Fumai Mubupopweshi Bwabubela Nekuya Mubupopweshi Bwakine

1. Kwesakana namwayila mpopwelo, bantu lelo jino basalapo kubaka?

¹ YESU waambile’mba: “Awa wabula wa kwami, ye mulwanyi wami.” (Mateo 12:30) Twakonsha kwikala kulubaji lwa Yehoba nangwa kulubaji lwa Satana. Bantu bavula balanguluka’mba bapopwela Lesa mujishinda jaitabilwa, bino Baibolo yamba’mba Satana ye “mujimbijimbi wa panopantanda ponse.” (Lumwekesho 12:9) Bavula baitabila’mba bapopwela Lesa, bino sabengijila Satana Diabola! Lelo jino, bantu besajilapo abo bene: Kana kwingijila Yehoba, “Lesa wa bukine,” nangwa Satana, “shanja bubela.”—Masalamo 31:5; Yoano 8:44.

Fumaimo Mubupopweshi Bwabubela

2. Jishindaka jimo Satana joakanyishilamo bantu kupopwela Yehoba?

² Kwifuukwila kwingijila Yehoba kokusalapo kwamaana, kabiji kwaitabilwa kwi Lesa. Pano bino Satana kechi utemwa boba bengijila Lesa ne; wibaletela byamalwa nemakatazho. Jishinda jimo joobilamo bino kejakwendeleka bantu nekwibamanyika kubalunda nabo nangwatu balongo babo mukisemi. Yesu wajimwine’mba: “Balwanyi ba muntu bakekala ba mu kisaka kyanji mwine.”—Mateo 10:36.

3. Umvwe kisemi kyenu nangwa bakwenu bemulengulula pakupopwela Lesa wenu, mukobapoka?

³ Umvwe nenuwa kimumwekela, mukobapoka? Bantu bavula bayuka kuba’mba bupopweshi bwabo bwatama, pano kechi bafumamone. Balanguluka’mba kuba kino kechi kukamwesha bukishinka kubamukisemi kyabone. Nanchi byoibyonyi? Umvwe mwayuka’mba balongo benu babena kwingijisha bizhima, nanchi kuba mwibajimunako kuba’mba bizhima bisakukebonauna nenyi? Abya neanweba mukatatula kwingijisha bino bizhimanyi, inyi ne?

4. Ñanyi byambo Yoshua byoaambijile bena Isalela pamambo ampopwelo yajingako mumoba anji?

⁴ Yoshua wajimwineko bena Isalela kwikileka kuba bintu byatama byamubupopweshi nebisho byaubanga bashakulu babo. Waambile’mba: “Pano akamwai Yehoba, ne kumwingijila na michima yabula bujimbijimbi, ne na michima yakishinka; tayai balesa bo baingijilenga bashakulu benu bushiya bwa mukola wa Ufelata ne mu ntanda ya Ijipita, mumwingijilenga Yehoba.” (Yoshua 24:14) Yoshua wajinga nabukishinka kwi Lesa, ne Yehoba wamushukishe. Umvwe twaikala bakishinka kwi Yehoba, netuwa usakuketupesha.—2 Samwela 22:26.

Tayai Byonse Bingijishiwa mu Bupopweshi Bwabubela

5. Mamboka otwafwainwa kutaila byonse byabulozhi?

⁵ Kufuma mubupopweshi bwabubela nako kulumbulula konauna byonse byabulozhi umvwe tuji nabyo, nabiji mizhazhi, kuvwala mibela, bizhimba, nebintutu byapasha bino. Kino kyanema mambo kilumbulula’mba twaketekela mwi Yehoba.

6. Ikika bena Kilishitu batanshi kyobaubile namabuku abo amanga?

⁶ Akilangulukai byaubile bena Kilishitu bamo batanshi kimye kyobafuukwile kupwila mubupopweshi bwakine. Baibolo yamba’mba: “Bakwabo nabo bavula baubilenga bya buñanga, baletelenga mabuku abo, beapwizha pamo ne kwiasoka mu mujilo ku meso a bonse.”—Byubilo 19:19.

7. Twafwainwa kuba byepi umvwe bademona kebetukabishe?

⁷ Bamo baleka bulozhi nemanga nekutatula kwingijila Yehoba kimo kimye bakonsha kwibalukuka kubademona. Umvwe akyo kimumwekela, lombai kwi Yehoba, mujizhina janji. Neaye ukemukwasha.—Byambo bya Mana 18:10; Yakoba 4:7.

8. Bena Kilishitu bamona byepi bankishi, bipashañano nebipikichala bingijishiwa mubupopweshi bwabubela?

⁸ Aba bakeba kumwingijila Yehoba kechi bafwainwa kwikala nangwa kwingijisha nkishi, kipashañano, nangwa kipikichala kingijishiwa mubupopweshi bwabubelane. Bena Kilishitu bakine ‘benda mu lwitabilo, kechi mu kumona nameso ne.’ (2 Kolinda 5:7) Banemeka mizhilo ya Lesa ikanya kwingijisha kipashañano kiji kyonse mumpopwelo.—Kulupuka 20:4, 5.

Pwañanainga Nabantu ba Yehoba

9. Ñanyi lujimuno lupana Baibolo pamambo akwikala bamaana?

⁹ Baibolo yamba’mba: ‘Awa wenda na ba maana ukekala ke wa maana.’ (Byambo bya Mana 13:20) Umvwe tukeba kwikala bamaana, twafwainwa kwenda, nekupwañana, na Bakamonyi bakwa Yehoba. Ke bantu babena kwenda mujishinda jaya kubumi.—Mateo 7:14.

10. Bakamonyi bakwa Yehoba bakonsha kwimukwasha byepi kwingijila Lesa?

¹⁰ Bakamonyi kine bakwasha bakwabo bantu. Mu mwingilo wabo bafunjisha bantu bakoka michima kuyuka bukine bwamu Baibolo butangijila kubumi bwamyaka. Bakonsha kwimukwasha kupichila mukwimufunjisha Baibolo, kwakubula kwimulipilisha. Bakakumbula mepuzho enu nekwimukwasha byakwingijisha maana amu Baibolo mubwikalo bwenu.—Yoano 17:3.

11. Kukemukwasha byepi kupwila kwabwina Kilishitu?

¹¹ Kukupwila kwabo, kubiwa javula pa Nzubo ya Bufumu, mukafunda byavula pamambo a byubilo bya Yehoba. Bakemukosesha kukosela mubupopweshi bwakine. Kabiji nenuwa bakemufunjisha byomwakonsha kukwasha bantu bakwabo kufunda bukine bwamu Baibolo.—Bahebelu 10:24, 25.

12. Lulombelo lwakonsha kwimukwasha byepi kwingijila Lesa?

¹² Byomukatwajijila kufunda kyaswa muchima nenkebelo ya Yehoba, pomukayukisha byubilo byanji bya butemwe. Mukailako palutwe mukukebesha kwenu kwakumutokesha pamuchima nekuchinuzhuka bintu bimufichisha pamuchima. Vulukai kuba’mba mwakonsha kumusolomoka Yehoba mumilombelo yenu kuba’mba emukwashe kuba byawama nekuchina kuba byatama.—1 Kolinda 6:9, 10; Filipai 4:6.

13. Mwakonsha kusangajika byepi muchima wa Yehoba?

¹³ Mukuya kwamoba, byomukakomenangako kumupashi, kwakubula nangwa kuzhinaukatune mukakeba kwipana, kwikala Kamonyi wabatizwa wakwa Yehoba. Pakwikala mujibumba jabantu ba Yehoba, mukasangajika muchima wa Yehoba. (Byambo bya Mana 27:11) Mukekala nabantu balusekelo monka mwaambila Lesa amba: “Amiwa nkekala mwiabo, ne kwenda mwi abo; kabiji nkekala ke Lesa wabo, ne abo nabo bakekala ke bantu bami.”—2 Kolinda 6:16.