Batelwa’mba Bo Bafwainwa Kutangijilwa Kuji Masulo Atupauka A Mema A Bumi
‘Mwana mukooko . . . ukekala kafunga wabo, kabiji ukebatangijila kuji masulo atupauka a mema a bumi.’—LUM. 7:17.
1. Mambo a Lesa ayukanyikisha byepi bena Kilishitu bashingwa, kabiji mwingilo ka Yesu ye ebapele?
MAMBO A LESA atongola bena Kilishitu bashingwa babena kulama bintu bya Kilishitu panopantanda amba ye ‘kalume wa kishinka ne wa maana.’ Kilishitu byo apempwile uno “kalume” mu 1918, wataine bano bashingwa panopantanda saka baikala bakishinka mu kupana ‘kajo ka ku mupashi pa kimye pafwainwa.’ O ene mambo, Yesu, Nkambo, kyo atemenwejile ne kwibatongola amba balamenga “bintu byanji byonsetu.” (Tangai Mateo 24:45-47.) Mu jino jishinda, bashingwa saka bakyangye kutambula mfweto yabo mwiulu, bakwasha bapopweshi bakwabo ba Yehoba panopantanda.
2. Bintu bya kwa Yesu byavwangamo ka?
2 Nkambo uji na lūsa lwa pa bintu nangwa’mba bipe byanji, kabiji wakonsha kwibingijisha monka mo akebela. Bintu bya kwa Yesu Kilishitu, awo ye baikajika kwi Yehoba ke Mfumu byavwangamo bintu byonse byalamata Bufumu kubikakotu ne bangikazhi baji panopantanda. Bino bintu byavwangamo “jibumba jikatampe” jamwene mutumwa Yoano mu kimwesho. Yoano wijilumbulula bino jibumba jikatampe amba: ‘Namwene, ponkapo ke ku jibumba jikatampe, jo babula kukonsha kubala nangwa ku umo ne, bafuma mu mikoka yonse ne mu bisaka byonse ne mu mitundu yonse ne njimi yonse ya bantu, kasa baimana ku meso a jitanda ne ku meso a Mwana mukooko, kasa bavwala bivwalo bitoka, ne mapambo a bisonga mu maboko abo.’—Lum. 7:9.
3, 4. Aba ba mu jibumba jikatampe bashukwa byepi?
3 Ba mu jibumba jikatampe baji pa boba bo aambilepo Yesu amba ‘mikooko ikwabo’ yanji. (Yoa. 10:16) Luketekelo lwabo ke lwa kwikala myaka ne myaka mu paladisa panopantanda. Basumininwa amba Yesu “ukebatangijila kuji masulo atupauka a mema a bumi, ne kuba’mba Lesa ukashimuna mipolo yonse ku meso abo.” Na mambo a luno luketekelo, ‘baovwa bivwalo byabo, ne kwibitokesha mu mashi a Mwana mukooko.’ (Lum. 7:14, 17) Baitabila mu kitapisho kya kwa Yesu, ne mu jino jishinda ‘batokesha bivwalo’ byabo ku meso a Lesa. Batongolwa’mba baoloka ne kwikala balunda na Lesa, byonka byajinga Abalahama.
4 Kabiji jibumba jikatampe jibena kuyatu na kubayilako ja mikooko ikwabo byo bejimona kwi Lesa amba jaoloka, jafwainwa kuketekela kupuluka kimye kikonaunwa buno bwikalo pa malwa akatampe. (Yako. 2:23-26) Bafwainwa kufwenya kwipi ne Yehoba, kabiji byo baji jibumba, baji na luketekelo lwawama bingi lwa kupuluka pa Amagedonyi. (Yako. 4:8; Lum. 7:15) Kechi bepatula ne, bino batangijilwa na Mfumu wa mwiulu ne balongo banji bashingwa baji panopantanda.
5. Aba baji mu jibumba jikatampe bakwasha byepi balongo ba kwa Kilishitu bashingwa?
5 Bena Kilishitu bashingwa bapita mu makatazho a ino ntanda ya kwa Satana kabiji bakatwajijila na kupitamo. Nangwa byonkabyo, bakonsha kuketekela mu bukwasho bwa balunda nabo ba mu jibumba jikatampe. Kibelengelo kya bena Kilishitu bashingwa byo kyakepa, jibumba jikatampe jibena kubayilako pa mwaka pa mwaka. Bashingwa bunke bwabo kechi bakonsha kwikala mu bipwilo bya bena Kilishitu byafika pepi nobe 100,000 na kwibitangijila mwaya ntanda ne. Onkao mambo, jishinda jimo bano bashingwa jo bebakwashishamo ku mikooko ikwabo ke ja kuba’mba, banabalume bafikapo ba mu jibumba jikatampe batongolwa kwikala bakulumpe mu bino bipwilo. Bakwasha kutangijila bena Kilishitu bavula bingi baji mu maboko a ‘kalume wa kishinka ne wa maana.’
6. Kyaambijilwe byepi jimo amba bena Kilishitu bashingwa bakatambulanga bukwasho ku balunda nabo ba mu mikooko ikwabo?
6 Bena Kilishitu bashingwa byo bebakwasha mu kwitemenwa ku balunda nabo ba mikooko ikwabo kyaambijilwe jimo na ngauzhi Isaya. Wanembele’mba: “Yehoba waamba’mba: Bamingilo babula kutambula mfweto bena Ijipita ne basulu bena Etiopya ne bantu bazama bena Saba bakeya ko muji ke benu, kabiji bakekala ke bantu benu; kabiji bakemulondelanga.” (Isa. 45:14, NW) Mu bukifwanyikizho, bena Kilishitu baji na luketekelo lwa kwikala panopantanda lelo jino balondela lutangijilo lwa jibumba ja kalume washingwa ne Jibumba Jitangijila. Byo “babula kutambula mfweto,” ba mu mikooko ikwabo bepana na muchima yense kwingijisha bulume ne bintu byabo bya ku mubiji mu kukwasha mwingilo wa busapwishi ubena kwingijiwa mwaya ntanda yonse, awo Kilishitu ye apele baana banji ba bwanga bashingwa baji panopantanda.—Byubilo 1:8; Lum. 12:17.
7. Ba mu jibumba jikatampe babena kwibafunjisha amba bakobenga ka kulutwe na lwendo?
7 Byo bakwasha balongo babo bashingwa, ba mu jibumba jikatampe babena kwibafunjisha kuba’mba bekale ke kitendekesho kya bwikalo bupya bo bakekala panyuma ya Amagedonyi. Kino kitendekesho kyafwainwa kwikala kyakosa, kabiji ne bantu bekyala bafwainwa kwipana ne kwingila mingilo yonse ya Nkambo yabo. Mwina Kilishitu yense wapewa jishuko ja kumwesha amba wakonsha kwingijishiwa kwi Mfumu, Yesu Kilishitu. Umvwe mwina Kilishitu waikala na lwitabilo ne bukishinka lelo jino, umwesha’mba ukalondelanga bikatangijilanga Mfumu mu ntanda ipya.
Jibumba Jikatampe Jiji na Lwitabilo Lwakosa
8, 9. Ba mu jibumba jikatampe babena kumwesha byepi lwitabilo lwabo?
8 Ba mu mikooko ikwabo abo baikala balunda na ba mu kipwilo kya bena Kilishitu bashingwa bamwesha lwitabilo lwabo mu mashinda avula. Kishinka kitanshi, bakwasha bashingwa mu kusapwila mambo awama a Bufumu bwa Lesa. (Mat. 24:14; 28:19, 20) Kya bubiji, bepana abo bene kutangijilwanga na Jibumba Jitangijila.—Hebe. 13:17; tangai Zekaliya 8:23.
9 Kya busatu, ba mu jibumba jikatampe bakwasha balongo babo bashingwa kupichila mu kulondela mafunde aoloka a Yehoba mu bwikalo bwabo. Beseka na ngovu yonse kumwesha “butemwe, lusekelo, ne mutende, ne kukoka muchima, ne lusa, ne buwame, ne bukishinka, ne bukimote, ne kwikanya.” (Nga. 5:22, 23) Lelo jino, bantu bavula kechi bamwesha bino byubilo mu bwikalo bwabo ne, bavula bamwesha “mingilo ya buntunshi.” Nangwa byonkabyo, ba mu jibumba jikatampe bakebesha bingi kubula kuba “bulalelale, ne bubipisho, ne bya bunya, ne kupopwela bankishi, ne bya buñanga bwa lubuko, ne mafika, ne lutobo, ne bichima, ne bukaji, ne bya bongozhi, ne maabano, ne mepatulo, ne bikonkoma, ne kupendwa, ne kusangalala kubi, ne bya byonkabyo.”—Nga. 5:19-21.
10. Ba mu jibumba jikatampe bakebesha kuba ka?
10 Byo tuji bambulwakoloka, kyakonsha kushupa bingi kumwesha bipangwa bya mupashi, kubula kulondela mingilo ya buntunshi, ne kukana mikiika ya mu ino ntanda ya kwa Satana. Nangwa byonkabyo, twakebesha bingi kumona kuba’mba kulefulwa na mambo a bukoke bwetu, kubula kulondela bulongo Yesu, nangwa kubelabela bitulengela kubula kwikala na lwitabilo nangwa kubula kutemwa Yehoba. Twayuka’mba Yehoba ukoba byo alaya, ko kuba’mba ukazhikijila jibumba jikatampe pa kuba’mba jikapite mu malwa akatampe.
11. Ñanyi mingalato yo engijisha Satana mu kukeba konauna lwitabilo lwa bena Kilishitu?
11 Nangwa byonkabyo, tutwajijila kwikala balaba mambo twayuka’mba, mulwanyi wetu ke Diabola, kabiji kechi ufikenatu kuleka kwitumanyika ne. (Tangai 1 Petelo 5:8.) Waeseka kwingijisha bantu basenduka mu lwitabilo ne bantutu bakwabo kuba’mba betulengele kumona bintu byo twaitabilamo amba bya bubela. Bino uno mungalato wakankalwa. Popamotu, nangwa kimo kimye lumanamo lulengela mwingilo wa kusapwila kubwela panyuma, javula lukosesha lwitabilo lwa boba bo bamanyika. Onkao mambo, Satana watwajijilatu na kwingijisha jishinda jo amona amba jikonauna lwitabilo lwetu. Witulengela kwiumvwa nobe twalefulwa. Bena Kilishitu ba mu myaka kitota kitanshi bebajimwine pa mambo a kulefulwa byo bebabujile’mba: “Langulukai yewa [Kilishitu] wakosejilemo pa kulengululwa ku bandengamambo kwa byonkabyo.” Mambo ka? “Kuchina’mba, mwakakoka ne kupungila mu michima yenu.”—Hebe. 12:3.
12. Lujimuno lwa mu Baibolo lukosesha byepi boba balefulwa?
12 Abya mwiumvwapo kala kukeba kuleka kwingijila Yehoba nyi? Nanchi bimye bimo mwiumvwa amba mwakankalwa nyi? Umvwe ibyo, kange muleke Satana engijishe ino milanguluko kwimulengela amba muleke kwingijila Yehoba ne. Kukosako na kufunda Baibolo, kukelwa mu lulombelo, ne kutanwa kimye kyonse ku kupwila ne kupwanañena pamo na bena Kilishitu bakwenu kukemukosesha ne kwimulengela kubula “kupungila mu michima yenu.” Yehoba walaya kukwasha boba bamwingijila kwikala jibiji na bulume, kabiji byo alaya bikafikizhiwa. (Tangai Isaya 40:30, 31.) Taitu muchima pa kwingila mingilo ya Bufumu. Kange mutenga muchima pa bintu byakonsha kwimulabika ne, anweba taitu muchima pa kukwasha bantu. Kino kikemukosesha ne kuchinchika nangwa kya kuba kuji bintu bilefulañana.—Nga. 6:1, 2.
Kupokololwa mu Malwa ne Kutwela mu Ntanda Ipya
13. Ñanyi mingilo ikengila boba bakapuluka pa Amagedonyi?
13 Panyuma ya Amagedonyi, bantu bavula babula koloka bakasangulwa bakakebewanga kwibafunjisha mashinda a Yehoba. (Byubilo 24:15) Bakakebewanga kufunda pa kitapisho kya bukuzhi bwa kwa Yesu. Kabiji bakafunjishiwa kwikala na lwitabilo mu kitapisho pa kuba’mba bakamwenemo mfweto. Bakakebewanga kukana mafunjisho a bubela o baitabijilemo mu bupopweshi bwa bubela ne kusha bwikalo bwabo bwa kala. Bakafunda bya kuvwala bumuntu bupya buyukanyikisha bena Kilishitu ba kine. (Efi. 4:22-24; Kolo. 3:9, 10) Mikooko ikwabo ikapuluka pa Amagedonyi ikekala na mingilo yavula ya kwingila. Kikekala kimye kya lusekelo kwingijila Yehoba kwa kubula makatazho ajipo mu ino ntanda ibi!
14, 15. Londololai byambo bya kwikosesha bikekala pakachi ka boba bakapuluka pa malwa akatampe ne baoloka bakasangulwa.
14 Bakalume ba kishinka ba Yehoba bafwile Yesu saka akyangye kwiya panopantanda nabo bakafunda bintu byavula bingi. Bakafunda pa kuyukanyikwa kwa Mesiasa walaiwe, ye bapembelejile myaka yavula kwa kubula kumumonapo ne. Byo bakijinga bomi, bepaine abo bene kwibafunjisha kwi Yehoba. Akifwanyikizhai byo kikaletapo lusekelo ne jishuko ja kwibakwasha nabiji kulondolola kwi Danyela byafikizhiwe bungauzhi bo anembele kwa kubula kwibuyuka mo bwatajile ne!—Da. 12:8, 9.
15 Nangwa kya kuba aba bakasangulwa bakafunda bintu byavula kwi atweba, ne atwebatu tukekala na mepuzho avula bingi a kwibepuzha. Baketubula bintu byavula byatongolwa mu Baibolo byabula kulondololwa kya kine. Akilangulukai byo kikaletapo lusekelo kufunda byavula pe Yesu kufuma ku muvyala wanji Yoano Mubatishi! Bintu byo tukafunda ku bano bakamonyi bakishinka kwa kubula nangwa kuzhinaukatu ne biketulengela kumvwisha Mambo a Lesa kukila ne byo twiomvwa luno. Bakalume bakishinka ba Yehoba bafwa, kubikakotu ne boba ba mu jibumba jikatampe babena kufwa mu kino kimye kyapelako bakamona “lusanguko lwakila mu kuwama.” Batendekele kwingijila Yehoba mu ntanda iji mu maboko a Satana. Byo kikebaletelapo lusekelo kutwajijila na kwingila mwingilo wabo mu ntanda ipya!—Hebe. 11:35; 1 Yoa. 5:19.
16. Kwesakana na bungauzhi, Juba ja Kije jikekala byepi?
16 Mu Juba ja Kije, kimye kikafika kyo bakazhikula mabuku. Ano mabuku kubikakotu ne Baibolo o bakachibilangamo bonse bakekala bomi umvwe bakafwainwa kwikala myaka ne myaka. (Tangai Lumwekesho 20:12, 13.) Pa kupwa Juba ja Kije, bantu umo umo bakekala na kimye kya kumwesheshamo lubaji lo bakekalako pa mambo a bumfumu akolomwenwe. Abya muntu umo umo ukakokela Bufumu bwa Lesa ne kutangijilwa na Mwana mukooko ku “masulo atupauka a mema a bumi” nyi? Inyi mukakana kutangijilwa na Bufumu bwa Lesa? (Lum. 7:17; Isa. 65:20) Pa kyokya kimye, bonse bakekala panopantanda bakekala na jishuko ja kwifuukwilapo bene, mambo kechi kukekala bundengamambo nangwa ntanda yatama ne. Kafwako muntu nangwa umo ukazhinauka buchibamambo bukapelako bwa Yehoba ne. Babi bo bonkatu bakepaiwa kikupu.—Lum. 20:14, 15.
17, 18. Bena Kilishitu bashingwa pamo na mikooko ikwabo baji na lusekelo lwa kutengela ka mu Juba ja Kije?
17 Lelo jino bena Kilishitu bashingwa byo batelwa’mba bo bafwainwa kutambula Bufumu, batonga kimye kya kulutwe kyo bakalamanga mu Juba ja Kije. Byo bakekalapo na mashuko! Luno lonka luketekelo lo lwibalengela kulondela lujimuno lwa kwa Petelo lo ajimwine balongo babo bajingako mu myaka kitota kitanshi amba: “Teshaitu muchima kikatampe, namba, Kwitwa kwenu ne kusalululwa kwenu kwikale ke kwa kine kine: mambo umvwe mwauba bino bintu kechi muketuntula ne: Mambo mo monka mo mukapelwa bingi kutwela mu bufumu bwa myaka bwa Nkambo yetu, Mupulushi Yesu Kilishitu.”—2 Pe. 1:10, 11.
18 Ba mu mikooko ikwabo basangalela pamo na balongo babo bashingwa. Bakebesha bingi kwibakwasha. Byo baji balunda nanji Lesa lelo jino, bateshako bingi muchima mu kwingila mwingilo wa Lesa. Mu Juba ja Kije, bakasangalala bingi byo bakatundaikanga na muchima wabo yense lunengezho lwa Lesa, byo bakebatangijilanga kwi Yesu ku masulo atupauka a mema a bumi. Kepo kikapelako bakatelwa’mba bo bafwainwa kwikala bakalume ba Yehoba panopantanda myaka ne myaka!—Loma 8:20, 21; Lum. 21:1-7.
Nanchi Mukivuluka Nyi?
• Nanchi bintu bya kwa Yesu byavwangamo ka?
• Ba mu jibumba jikatampe bakwasha byepi balongo babo bashingwa?
• Ñanyi mashuko ne luketekelo luji na ba mu jibumba jikatampe?
• Nanchi Juba ja Kije jo jika?
[Kipikichala pa peja 25]
Ba mu jibumba jikatampe baovwa bivwalo byabo ne kwibitokesha mu mashi a Mwana mukooko
[Kipikichala pa peja 27]
Bi ka byo mwaketekela kukafunda ku bakalume bakishinka bakasangulwa?