhe baana banji ba bwanga kwikala na jiso “jijitu” sa batesha muchima wabo kuba kyaswa muchima wa Lesa. Wibambijile’mba: “Kechi mukonshe kwingijila Lesa ne nsabo pamo ne.” Pano nga ibyepi pa bintu bya ku mubiji nabiji, kajo, bivwalo, ne nzubo? Yesu wibajimwine’mba: “Kechi mubambishe michima” ne. Wibambile’mba bamwene ku bañonyi boajisha Lesa. Kabiji Yesu waambijile baana banji ba bwanga kufunjila ku maluba Lesa o avwika. Nanchi bantu ba maana boalengele Yehoba kechi banema kukila byonse bye nenyi? Yesu waambile’mba: “Nanchi sambilai kukebesha bufumu bwanji, ne bololoke bwanji; ne bino bintu byonse bikemubikilwapo.” (Mateo 6:19-34) Abya byubilo byenu bimwesha’mba mwaitabila bino byambo nyi?
Kange Muleke Bukine bwa Bufumu Kwipaiwa Ne
4. Umvwe muntu wakizhamo kutemwisha bintu bya ku mubiji, kika kyakonsha kufumamo?
4 Kijitu bulongo muntu kulanguluka mwakumwena bintu byanji bikebewa ku mubiji aye mwine nangwa bya kisemi kyanji. Pano bino, umvwe muntu wakizhamo kukebesha bintu bya ku mubiji, wakonsha kwiletela malwa. Nangwa kyakuba wamba’mba waketekela mu Bufumu, bino mu muchima wanji saalangulukatu pa bintu bingi, bukine bwa Bufumu bukepaiwa. (Mateo 13:18-22) Kyakumwenako, nsongwalume munonshi wamwipwizhe Yesu amba: “I ki ka kyo nsakuba namba, ntambule bumi bwa myaka?” Byubilo byanji byawamine bingi kabiji wanemekanga bantu, pano bino wakijishemo kutemwisha bintu bya ku mubiji. Kechi wakebele kusankilapo bunonshi boajinga nabo kuba’mba ekale mwana wa bwanga wa kwa Kilishitu ne. Kino kyamulengejile kupulusha jishuko jakwikala pamo ne Kilishitu mu Bufumu bwa mwiulu. Pa kyokya kimye Yesu waambile’mba: “Kyakatazha bingi banonka byavula kutwela mu bufumu bwa Lesa!”—Mako 10:17-23.
5. (a) Bintu ka Paulo byoatundaikile Timoti kusekela nabyo, kabiji mambo ka? (b) Satana wingijisha byepi “kutemwa mali” kwikala kitewa kyalonaiko?
5 Myaka yalondejilepo, mutumwa Paulo wanembejile Timoti, wajinga mu Efisesa muzhi wa bunonshi. Paulo wamuvulwileko’mba: “Kechi twaletelepo kintu panopantanda ne, ne kine byonkabyo kechi tukakonsha kusendapo kintu ne; kabiji pa kwikala na kajo ne bivwalo, byonkabyo tukasekela monka.” Kyawama bingi muntu kwingila kuba’mba emwene aye mwine ne kisemi kyanji “kajo ne bivwalo.” Bino Paulo wajimwine’mba: “Pakuba aba baji na muchima usaka bunonshi baponena mu lweseko ne kufwa mu bwina, ne mu bya lwiso bya kukosama ne bya kwiipaya, byo bibebizha bantu mu lufu ne mu lonaiko.” Satana wajimuka bingi. Pakutatula wakonsha kujimbaikilatu muntu mu tubintu tucheche. Kokyakayanga wamuletela kintu kikatampe, nabiji kifulo kikatampe pa nkito, nangwa nkito ya kufola mali avula yakuba ka kankalwe ne kumona kimye kyakubilamo bintu bya ku mupashi. Twafwainwa kujimuka, umvwe ne, “kutemwa mali” kwakonsha kwitwipaila bintu byanema bya Bufumu. Paulo wanembele bino’mba: “Bamo byo beakumbilwe ebasendwile kufuma ku lwitabilo, kabiji beashile bene na bya bulanda byavula.”—1 Timoti 6:7-10.
6. (a) Pa kuba’mba tubule kufwa mu kitewa kya kutemwisha bintu bya ku mubiji, twafwainwa kuba byepi? (b) Luketekelo ka lotwafwainwa kwikala nalo nangwa kyakuba bintu bya ino ntanda byakatazha?
6 Na butemwe bwa kine boatemenwe mulongo wanji wa bwina Kilishitu, Paulo wamusanshijile Timoti amba: “Uchineko ku byo bino bintu,” ne ‘kulwa bulwi bwawama bwa lwitabilo.’ (1 Timoti 6:11, 12) Kikebewa bingi kwibikako umvwe tukeba’mba tubule kukumpwilwa kumo na bwikalo bwa kutemwisha bintu bya ku mubiji bya ino ntanda yotujimo. Pano umvwe twibikako atwe bene kwikala monka mwayila lwitabilo lwetu, Yehoba kechi uketulekelela nangwa pachechetu ne. Nangwa kyakuba mitengo yanana kabiji makito nao abashupe, aye ukamona kuba’mba tuji nabyo byonse bitufwainwa. Paulo wanembele’mba: “Mwikale ba kubula kutemwa mali; sekelai mu byonka byo muji nabyo: mambo aye mwine [Lesa] waambile’mba, Kechi nkakushe nangwa kachechetu ne, ne kukulekelela nangwa kachechetu ne. Onkao mambo twaamba na kuchinchika namba, Nkambo ye nkwasho wami; kechi nchine ne: Muntu akangube ka?” (Bahebelu 13:5, 6) Mfumu Davida naye wanembele’mba: ‘Najinga mwanyike, pano kanji mukote; byonkabyo kechi namwenepo waoloka walekelelwa ne, nangwa baana banji saka balomba kajo ne.’—Masalamo 37:25.
Baana ba Bwanga Batanshi Betushila Mwakulondela
7. Mikambizho ka Yesu yoakambizhe baana banji ba bwanga pa mambo a kusapwila, kabiji mambo ka ino mikambizho kyoyaikejile yafwainwa?
7 Yesu byoapwishishe kufunjisha batumwa banji, wibatumine mu Isalela na kusapwila mambo awama ne kwamba’mba: “Bufumu bwa mwiulu bwafwenya ke pepi.” Byoajingapo mambo awama! Yesu Kilishitu, Mfumu wa Bumesiasa wajinga ne abo. Batumwa byo bepaine kwingila mwingilo wa Lesa, Yesu wibakoseshe kuketekela’mba Lesa ukebalama. Onkao mambo waambile’mba: “Kechi musende kintu kya pa lwendo lwenu ne, nangwa kamama, nangwa fukuta, nangwa shinkwa nangwa ndalama, nangwa mikangyo ibiji muntu umo ne. Kabiji monse mu mazubo mo mukatwela kekalai monka ne byo mukafumakotu.” (Mateo 10:5-10; Luka 9:1-6) Yehoba wamwene kuba’mba bakwabo bena Isalela bebalaminenga bingi bulongo, mambo kyo kyajinga ne kisela kyabo kya kutambwila benyi.
8. (a) Byo kwashajiletu kimye kicheche kuba’mba afwe, mambo ka Yesu o apanyijile mikambizho ikwabo pa mambo a kusapwila? (b) Bino nangwa byonkabyo, kika kyafwanyijilwe kwikala kitanshi mu bwikalo bwa baana ba bwanga ba kwa Yesu?
8 Mu kupita kwa kimye, saakyangye kufwa ne, Yesu wajimwineko batumwa banji kuba’mba kulutwe na lwendo bakasapwilanga mu kimye kyakatazha. Na mambo a bantangi bakainyenga mwingilo wabo, kyalengejile bena Isalela kuleka kwibatambwila. Kabiji bakayanga ne na kusapwila mambo a Bufumu ku Bagentila. Onkao mambo, bafwainwe kusenda ‘kikwama’ ne “fukuta.” Nangwa byonkabyo, bafwainwe kusambila kukeba Bufumu bwa Yehoba ne bololoke bwanji, saka baketekela’mba Lesa ukebakwasha kumona kajo ne bivwalo.—Luka 22:35-37.
9. Paulo watangizheko byepi Bufumu mu bwikalo bwanji aku saakeba bintu bya ku mubiji bikebewa, kabiji lujimuno ka loapaine pa kino?
9 Mutumwa Paulo wajinga wakumwenako mukwingijisha lujimuno lwa kwa Yesu. Paulo watangizheko mwingilo mu bwikalo bwanji. (Byubilo 20:24, 25) Inge waya kumpunzha ingi na kusapwila, mwine wikebelanga bintu bikebewa, waingilanga ne mwingilo wa kuluka matente. Kechi waketekelanga bakwabo kumulama ne. (Byubilo 18:1-4; 1 Tesalonika 2:9) Bino wasantanga bingi umvwe bakwabo bamutambwila ne kumupa bya bupe mu butemwe bwabo. (Byubilo 16:15, 34; Filipai 4:15-17) Paulo wakoseshe bena Kilishitu amba kechi bafwainwa kulekelela bisemi byabo na mambotu a kusapwila konka ne, bafwainwe kwesakanya mingilo yabo. Wibafunjileko kwingila kyakosa, kutemwa bisemi byabo, ne kupapo bakwabo. (Efisesa 4:28; 2 Tesalonika 3:7-12) Wibakambizhe kuketekela mwi Lesa, kechi mu bintu bya ku mubiji ne. Kabiji wibakambizhe ne kwikala bwikalo bwakumwesha’mba bayuka bintu byanema. Kwesakana na mwayijile mafunjisho a kwa Yesu, kino kyalumbulwile kutangizhako Bufumu bwa Lesa ne bololoke bwanji.—Filipai 1:9-11.
Tangizhaiko Bufumu mu Bwikalo Bwenu
10. (a) ‘Kusambila kukebesha Bufumu’ kilumbulula ka?
10 Nga atweba pa muntu pa muntu tusapwila mambo awama a Bufumu ku bakwetu kufika pepi? Kino kijitu ku muntu mwine kwesakana na byoaji ne lusanchilo lwanji. Yukai kuba’mba Yesu kechi waambile’mba, ‘Sambilai kukebesha Bufumu umvwe kafwako kyo mubena kuba ne.’ Byoayukile munema wa Bufumu, waambile kyaswa muchima wa Shanji, amba: “Kebai Bufumu bwanji.” (Luka 12:31) Nangwa kyakuba atweba bavula twafwainwa kwingila kuba’mba tumone bintu bitufwainwa atweba pamo ne bisemi byetu, umvwe twaikala na lwitabilo, bwikalo bwetu bonse bukekala bwakwingila mwingilo wa Bufumu witupa Lesa. Kabiji kechi tukaleka mitembo ya kulama bisemi byetu ne.—1 Timoti 5:8.
11. (a) Yesu walumbulwile byepi kuba’mba kechi bantu bonse bakonsha kwingila mwingilo waesakana mu kusampanya mambo awama a Bufumu ne? (b) Bintu ka byakonsha kulengela muntu kumona byoakonsha kwingila?
11 Atweba bamo twingila javula kukila bakwetu mu mwingilo wa kusapwila mambo awama a Bufumu. Pano mu kishimpi kyanji kyoashimikizhe kya mushiji wapusana pusana, Yesu waambile’mba aba bonse baji na michima iji nobe mushiji wawama bakapanganga bipangwa. Kupanga bipangwa byavula byepi? Bwikalo bwa bantu bwaenda kupusana. Bapusana mu mafumbi, butuntulu bwa mubiji, ne mitembo ya kulama bisemi. Bino umvwe bantu batemwisha kusapwila mambo awama, byavula byakonsha kwingijiwa.—Mateo 13:23.
12. Ñanyi bikonkwanyi bya ku mupashi kikatakata bakyanyike byo bafwainwa kulangulukapo?
12 Kyawama kwibikila bikonkwanyi byakonsha kwitulengela kwingila javula mu mwingilo wetu wa Bufumu. Bakyanyike bafwainwa kulangulukishapo pa byaubile mwina Kilishitu wakyanyike Timoti waingijilenga na mukoyo. (Filipai 2:19-22) Ñanyi mwingilo wawama ye bakonsha kwingila kukila mwingilo wa kimye kyonse umvwe bapwisha sukulu wabo? Bakikulumpe nabo bakonsha kumwenamo mfweto umvwe bebikila bikonkwanyi bya ku mupashi.
13. (a) Ñanyi ufuukula bintu byotwafwainwa kuba mu mwingilo wa Bufumu? (b) Umvwe kine tubena kusambila kukebesha Bufumu, tushiina ka?
13 Mu kifulo kya kusuula boba botumona’mba bakonsha kwingila kyabaya, twafwainwa atweba bene kutundaikwa na lwitabilo kwingila’mba tukomeneko mu kwingijila Lesa papelela bulume bwetu kwesakana na bwikalo bwetu. (Loma 14:10-12; Ngalatiya 6:4, 5) Byonka byo kyajinga kwi Yoba, Satana wakosapotu na kwamba’mba atweba tukebakotu bintu bya ku mubiji, kwikala bulongo, ne kuba’mba twingijila Lesa mambo a kukebakotu bintu kwi aye. Pano bino umvwe kine tubena kusambila kukebesha Bufumu, kokuba’mba tubena kushinawina Diabola amba wa bubela bwine bufita. Tubena kushiina kuba’mba mwingilo wa Lesa kyo kintu kikatampe mu bwikalo bwetu. Mu ñambilo ne mu byubilo, tumwesha butemwe bwetu botwatemwa Yehoba, byo tutumbijika bumfumu bwanji, ne byotwatemwa bakwetu.—Yoba 1:9-11; 2:4, 5; Byambo bya Mana 27:11.
14. (a) Mambo ka o kyawamina kutanchika mutanchi wa mwingilo wa mu bujimi? (b) Bakamonyi bavula babena kusapwila byepi mwingilo wa mu bujimi?
14 Kutanchika mutanchi kwakonsha kwitukwasha kwingila javula mu busapwishi kukila ne potwakonsha kupelela kwingila. Ne Yehoba naye uji na “mwaka [kimye kyatongolwa, NW]” kya kwingijilamo nkebelo yanji. (Kulupuka 9:5; Mako 1:15) Umvwe kyakonsheka, kyawama kwingilako mu mwingilo wa mu bujimi jimo nangwa javula mulungu ne mulungu. Bakamonyi bakwa Yehoba bavula kuzhokoloka ntanda yonse babena kwingilako bupainiya bwa kukwasha, juba jimo bengila pepi na maawala abiji mu mwingilo wa kusapwila mambo awama. Bakwabo nabo bengila bupainiya bwa kimye kyonse, pa juba pa juba bengila pepi na maawala abiji ne kichika mu kusapwila mambo awama a Bufumu. Bapainiya beikajila ne bamishonale abo bengila ne kimye kikatampe mu mwingilo wa Bufumu. Kabiji twakonsha ne kwisamba na uji yense luketekelo lwa Bufumu mu busapwishi bwa kushukilwa. (Yoano 4:7-15) Kyotukeba ke kumona kuba’mba tubena kwingila javula mu uno mwingilo kwesakana na bwikalo botujimo, mambo Yesu waambijile jimo amba: “Ano mambo awama a bufumu akasapwilwa panopantanda ponse mwa kwibashimwina ba mu mikoka yonse ya bantu; bino ke ku mpelo.”—Mateo 24:14; Efisesa 5:15-17.
15. Kwesakana na mwingilo wetu wa mu bujimi, mambo ka o mubena kulangulukila amba lufunjisho luji mu 1 Kolinda 15:58 lwafwainwa bingi?
15 Bakamonyi bakwa Yehoba bakwatankana mwaya ntanda yonse kwingila uno mwingilo mukatampe wa kusapwila, nangwa kyakuba baji mu byalo byapusana pusana. Balondela lufunjisho lwanembeshiwa mu Baibolo amba: “Ikalai bashikamatu, ne kutelengela ne, kasa mukelwa kwingijisha mwingilo wa Nkambo, byo mwayuka’mba, mwingilo wetu wa mwi Nkambo kechi ye watu ne.”—1 Kolinda 15:58.
Mepuzho Akupitulukamo
• Yesu byoaambile’mba, “sambilai kukebesha bufumu,” kika kyoatongwelenga amba kyo kyafwainwa kwikala kya bubiji?
• Ndangulukilo yetu yafwainwa kwikala byepi pa mambo a kwimwena bikebewa atweba bene ne bisemi byetu? Nga Lesa wakonsha kwitukwasha byepi?
• Mu ñanyi mbaji ya mwingilo wa Bufumu motwafwainwa kwingila?
[Kipikichala pa peja 107]
Mu byalo byonse, Bakamonyi bakwa Yehoba lelo jino babena kusapwila mambo awama mpelo saka ikyangye kwiya