Kitango 12

Yesu Witufunjisha Bya Kulomba

NANCHI wamba ne Yehoba Lesa nyi?— Lesa ukeba’mba wambenga nanji. Umvwe ke wambe ne Lesa, kino kitelwa’mba lulombelo. Yesu javula waambanga ne Shanji wa mwiulu. Kimye kimo pa kwamba na Lesa wakebanga kwikala kwa bunke bwanji. Baibolo waamba’mba, kimye kimo, “Wakanjijile pa mutumba pa bunke, amba nkalombelepo: kabiji juba pa kufika ke mabanga, wajingatu konka bunke bwanji.”—Mateo 14:23.

Kwepi ko wakonsha kuya kwa bunke bobe na kulomba kwi Yehoba?— Kimye kimo wakonsha kwikala bunke bobe pa kulomba kwi Yehoba saka ukyangye kulaala. Yesu waambile’mba: “Pa kulomba, utwele mu kazubo kobe ka mukachi, ne pa kushinka kibelo, ulombe kwi Shobe.” (Mateo 6:6) Nanchi ulomba kwi Yehoba kimye kyonse saka ukyangye kulaala nyi?— Wafwainwa kubanga bino.

Kabiji Yesu walombanga umvwe paji ne bantu bakwabo. Kimye mulunda nanji Lazalasa kyo afwile, Yesu walombele saka aji na bantu bakwabo ku kilende kya kwa Lazalasa. (Yoano 11:41, 42) Kabiji Yesu walombanga kimye kyo bapwilanga pamo na baana banji ba bwanga. Nanchi utanwa ku kupwila nyi?— Ku kipwilo kimye kyonse kwikala lulombelo lulombwa na mukulumpe. Wafwainwa kutelekesha byo abena kwamba mambo ubena ku kwimenako kwi Lesa. Umvwe wapwisha kulomba, obewa wafwainwa kwamba’mba “Amena.” Wayuka byo kilumbulula kwamba’mba “Amena” pa kupwisha kulomba nyi?— Kilumbulula’mba waitabizha byalombewa kabiji ne obewa byo bintutu bimo byo ubakebenga kulomba.

Kabiji Yesu walombanga ne pa kuja. Wasanchilanga Yehoba pa kumupa kajo. Nanchi ulomba kimye kyonse pa kuja nyi?— Kyawama bingi kumusanchila Yehoba pa bya kuja byo etupa saka tukyangye kutendeka kuja ne. Umo wakonsha kulomba umvwe mukeba kujiila nanji pamo kya kuja. Pano ibyepi umvwe ubena kujatu bunke? Nangwa wakonsha kuba byepi umvwe ubena kuja na bantu babula kupopwela Yehoba?— Wafwainwa kulomba obe mwine.

Nanchi kimye kyonse wafwainwatu kulomba ne jiwi kasa jumvwanyika nyi? Abya Yehoba wakonsha kumvwa lulombelo lobe lwa mu muchima nyi?— Aki twaya tumone byo kyajinga kwi Nehemiya. Wajinga mupopweshi wa Yehoba waingilanga ku jilapa ja Mfumu Atazakeshi wa ku Pelisha. Juba jimo, Nehemiya wajinga bingi na bulanda mambo waumvwine’mba nsakwa ya Yelusalema, muzhi mukatampe wa bantu banji, yaonaika.

Mfumu byo amwipwizhe Nehemiya ene mambo o aikejile na bulanda, patanshi Nehemiya walombele mu muchima. Pa kupwisha, Nehemiya wabujile mfumu ene mambo o aikejile na bulanda, kabiji wamulombele amba umvwe kyakonsheka aye ku Yelusalema na kushimukulula nsakwa. Ki ka kyamwekele?—

Lesa wakumbwile lulombelo lwa kwa Nehemiya. Mfumu wamupele lūsa amba ayenga! Kabiji mfumu wamupele Nehemiya bichi byavula bya kwingijisha pa kushimika nsakwa. Onkao mambo Lesa wakonsha kukumbula milombelo yetu, nangwatu milombelo ya kulombela mu muchima.—Nehemiya 1:2, 3; 2:4-8.

Pano akilangulukapo pa kino. Nanchi wafwainwa kukunyika kilungi pa kulomba nyi? Nanchi wafwainwa kufukama nyi? Usa kwambapo’mba ka?— Kimye kimo Yesu wafukamanga pa kulomba. Bimye bikwabo walombanga saka aimana. Kabiji bimye bimo pa kulomba wainunanga mutwe ne kutala mwiulu, byonka byo aubile pa kulombelako Lazalasa.

Nanchi kino kimwesha ka?— Ee, kino kimwesha’mba wakonsha kulombatu mu jishinda jiji jonse. Kimye kimo kyawama bingi kukunyika kilungi kyobe ne kuzhinzhibala. Kabiji kampe wakonsha kufukama byonka byaubile Yesu. Pano bino, vuluka kuba’mba, twakonsha kulomba kwi Lesa pa kimye kiji kyonse mute nangwa bufuku, kabiji aye witumvwa. Lulombelo lwanema bingi, mambo tuketekela kuba’mba Yehoba ubena kwitumvwa. Nanchi wayuka’mba Yehoba umvwa milombelo yobe nyi?—

Bi ka byo twakonsha kwambapo mu milombelo yetu kwi Yehoba?— Aki mbule: Kimye kyo ulomba, bi ka byo wamba kwi Lesa?— Yehoba witupa bintu byavula bingi byawama, onkao mambo twafwainwa kumusanchila, ke ibyo nenyi?— Twakonsha kumusanchila pa kajo ko etupa. Nanchi wakimusanchilapo kala pa kulenga jiulu, bichi, ne maluba nyi?— Lesa ye walengele bino byonse.

Baana ba bwanga ba kwa Yesu bamwipwizhe’mba ebafunjishe bya kulomba. Mufunjishi Wayukisha wibafunjishe, kabiji wibabujile bintu byanema bingi byo bakonsheshe kulomba. Nanchi wibiyuka bino bintu nyi?— Zhikula Baibolo wobe pa Mateo kitango 6. Pa byepelo 9 kufika pa 13, paji byambo bitela bavula amba Lulombelo lwa Nkambo. Twaya tutange bino byambo.

Mu bino byambo Yesu witufunjisha bya kulomba pa jizhina ja Lesa. Waambile’mba kasa mulomba’mba jizhina ja Lesa jizhile. Lesa ñanyi jizhina?— Ee, jizhina janji ke Yehoba, kabiji twafwainwa kwijitemwa.

Kya bubiji, Yesu witufunjishe kulomba’mba Bufumu bwa Lesa bufike. Buno Bufumu bwanema bingi mambo bukaleta mutende panopantanda kabiji ne kwiilenga kwikala ke paladisa.

Kya busatu, Mufunjishi Wayukisha waambile’mba kasa tulomba’mba kyaswa muchima wa Lesa kyubiwe pano panshi byonka byo kyubiwa mwiulu. Umvwe twalomba bino, twafwainwa kuba bintu bikeba Lesa.

Kikwabo, Yesu witufunjishe kulomba kajo ka pa juba pa juba. Kabiji waambile’mba umvwe twauba bintu byatama twafwainwa kumubula Lesa amba twatamisha. Kabiji twafwainwa kulomba kwi Lesa amba etulekeleko mambo. Bino saka akyangye kuba bino, twafwainwa kulekelako bakwetu umvwe betulenga mambo. Nanchi wakonsha kuba bino nyi?—

Kyapelako, Yesu waambile’mba, twafwainwa kulomba’mba Yehoba Lesa etuzhikijile kwi aye mubi, Satana Diabola. Bino byonse byo bintu byo twafwainwa kulomba kwi Lesa.

Twafwainwa kuketekela’mba Yehoba umvwa milombelo yetu. Kabiji twafwainwa ne kumusanchilanga. Aye umvwa bingi bulongo umvwe ke tube bintu byo tumulomba kabiji umvwe twamulomba bintu byawama. Kabiji uketupa bino bintu. Abya waitaba kino nyi?—

Lufunjisho lukwabo lwaamba pa lulombelo luji pa Loma 12:12; 1 Petelo 3:12; ne 1 Yoano 5:14.

[Bipikichala pa jipa 67]

Yesu walombanga umvwe uji bunke kabiji walombanga nangwatu umvwe uji na bakwabo

[Kipikichala pa jipa 68]

Mambo ka o wafwainwa kutelekesha ku milombelo ilombwa kimye kya kupwila?

[Bipikichala pa jipa 69]

Kimye ka kyo wakonsha kulombela mu muchima, byonka byaubile Nehemiya?

[Kipikichala pa jipa 70]

Bi ka byo wakonsha kubula Lesa mu lulombelo?