LUFUNJISHO 7
Bañanyi Nanchi Baya Mubupopweshi Bwakine?
1. Twafwainwa kuba byepi pakuba’mba tutokeshe Lesa pamuchima?
PA KUBA’MBA twiyowe bulunda bwawama na Lesa, kechi twafwainwa kwivwanga mubupopweshi bwabubelane. Twafwainwa kuyanga mubupopweshi bwakine. Bantu bavula lelo jino mwaya ntanda yonse byobyo babena kuba.
2. Kwepi kwafwainwa kutanyiwa Bakamonyi bakwa Yehoba, kabiji ñanyi mwingilo yebabena kwingila?
2 Byonka byaambijile jimo Baibolo, bapopweshi bakine baikala ke “jibumba jikatampe” bafuma “mu mikoka yonse ne mu bisaka byonse ne mu mitundu yonse ne njimi yonse.” (Lumwekesho 7:9) Mubyalo 235, mamilyonyi a Bakamonyi bakwa Yehoba bapayankana mukufunjisha bantu mashinda abutemwe nebikeba Yehoba.
Kuyuka Bapopweshi Bakine
3. Ñanyitu bunke Bakamonyi bakwa Yehoba yebapopwela, kabiji bintuka byabupopweshi byobakana?
3 Bakamonyi bayuka kuba’mba Yehoba bunketu yebafwainwa kupopwela. Kechi bafukamina bankishi nangwa bipikichala byabupopweshine. (1 Yoano 5:21) Kechi bapana mushingi wabula kufwainwa kubafwa, nakukisha pabijilo, nangwa kwivwanga mubisho bikwabo bitundaika bupopweshi bwabubela ne “mafunjisho a bademona” ne. (1 Timoti 4:1) Bino batekenesha bonse bafwilwa mukwibalumbulwila mulaye wa Lesa wakuba’mba kukekala lusanguko lwabafwa mupaladisa panopantanda.—Yoano 5:28, 29; Byubilo 24:15.
4. Bantu ba Lesa bakana byepi manga?
4 Bakamonyi kechi bapanda manga nangwa kukeba bulozhine, bayuka kuba’mba bino bintu bifuma kwi Diabola. Kechi baketekela mubwanga amba bwibazhikijilengane—baketekelatu monka mwi Yehoba.—Byambo bya Mana 18:10.
5. Muñanyi jishinda Bakamonyi bakwa Yehoba mobabula kwikela “ba panopantanda”?
5 Yesu waambile’mba baanabanji babwanga kechi “bo ba panopantanda ne.” (Yoano 17:16) Yesu aye mwine wakaine kwivwanga mubyabumulwila ntanda byajingako mumoba anji. (Yoano 6:15) Kyokimotu, Bakamonyi nabo kechi bevwanga mubyabumulwila ntanda, nemisalululo yamuino ntandane. Pano bino, bapana misonko nekukokela mizhilo yakumpunzha kobekela.—Yoano 15:19; Loma 13:1, 7.
6. Ñanyi mizhilo bakalume ba Lesa yobalondela mumasongola nekwikana?
6 Mambo akuba bakokela mizhilo ya kafulumende, Bakamonyi banembesha masongola abo. (Titusa 3:1) Bakokela mizhilo ya Lesa, nemujojo jishinda kechi basongola mpajine. (1 Timoti 3:2) Kabiji, namambo akuba bakalume ba Lesa balondela mafunde amu Baibolo mubwikalo bwabo, kechi batemwa kupwishatu byonkabyo masongola abone.
7. Bakamonyi betemwa byepi bene nabene?
7 Bakamonyi betemwa bene nabene. Buno butemwe, pamo nekutemwa Lesa, bwibakwatankanya pamo mubwanabwankazhi bwakine bwantanda yonse, nangwa kyakuba bafuma mubisaka nemitundu yabantu bavula. Umvwe malwa ebafikila nangwa mukimye kyakukajilwa, Bakamonyi bukiji-bukiji bekwasha bene nabene. Bakamonyi bamwesha butemwe mubwikalo bwabo bobekelamo.—Yoano 13:35.
Bakamonyi ba kwa Yehoba bakwatankana pamo mwaya ntanda
8. Ñanyi bintu byatama bantu ba Lesa byobakana?
8 Bantu ba Yehoba bebikishako kwikala bakishinka kabiji babula kaneneno mubwikalo bwabo. Kechi beba, kubepa, kuba byubilo byabunya, kupendwapendwa, nekujimbañana mubyabusulune. Balume kechi bapuma bakazhi babone. Bamo bajinga nabyubilo byauno mutundu sabakyangye kwikala Bakamonyi, pano namambo abukwasho bwa Yehoba bebileka. Kumeso a Lesa, ‘baovwewa.’—1 Kolinda 6:9-11.
Bakwioba Mambo a Lesa
9. Buku umo waambapo’mbaka pamambo a machechi abena Kilishitu akina Africa?
9 Kyakine, bupopweshi bwavula bwamba kuba’mba buji nabukine. Batongola bintu bimo byoboba bikebula bantu kukosesha kishinka kyabo. Kyakumwenako, kwesakana naatelwa’mba machechi abena Kilishitu akina Africa, buku umo wamba’mba: “Mwingilo wabalozhi nangwa waboba bapana muchi waaluka pano kewa [bipanyi byabena Kilishitu bakatataka]. . . . Bakeba kwambatu pakanwa nekumwesha byakukumya. Bangauzhi baji mukachi kabo bamona bimwesho nekulotolola biloto. Bengijisha mema azhila, maanyi azhila, buto, kandulu nebyakufutumuna byakwibukilako nekwivimbila kubikola.”
10, 11. Mamboka byakukumya lelo jino kyobibujila kumwesha’mba bupopweshi bwafuma kwi Lesa?
10 Bantu bamubuno bupopweshi balanguluka’mba bimwesho byoboba bilumbulula’mba Lesa upesha bupopweshi bwabo. Bino byonka bitelwa’mba byakukumya kechi bimwesha kuba’mba bupopweshi bwaitabilwa kwi Yehoba ne. Satana upana ngovu kubapopweshi babubela kuba’mba bamweshenga ‘mingilo yakukumya.’ (2 Tesalonika 2:9, NW) Nekikwabo, Baibolo yaambijile jimo kuba’mba byabupe kufuma kwi Lesa byakumwesha byakukumya, biji nobe kwaula, kwambila munjimi, nekwikala namaana eikajila, “bikapita.”—1 Kolinda 13:8.
11 Yesu waambile’mba: “Kechi bonse bañambila’mba, Nkambo! Nkambo! bakatwela mu bufumu bwa mwiulu ne; poso awa uba kyaswa muchima wa Tata wa mwiulu. Mu aja juba bavula bakañambila’mba, Nkambo! Nkambo! kechi twaawilenga na mupashi mu jizhina jenu nenyi? ne mujizhina jenu kechi twapangijilengamo bademona nenyi? kabiji kechi twaubijilengamo mingilo ya bulume yavula mu jizhina jenu nenyi? Ponkapo nkebambila namba, kechi nemuyukilepo ne: mfumai anweba ba kuba bibi.”—Mateo 7:21-23.
12. Bañanyi bakatwela mu Bufumu bwa mwiulu?
12 Bañanyi nanchi, bakatwela mu Bufumu bwa mwiulu? Keboba bonka boba kyaswa muchima wa Yehoba.
Bafunjishi ba Bufumu bwa Lesa
13. Lesa wapana mwingiloka kubantu banji ano moba, kabiji bañanyi babena kumwingila?
13 Ñanyi mwingilo wa Lesa uji nabantu banji lelo jino? Yesu waambile’mba: “Ano mambo awama a bufumu akasapwilwa panopantanda ponse mwa kwibashimwina ba mu mikoka yonse ya bantu.” (Mateo 24:14) Uno yemwingilo Bakamonyi bakwa Yehoba yebabena kwingila mukupayankana.
14. Bufumu bwa Lesa bobuka, kabiji bañanyi bakekala bakalama mu Bufumu?
14 Kuzhokoloka “mwaya ntanda yonse” Bakamonyi bakwa Yehoba basapwila mambo a Bufumu bwa Lesa, kafulumende wa mwiulu ukalama ntanda yonse mubololoke. Bafunjisha kuba’mba Yehoba watongola Yesu Kilishitu kwikala Mfumu wamubobwa Bufumu pamo naba 144,000 bakalama basalwa kufuma mubantu.—Danyela 7:14, 18; Lumwekesho 14:1, 4.
15. Bufumu bukonauna bintuka?
15 Bakamonyi bengijisha Baibolo kufunjisha bantu kuba’mba Bufumu bwa Lesa bukonauna bukalama bonse bwakwa Satana. Bupopweshi bonse bwabubela bukonaunwa nemafunjisho abo abula kunemeka Lesa bino atumbijika Diabola! (Lumwekesho 18:8) Kabiji nemakafulumende onse alwañana na Lesa akonaunwatu shata!—Danyela 2:44.
16. Bañanyi bakalamwanga kwi Kilishitu Yesu, kabiji kwepi kobakekala?
16 Kunungapo, Bakamonyi bakwa Yehoba bafunjisha kuba’mba Yesu Kilishitu ukaleta mfweto kubonse boba kyaswa muchima wa Lesa boakalama panopantanda. Baibolo yalaya’mba: ‘Ukamupokolola wakajilwa pa kujila, ne aye mulanda wabulwa ne wa kumukwasha. Ukebobila lusa bayanji ne bakajilwa, ne myeo ya bakajilwa ukeipulusha.’—Masalamo 72:12, 13.
17. Bañanyi bunketu babena kusapwila Bufumu bwa Lesa?
17 Kafwako jibumba jikwabo jabantu boba kyaswa muchima wa Lesa basapwila mambo awama a Bufumu ne. Bakamonyi bakwa Yehoba bunketu bobabena kuyukanyikisha Bufumu bwa Lesa mwaya ntanda yonse.