KITANGO 21
Nkebelo ya Yehoba Ikafikizhiwa mu Lukumo
1, 2. (a) Yehoba ukeba bilengwa byanji kwikala byepi? (b) Mu kisemi kya Lesa kya bapopweshi bakwatankana mwajinga ne bañanyi?
NKEBELO ya Yehoba ke ya kuba’mba bilengwa byonse bikwatankene pamo mu kumupopwela aye yenka Lesa wakine kabiji ne kwiyowa bwana bwa bene bwa lukumo lwa baana banji. Ne bantu batemwa bololoke nabo byobyo bakeba.
2 Yehoba watendekele kufikizha ino nkebelo yanji ikatampe kimye kyo atatwile mingilo yanji ya kulenga bilengwa. Kilengwa kitanshi kyoalengele wajinga Mwananji awo kufumatu kimye kyo asangwilwe waikala ke “kusama kwa lukumo lwanji, ye kipasha kya musango wanji.” (Bahebelu 1:1-3) Uno Mwana wajinga wapusanako, mambo ye yenkatu walengelwe kwi mwine Lesa. Bonse bashala balengelwe kupichila mu uno Mwana: kutatwila ku bamalaika mwiulu, apa bino palondela ne bantu panopantanda. (Yoba 38:7; Luka 3:38) Abano bonse balenga kisemi kimo mwiulu ne panopantanda. Kwi abo bonse, Yehoba aye Nkambo Walengele bintu byonse ye wajinga Lesa wabo kabiji ne Shabo.
3. (a) Atweba bonse twaswana ka, ku bansemi yetu batanshi? (b) Ñanyi lunengezho lwa butemwe Yehoba loanengezhejile baana ba kwa Adama?
3 Bansemi yetu batanshi byo bebazhachishijile ku lufu na mambo a kulengelamotu mambo kyanshiji, bebapangile mu Edena ne kwibakana kwi Lesa. Kechi bakijinga kabiji lubaji lwa kisemi kyanji kya panopantanda ne mwiulu ne. (Ntendekelo 3:22-24; Mpitulukilo ya mu mizhilo 32:4, 5) Atweba bonse twi baana babo, onkao mambo twasemwa na bundengamambo. Bino Yehoba wayukile’mba baana bamo ba kwa Adama ne Evwa bakatemwa bololoke. Onkao mambo wanengezhezhe lunengezho lwa kuba’mba abano bakekale ‘na bwana bwa bene bwa lukumo bwa baana ba Lesa.’—Loma 8:20, 21.
Bena Isalela Baleka Kutalwa Bulongo
4. Ñanyi jishuko Yehoba joapele bena Isalela bakala?
4 Byo papichile myaka nobe 2,500 kufuma kimye kyalengelwe Adama, Yehoba wapaine jishuko ku bantu bamo ja kwikala balunda Nanji. Watongwele bena Isalela bakala kwikala bantu banji kabiji wibapele ne Mizhilo yanji. (Ntendekelo 12:1, 2) Wibalengele kwikala ke mukoka ne kwibengijisha kuba nkebelo yanji. (Mpitulukilo ya mu mizhilo 14:1, 2; Isaya 43:1) Bino na mambo akuba bakijinga mu buzha bwa bundengamambo ne lufu, kechi beyowanga bwana bwa bene bwa lukumo bwajingapo na ba Adama ne Evwa ku ntendekelo ne.
5. Nga bena Isalela bataile byepi bulunda bwabo ne Lesa?
5 Bino nangwa byonkabyo, bena Isalela batajilwe bulongo kwi Lesa. Bajinga na mutembo wa kunemeka Yehoba mambo ye wajinga Shabo ne kwingijila mwayila nkebelo yanji. Yesu waambilepo pa buneme bwakwingila uno mutembo yebapewe. (Mateo 5:43-48) Bino mukoka wa bena Isalela wakankelwe kuba kino. Nangwa kyakuba Bayudea baambilenga’mba, “tujitu ne Shetu umo, yenka Lesa,” Yesu waambile’mba byubilo byabo ne ndangulukilo yabo byajingatu kungi. (Yoano 8:41, 44, 47) Mu 33 C.E., Lesa wafumishepo Mizhilo, kabiji bulunda bwa bena Isalela ne aye bwapwile. Nanchi kino kyalumbulwilenga’mba kyapwa bantu kechi bakekalapo jibiji balunda ne Lesa nenyi?
Kukonkanya “[Bintu Bya, NW] Mwiulu”
6. Ñanyi nkebelo ya “bukalama” Paulo yoatongwelepo mu Efisesa 1:9, 10?
6 Mutumwa Paulo walondolwele’mba bantu bamo bakekala na bulunda bwiikajila na Lesa. Kyakumwenako, kwesakana na lunengezho lwa Yehoba lwa kuba’mba aba baitabila bekale ba mu nzubo Yanji, Paulo wanembele’mba: “[Lesa] witusolwejile akya kyafyamika kya ku muchima wanji, monka mwayila akya kyamutokela ku muchima kyo afukwijile jimo mwi Kilishitu amba, nkekajike bukalama bwa pa byonse mwi Kilishitu, ne [bintu bya, NW] mwiulu, ne [bintu bya, NW] panopantanda.” (Efisesa 1:9, 10) Buno “bukalama” buji ne Yesu Kilishitu. Kupichila mwi aye, bantu mo mo balumbulukila kwi Lesa. Bantutu bacheche bobaji na luketekelo lwa kwikala mwiulu. Bavula bakekala panopantanda myaka ne myaka.
7. “[Bintu bya, NW] mwiulu” bo bañanyi?
7 Patanshi, kutatula pa Pentekosta mu 33 C.E., kwajinga kukonkanya ‘bintu bya mwiulu,’ ko kuba’mba, aba bakekala banswanyi pamo ne Kilishitu mu Bufumu bwa mwiulu. Na mambo a lwitabilo lwabo mu kitapisho kyanema kya Yesu, Lesa wibatelele’mba baoloka. (Loma 5:1, 2) Mu kupita kwa kimye, Bayudea ne Bagentila nabo bavwangiwemo, onkao mambo kibelengelo kya [bintu bya] mwiulu” kyafika ke 144,000. (Ngalatiya 3:26-29; Lumwekesho 14:1) Bacheche bamwiabo bo bakiji panopantanda.
Kukonkanya “[Bintu bya, NW] Panopantanda”
8. “[Bintu bya, NW] panopantanda” bo bañanyi, kabiji ñanyi bulunda bobaji nabo na Yehoba?
8 Kabiji bukalama buntutu bumo bubena kukonkanya ne ‘bintu bya panopantanda.’ Bantu bavula babena kukonkanyiwa kuba’mba bakekale myaka ne myaka panopantanda. Byo bakwatankana na banswanyi bashalapo ba mu Bufumu, banemeka jizhina ja Yehoba ne kutumbijika mpopwelo yanji. (Isaya 2:2, 3; Zefwaniya 3:9) Bamwita Yehoba amba ye “Tata” mambo bamuyuka’mba ye nsulo ya bumi. Kabiji na mambo a lwitabilo lwabo mu kitapisho kya mashi a kwa Yesu aichikile, wibatala bulongo. (Lumwekesho 7:9, 14) Pano bino byo bakiji bambulwakoloka, bakatelwa’mba baana ba Lesa kulutwe na lwendo.
9. Mulaye ka walailwa bantu uji mu Loma 8:21?
9 Aba baji na luketekelo lwa kwikala panopantanda babena kupembelela kimye bilengwa byonse kyo ‘bikapokololwa ku buzha bwa bubole.’ (Loma 8:21) Kuno kupokololwa kukatatula panyuma yakuba Kilishitu ne nzhita yanji ya mwiulu bapwisha kala malwa akatampe pa Amagedonyi. Kino kikalumbulula konaunwa kwa bwikalo bubi bonse bwa kwa Satana, apa bino pakalondele bintu byawama bikekala mu Bukalama bwa Myaka Kiumbi Kimo mu Bufumu.—Lumwekesho 19:17-21; 20:6.
10. Ñanyi lwimbo wa lutotelo bakalume ba Yehoba ye bakemba?
10 Byo kikaletapo lusekelo kimye bakalume ba Yehoba panopantanda byo bakakwatankana kwimbila pamo lwimbo wimbapo bakalume banji ba mwiulu, amba: “Anweba Nkambo Lesa, Wa bulume bonse, mingilo yenu yo ikatampe ne ya kukumya; ne anweba Mfumu wa myaka mashinda enu aoloka ne a kine. Nkambo, ñanyi ukabula kwakamwa ne kutumbijika jizhina jenu? mambo anweba yenka mwazhila; mambo mikoka yonse ya bantu ikeya ne kupopwela ku meso enu; mambo byubilo byenu byaoloka byamweka.” (Lumwekesho 15:3, 4) Ee kine, bakalume bonse ba kwa Yehoba bakakwatankena pamo na kupopwela Lesa yenka wakine. Ne bafu nabo bakasangulwa ne kupewa jishuko ja kwimbila pamo kutota Yehoba.—Byubilo 24:15.
Bwana bwa Bene Bwawamisha Buji Kulutwe
11. Ñanyi bwana bwa bene bwawamisha bukeyowa boba bakapuluka malwa akatampe?
11 Malwa akatampe byoakapwa pa Amagedonyi, ne kufumyapo bubi panopantanda, Satana Diabola kechi ukekala “lesa wa panopantanda” ne. Bapopweshi ba Yehoba kechi bakalwañananga na byubilo byatama bya kwa Satana ne. (2 Kolinda 4:4; Lumwekesho 20:1, 2) Bupopweshi bwa bubela kechi bukekalako na kumubepela Yehoba sabulengela bantu kwipatula ne kwikala balwanyi na mulwanyi ne. Kabiji bakalume ba Lesa wakine kechi bakebafwilanga nshiji ne kwibajila makusu pa mitwe ku makafulumende a bantu ne. Buno bwana bwa bene kine bukawama bingi!
12. Bantu bonse bakapokololwa byepi ku bundengamambo ne byonse bifumamo?
12 Yesu byoaji ‘Mwana mukooko wa Lesa, ufumya bundengamambo bwa ba panopantanda,’ ukengijisha kitapisho kyanji kufumyapo bundengamambo bwa bantu. (Yoano 1:29) Yesu byoajinga panopantanda ne kulekelako muntu mambo, wa bukilenga yewo muntu kumwesha’mba kine wamulekelako mambo anji. (Mateo 9:1-7; 15:30, 31) Byonkabyo, Kilishitu Yesu byoaji Mfumu wa mu Bufumu bwa Lesa mwiulu, ukabuka bampofu mu jishinda jakukumya, ba kamama, bashinka matwi, bilema, bavulañana mu milanguluko, ne boba bakolwa bikola byashala. (Lumwekesho 21:3, 4) “Muzhilo wa bundengamambo” ukafumishiwapo pa bantu bonse balukokelo kuba’mba milanguluko ne byubilo byabo bikekale byawama, kwi abo bene ne kwi Lesa. (Loma 7:21-23) Ku mpelo ya Myaka Kiumbi Kimo, bakekala balumbuluka, mu ‘kipasha kya’ Lesa yenka wakine.—Ntendekelo 1:26.
13. Ku mpelo ya Bukalama bwa Myaka Kiumbi Kimo, Yesu ukobapo ka, kabiji kika kikafumamo?
13 Yesu byoakakwasha bantu kwikala balumbuluka, ukabwezha kwi Shanji lūsa lo amupele lwa kwingila uno mwingilo: ‘Ukafikizha bufumu kuji Shanji, byo akapwisha kuvulañanya bufumu bonse, ne lūsa lonse, ne bulume bonse. Mambo kyafwainwa aye ekale mfumu, poso akanyanchijile balwanyi banji bonse.’ (1 Kolinda 15:24, 25) Bukalama bwa Bufumu bwa Myaka Kiumbi Kimo bukengila nkebelo yabo yonse; onkao mambo kechi kukakebewanga jibiji kafulumende wa bubiji pakachi ka Yehoba ne bantu ne. Kabiji bundengamambo ne lufu byo bikafumishiwapo ne bantu bakuulwa, Yesu kechi ukakebewanga kwikala Mukuzhi ne. Baibolo ilondolola’mba: “Kabiji byonse byo bikakokeshiwa kwi aye, ponkapo ne aye Mwana naye ukakokela yewa wamukokeshesha byonse, amba Lesa ekale byonse mu byonse.”—1 Kolinda 15:28.
14. Bantu bonse balumbuluka bakebaleka kuba’mba be bobe byepi, kabiji mambo ka?
14 Panyuma ya kino, bantu baoloka bakapewa kimye kya kumwesheshamo kuba’mba abo basalapo kwingijila Lesa yenka wakine myaka ne myaka. Onkao mambo, saakyangye kwibatongola’mba baana banji, Yehoba ukebaleka aba bonse baoloka kuba’mba bakesekwe japelako. Satana ne bademona banji bakakasululwa mu kalengwa kabula kupela. Aba bamutemwa Yehoba kyakine kechi kikebakatazha ne. Bino aba bakabula kumukokela Yehoba bakonawinwa pamo na nsatuki mutanshi ne bademona banji.—Lumwekesho 20:7-10.
15. Ñanyi bwikalo bukekalako jibiji ku bilengwa byonse bya Yehoba?
15 Kepo bino Yehoba akebatambule amba pano ke baana banji aba bonse balumbuluka bakatumbijika bumfumu bwa Lesa mu lweseko lukapelako. Kufumatu kyokya kimye kuya ne kulutwe, bakeyowa bwana bwa bene bwa lukumo bwa baana ba Lesa kwikala ba mu kisemi kyanji kimotu panopantanda ne mwiulu. Bilengwa byonse bya mupashi mwiulu ne bantu panopantanda bikakwatankana jibiji na kupopwela Lesa umo yenka wakine. Nkebelo ya Yehoba ya lukumo popo ikafikizhiwa! Nanchi mukeba kwikala lubaji lwa kyokya kisemi kya lusekelo kya bilengwa bya mwiulu ne panopantanda kikekala myaka ne myaka nyi? Umvwe byo byo mukeba, tubena kwimukosesha kumvwina Baibolo byo yaamba mu 1 Yoano 2:17 amba: “Panopantanda pakapita ne lwiso lwapo: pakuba aye uba kyaswa muchima wa Lesa ukekala myaka ne myaka.”
Mepuzho Akupitulukamo
• Bunsatuki mu Edena saka bukyangye kubiwa, nga bapopweshi bonse ba Yehoba bajinga na bulunda bwa mutundu ka ne aye?
• Ñanyi mutembo ukiji na bakalume ba Lesa?
• Bañanyi bakekala baana ba Lesa, kabiji kino kiji byepi na mwayila nkebelo ya Yehoba pa mambo a kukwatankena pamo mu kumupopwela?
[Kipikichala pa peja 190]
Bantu balukokelo bakeyowa bwikalo mu paladisa ntanda yonse