KITANGO 13
Jibumba Jikatampe Jaimana ku Meso a Jitanda ja Yehoba
1. (a) Bakalume ba Lesa bajingako kala nangwa ba 144,000 saka bakyangye kutambula mfweto yabo, patanshi bafwainwa kuba ka? (b) Kika kikobiwa ku “jibumba jikatampe” ja ano moba?
BAKALUME bakishinka ba Lesa kutendekatu kwi Abela shoo ne kwi Yoano Mubatishi, batangizhangako kuba kyaswa muchima wa Lesa mu bwikalo bwabo. Bino bano bonse bafwile kala, babena kupembelela kukasangulwa ne kwikala panopantanda mu ntanda ipya ya Lesa. Ba 144,000 bakalama pamo ne Kilishitu mu Bufumu bwa mwiulu bwa Lesa, nabo bafwainwa kufwa saka bakyangye kutambula mfweto yabo. Lumwekesho 7:9 waamba’mba mu ano moba apelako, kuji “jibumba jikatampe” ja bafuma mu mikoka yonse ya bantu bakabula kufwa bakekala panopantanda myaka ne myaka. Abya nenuwa muji pa bano nyi?
Kuyuka Jibumba Jikatampe
2. Jibumba jikatampe ja mu Lumwekesho 7:9 jaishile kuyukanyikwa byepi?
2 Mu 1923, bakalume ba Yehoba bayukile’mba ‘mikooko’ iji mu kishimpi kya kwa Yesu kiji mu Mateo 25:31-46 ne ‘mikooko ikwabo’ yoatongwele byonka byo kyanembwa mu Yoano 10:16 ke bantu baji na luketekelo lwakukekala myaka ne myaka panopantanda. Mu 1931, aba balondololwa mu Ezikyo 9:1-11 amba babena kubikwa tuyukilo pa bilungi byabo nabo bayukanyikilwe’mba baji ku lubaji lwa boba bakekala panopantanda. Kepo kyaishile kuyukanyikwa mu 1935 amba, jibumba jikatampe ke lubaji lwa mikooko ikwabo Yesu yoatongwele. Ano moba, jibabaye bingi jino jibumba jikatampe jaubilwa bibusa.
3. Mambo ka byambo bya kuba’mba “baimana ku meso a jitanda” o bibujila kulumbulula jibumba ja mwiulu?
3 Mu Lumwekesho 7:9, jibumba jikatampe kechi jamonwa’mba jiji mwiulu ne. ‘Kwimana kwajo ku meso a jitanda’ ja Lesa kechi kilumbulula’mba jafwainwa kwikala mwiulu ne. Kilumbululatu’mba Lesa ubena kwijitala. (Masalamo 11:4) Kishinka kya kuba’mba jibumba jikatampe, “jo babula kukonsha kubala nangwa ku umo ne,” kechi jibumba ja mwiulu ne, kiji mu lupusano luji pakachi ka kibelengelo kyajo kyabula kuyukanyikwa ne kibelengelo kyanembwa mu Lumwekesho 7:4-8 ne Lumwekesho 14:1-4. Kibelengelo kya bantu batongolwa pano kuya mwiulu ke 144,000.
4. (a) “Malwa akatampe” o aka mukapuluka jibumba jikatampe? (b) Kwesakana na byaambiwa mu Lumwekesho 7:11, 12, bañanyi bakamona jibumba jikatampe ne kupopwela najo pamo?
4 Lumwekesho 7:14 waamba pa jibumba jikatampe amba: “Bano bo boba bafuma mu aa malwa akatampe.” Bapuluka mu malwa akatampe abujile kwikalako kala mu bwikalo bwa bantu. (Mateo 24:21) Byo bakasanchila Lesa ne Kilishitu na mambo a kwibapulusha, bilengwa byonse bya kishinka mwiulu bikakwatankana nabo kwamba’mba: ‘Amena: lutakaiko, ne lukumo, ne maana, ne sante, ne buneme, ne bulume, ne ngovu, bikale kwi Lesa wetu myaka ne myaka. Amena.’—Lumwekesho 7:11, 12.
Kwikala Bafwainwa Lupulukilo
5. Twakonsha kuyuka byepi bikebewa kuba’mba twikale ba mu jibumba jikatampe?
5 Kuzhikijilwa kwa jibumba jikatampe mu malwa akatampe kwaimena pa kulondela mafunde aoloka a Yehoba. Byubilo bya kuyukilako aba bakapokololwa byanembwa mu Baibolo. Mu jino jishinda, kyakonsheka ku boba batemwa bololoke kwikala lonka luno na bino byubilo bilengela kwikala bafwainwa lupulukilo. Bano bantu bafwainwa kwikala na byubilo ka?
6. Mambo ka jibumba jikatampe o japashañanyishiwa ku mikooko?
6 Mikooko yakoka muchima kabiji ikokela bingi. Onkao mambo Yesu byoaambile’mba uji na mikooko ikwabo yabula ya mu jibumba ja mwiulu, kechi wikitazhizhetu mu kuba’mba bantu bakeba kukekala panopantanda myaka ne myaka ne, bino wikitazhizhe ne mu kuba’mba bakeba kukokela mafunjisho anji. Waambile’mba: ‘Mikooko yami yumvwa jiwi jami, ne amiwa neiyuka, ne ayo indondela.’ (Yoano 10:16, 27) Abe ke bantu bomvwina kya kine ne kuba na lukokelo byamba Yesu, kabiji baluka ke baana banji ba bwanga.
7. Ñanyi byubilo batumwa ba kwa Yesu byobafwainwa kwikala nabyo?
7 Ñanyi byubilo bikwabo bano baana ba bwanga ba kwa Yesu byobafwainwa kwikala nabyo? Byambo bya Lesa byakumbula’mba: “Muvūle mwayila awa musango wa bwikalo bwenu butanshi, abwa bumuntu bwa kala, ... ne kuvwala bumuntu bupya bwalengwa mu bololoke ne buzhile bwa bukine monka mwaikajila Lesa.” (Efisesa 4:22-24) Bekala na byubilo bikwatankanya bakalume ba Lesa—‘butemwe, lusekelo, mutende, kukoka muchima, lusa, buwame, bukishinka, bukimote, ne kwikanya.’—Ngalatiya 5:22, 23.
8. Jibumba jikatampe jikapita mu ka byojibena kukwasha bashalapo?
8 Jibumba jikatampe jikwasha kibelengelo kicheche kya boba baji na luketekelo lwa kuya mwiulu, babena kutangijila mwingilo wa kusapwila. (Mateo 24:14; 25:40) Mikooko ikwabo ipana buno bukwasho nangwa kyakuba yayuka’mba ikapita mu makatazho na mambo akuba kuntatwilo ya ano moba apelako, Kilishitu Yesu ne bamalaika banji bamwelele Satana ne bademona banji kufuma mwiulu. Kino kyalumbulwile ‘malwa ku ntanda ... mambo Diabola waikila ko muji, kasa aji na bukaji bukatampe, byo ayuka’mba kimye kyanji ke kicheche.’ (Lumwekesho 12:7-12) Onkao mambo, Satana ubaisha bingi lumanamo lwa kumanyika bakalume ba Lesa mpelo ya buno bwikalo byo ibena kufwenya pepi.
9. Bakalume ba Lesa bengila byepi bulongo mwingilo wa kusapwila mambo awama, kabiji mambo ka?
9 Nangwa kyakuba kuji lumanamo lukatampe, mwingilo wa kusapwila ubena kutwajijila. Kimye kyapwile Nkondo itanshi ya Ntanda yonse, basapwishi ba Bufumu bajingatu bacheche, pano luno babavule bingi, mambo Yehoba walayile’mba: “Kafwako kyela nangwa kimo kyo bakabunda kya kukulwishako obewa kikengila bulongo ne.” (Isaya 54:17) Mukulumpe umo wa mu kije kikatampe kya Bayudea wayukile’mba mwingilo wa Lesa kechi bakamushinda ne. Wabujile Bafaliseo ba mu myaka kitota kitanshi pa mambo a baana ba bwanga amba: ‘Balekai: mambo a kuba inge ano maana ne uno mwingilo byo bya bantu bikazhimañanatu: kabiji inge bya Lesa, kechi mukakonsha kwibashinda ne; kuchina’mba mwakaluka ke ba kulwa ne Lesa.’—Byubilo 5:38, 39.
10. (a) “Kayukilo” kaji na ba mu jibumba jikatampe kalumbulula ka? (b) “Bakalume ba Lesa bomvwina byepi “jiwi jafuma mwiulu”?
10 Aba ba mu jibumba jikatampe balondololwa amba babikiwa tuyukilo twa lupulukilo. (Ezikyo 9:4-6) “Kayukilo” kalumbulula’mba bepana kwi Yehoba, babatizwa kwikala baana ba bwanga ba kwa Yesu, kabiji babena kweseka na bulume bwabo bonse kwikala na byubilo bya kwa Kilishitu. Bomvwina “jiwi jafuma mwiulu” jaamba pa mambo a bupopweshi bwa bubela bwa kwa Satana bwa ntanda yonse amba: “Lupukaimo mwi aye, kechi mumvwañane nanji mu bya bundengamambo bwanji ne, namba mwakatambulako myalo yanji.”—Lumwekesho 18:1-5.
11. Mu ñanyi jishinda janema aba baji mu jibumba jikatampe mobamweshesha’mba bakalume ba Lesa?
11 Kabiji Yesu waambijile baana banji ba bwanga amba: ‘Pa kyo kino po po bakayukila bonse amba anweba mwi baana bami ba bwanga, inge mwitemwe anwe bene na bene.’ (Yoano 13:35) Bantu ba mu bupopweshi bwa ino ntanda bapusanako, abo beipaya bene mulwabo mu nkondo, na mambotu akuba’mba bakwabo ba mu kyalo kingi! Byambo bya Lesa byaamba’mba: ‘Monka muno mo bamwekela baana ba Lesa, ne baana ba Diabola: bonse babula kuba bololoke kechi bo ba kwa Lesa ne, nangwa aye wabula kutemwa mulongo wanji ne... . Tutemwañane atwe bene na bene: Kechi pamo ne aye Kaina ne, waji wa kwa yewa mubi, waipayile mulongo wanji.’—1 Yoano 3:10-12.
12. Mu malwa akatampe, Yehoba ukebyuba byepi ‘bichi’ bya bupopweshi bipanga bipangwa byabula kufwainwa?
12 Yesu waambile’mba: “Bichi byonse byawama bipanga bipangwa byawama; kabiji kyabipa kipanga bipangwa byabipa. Kichi kyawama kechi kyayuka kupanga bipangwa byabipa ne, nangwa kichi kyabipa kupanga bipangwa byawama ne. Bichi byonse bibula kupanga bipangwa byawama bebitema, ne kwibyela mu mujilo. Byonkabyo mukebayukila kubipangwa byabo.” (Mateo 7:17-20) Bipangwa bipanga bupopweshi bwa ino ntanda bibuyukanyikisha’mba ‘bichi’ byabola, kabiji katatakatu Yehoba akebyonaune mu malwa akatampe.—Lumwekesho 17:16.
13. Jibumba jikatampe jimwesha byepi’mba bakwatankana “kasa baimana ku meso a jitanda” ja Yehoba?
13 Lumwekesho 7:9-15 walondolola bishinka bikalengela jibumba jikatampe kuzhikijilwa. Baambiwa’mba “baimana ku meso a jitanda” ja Yehoba, na kutumbijika bumfumu bwanji bwa bilengwa byonse. ‘Baovwa bivwalo byabo, ne kwibitokesha mu mashi a Mwana mukooko,’ kulumbulula’mba bayuka kitapisho kya Yesu kya mfuto ya mambo. (Yoano 1:29) Bepana abo bene kwi Lesa kabiji bamwesha kino kupichila mu lubatizhilo lwa mu mema. Bivwalo bitoka byo bavwala bilumbulula’mba batokeshiwa ku meso a Lesa, kabiji bamwingijila ‘mwingilo wazhila mute ne bufuku.’ Abya kujipo mashinda amo o mwakonsha kupimpula mu bwikalo bwenu kuba’mba mwikele mwayila byalondololwa pano nyi?
Mfweto Yobamona Lonka Luno
14. Mfweto ka iikajila yo bamona bakalume ba Yehoba ano moba?
14 Apo kampe mwamona mfweto yo bamona aba bamwingijila Yehoba ano moba. Kyakumwenako, byomwafunjile pa nkebelo yaoloka ya Yehoba, mwayukile kuba’mba kimye kya kulutwe kikekala kya lusekelo. Pano luno mwayuka kyotwaikelako. Twaikelako kwingijila Lesa wakine na luketekelo lwa lusekelo lwa kukekala mu paladisa panopantanda myaka ne myaka. Ee, Mfumu Yesu Kilishitu ‘ukatangijila [jibumba jikatampe] kuji masulo atupauka a mema a bumi.’—Lumwekesho 7:17.
15. Bakamonyi bakwa Yehoba bamwenamo byepi mfweto byo basunga mafunde a mu Baibolo akanya kwitumpa mu bumulwila ntanda ne mu byubilo byatama?
15 Mfweto yakilamo kuwama yo bamona ba jibumba jikatampe ke butemwe, mutende, buumo, ne kukwatankana kobakwatankana bakalume ba Yehoba mwaya ntanda yonse. Atweba bonse byo tuja kajo ka ku mupashi kamotu, tulondela mizhilo ne mafunde amotu aji mu Byambo bya Lesa. O ene mambo o twabujila kwabenamo na mambo a bya bumulwila ntanda nangwa na mizhilo ya byalo. Kabiji tuji na byubilo byawama Lesa byoakeba bantu banji kwikala nabyo. (1 Kolinda 6:9-11) Onkao mambo, mukifulo kya malwañano, mepatulo, ne byubilo byatama byabasampukile ne pakatele mu ino ntanda, bantu ba Yehoba babena kwiyowa paladisa wa ku mupashi. Monai kino byo kyalondololwa mu Isaya 65:13, 14.
16. Nangwa kyakuba bapita mu makatazho a mu bwikalo, luketekelo ka luji na boba ba mu jibumba jikatampe?
16 Bantu ba Yehoba kechi balumbuluka ne. Kabiji bapita mu makatazho a mu bwikalo bwa ino ntanda, nabiji lumanamo nangwa kwibepayatu mu makondo a byalo. Kabiji bakolwa, bayanda, ne kufwa. Pano bino baji na luketekelo lwa kuba’mba mu ntanda ipya, Lesa “ukashimuna mipolo yonse ku meso abo; ne lufu kechi lukekalako jibiji ne; nangwa mabingo, nangwa kujila, nangwa misongo, kechi bikekalako jibiji ne.”—Lumwekesho 21:4.
17. Nangwa kintu kya byepi nangwa kya byepi kitumwekela luno, bintu ka byawama biji kulutwe byasungilwa boba bapopwela Lesa wa kine?
17 Nangwa kyakuba mwafwa kino kimye na mambo a bukote, kukolwa, mapuso, nangwa na mambo a kwimuyanjisha, Yehoba ukemusangula mukekala mu Paladisa. (Byubilo 24:15) Kepo mukatwajijila kwiyowa kijiilo kya ku mupashi mu kimye kya Bukalama bwa Kilishitu bwa Myaka Kiumbi kimo. Butemwe bomwatemwa Lesa bukabailako byo mukamonanga milaye yanji saifikizhiwa. Kabiji ne bintu byawama bya ku mubiji Yehoba byo akapana bikemulengela kumutemwisha. (Isaya 25:6-9) Kimye kya kulutwe Lesa kyoasungila bantu banji byo kikawamapo!
Mepuzho Akupitulukamo
• Ñanyi kintu kikatampe Baibolo kyo yaamba’mba kechi kikobiwa ku jibumba jikatampe ne?
• Umvwe kine tukeba kwikala mu jibumba jikatampe Lesa joaubila bibusa, twafwainwa kubanga ka kino kimye?
• Nga bintu byawama byo babena kwiyowa ba jibumba jikatampe pa kino kimye ne kimye kya kulutwe mu ntanda ipya ya Lesa byanema byepi kwi anweba?
[Kipikichala pa peja 123]
Bantu bavula ba jibumba jikatampe bakwatankana mu kupopwela Lesa wa kine