Kitango 16

Ki Ka Kyanema?

JUBA jimo muntu umo waile kwi Yesu. Wayukile’mba Yesu uji bingi na maana, kabiji wamwambijile’mba: ‘Mufunjishi, ambilai mulongo wami angabanyeko bintu bimo byo aji nabyo.’ Uno muntu wakebelenga amba ekalepo na bintu bimo bya mulongo wanji.

Umvwe yobe wajinga Yesu, inge waambilepo’mba ka?— Yesu wayukile amba uno muntu uji na lukatazho. Bino lukatazho kechi lwajinga lwa kukeba bintu byajinga na mulongo wanji ne. Uno muntu wajinga na lukatazho mambo kechi wayukile kintu kyanema mu bwikalo ne.

Tukilangulukepo bulongo pa kino. Ñanyi kintu kyo twafwainwa kunemeka? Nanchi tubintu twa kukaisha twawama, bivwalo bya katataka, ne bintutu bikwabo nyi?— Ine, kuji kintu kimo kyanema bingi. Kabiji luno lo lufunjisho Yesu lo afunjishe. Washimikizhe jishimikila ja muntu umo wabujile kutako muchima kwi Lesa. Ukeba nkubule nyi?—

Uno muntu wajinga munonshi. Wajinga na majimi ne matala. Kajo ko ajimine kamenene bingi bulongo. Bino matala o ajinga nao mwakubika kajo akepele. Pano nanchi, wakonsheshe kuba byepi? Walangulukile mu muchima wanji amba: ‘Nsa kushimukulula matala ami, nshimike akwabo abaya. Mo mo nkabika kajo kami ne bintu byami byonse.’

Uno munonshi walangulukile’mba kyawama bingi kuba bino. Kabiji amba kyawama bingi kusunga bintu byavula. Waambile’mba: ‘Nji na bintu byavula bingi byo nasunga. Bikakelwa myaka yavula. Pano nsa kukokolokangatu. Njangatu ne kutoma ne kusangalala.’ Pano bino uno munonshi kechi walangulukilenga bulongo ne. Nanchi wayuka kyatamine nyi?— Wilangulukilengatu aye mwine ne bintu bya kumusangajika. Kechi wateleko muchima kwi Lesa ne.

Lesa waambijile uno munonshi amba: ‘Obewa kilubi. Bufuku buno usa kufwa. Bino abi byonse byo wamwena jimo nanchi bikekala bya ñanyi?’ Nanchi kyakonsheka uno munonshi kwingijisha bino bintu panyuma ya lufu nyi?— Ine, bakonsha kwibisendatu ku muntu ungi. Yesu waambile’mba: “Kabiji byo byo aji awa wibikila bintu mwine, ne kwikala na bya bunonshi mwi aye Lesa ne.”—Luka 12:13-21.

Nanchi ukeba kwikala nobe yewa muntu munonshi nyi?— Aye mu bwikalo bwanji bonse wakebangatu bintu bya ku mubiji. Kino kintu kyatamine bingi. Wakebanga bingi kwikala na bintu byavula. Pano bino kechi wajinga na “bya bunonshi mwi aye Lesa ne.”

Byo biji ne bantu bavula. Bakebatu kwikala na mulumba wa bintu. Pano bino kyakonsha kuleta bingi makatazho. Kya kumwenako, nga obewa ujipo na tubintu twa kukaisha nyi?— Tubintu ka twa kukaisha to uji nato? Mbule.— Twambe amba mukwenu uji na mpila, kalubi, nangwa ka kintutu kakwabo ka kukaisha. Nanchi kyawama kwambila bansemi bobe amba ne obewa bakupotele byobyo bintu nyi?—

Kimye kimo kintu kya kukaisha kyakonsha kumwekana bingi bulongo. Pano umvwe wikikaisha moba avula kikala byepi?— Kitendeka kumwekanyika bingi bingitu. Kyakonsha konaika kabiji kampe wakonsha ne kwikitaya. Pano bino, uji na kintu kyanema kukila bintu bya kukaisha. Nanchi wikiyuka nyi?—

Ke bumi bobe. Bumi bobe bwanema bingi mambo kwakubula bumi, kechi wakonsha kuba kintu kiji kyonse ne. Pano bino kyanema bingi kutokeshanga Lesa pa muchima mu bumi bobe, ke ibyo nenyi?— Onkao mambo kechi twafwainwa kwikala nobe awa munonshi wakosama wabujile kutako muchima kwi Lesa ne.

Baana kechi bo bonkatu bakonsha kuba bintu byabula kufwainwa byonka byaubile yewa munonshi ne. Ne bakulumpetu nabo bakonsha kuba byabula kufwainwa. Bamo bakebesha bingi kwikala na bintu byavula. Bakonsha kwikala na kajo ka pa juba, bya kuvwala ne nzubo. Bino, boba saka bakebatu ne bikwabo. Bakeba kwikala na bivwalo byavula bingi. Kabiji bakeba mazubo akatampe. Bino bintu bipotwa na mali avula bingi. Onkao mambo bengila na ngovu pa kuba’mba bekale na mali avula. Kabiji umvwe baikala na mali avula, kibalengela kukeba kwikala na bintu byavula.

Bantu bamo bapayankana bingi na kukeba mali kabiji kechi bekalapo na kimye kya kwikala na kisemi kyabo ne. Kabiji Lesa bamuvulamako. Nanchi mali abo akonsha kwibapa bumi nyi?— Ine, kwalepeshatu. Nanchi bakonsha kwiengijisha umvwe bafwa nyi?— Ine. Mambo bafu kafwako kyo bakonsha kuba nangwa pachechetu ne.—Musapwishi 9:5, 10.

Nanchi kyatama kwikala na mali nyi?— Ine. Mali twakonsha kupotamo bya kuja ne bya kuvwala. Baibolo waamba’mba mali ebakwasha bantu. (Musapwishi 7:12) Bino umvwe twatemwisha mali, mwakonsha kufuma bingi makatazho. Twakonsha kwikalatu nobe awa munonshi wakosama wibikijile bintu aye mwine, ne kwikala na bya bunonshi mwi Lesa ne.

Nga kwikala na bya bunonshi mwi Lesa kilumbulula ka?— Kilumbulula kusambila kukebesha Lesa mu bwikalo bwetu. Bantu bamo bamba’mba baitabila mwi Lesa. Balanguluka’mba kikebewatu kwitabila kwapwa. Nanchi baji na bya bunonshi mwi aye Lesa nyi?— Ine, bajitu nobe awa munonshi wabujile kutako muchima kwi Lesa.

Yesu kechi wamulubileko Shanji wa mwiulu ne. Kechi wakebelenga kwikala na mali avula ne. Kabiji kechi wajinga na bintu byavula bya ku mubiji ne. Yesu wayukile kintu kyanema mu bwikalo. Nga obewa wikiyuka nyi?— Ke kwikala na bya bunonshi mwi Lesa.

Mbule, twafwainwa kwikala byepi na bya bunonshi mwi Lesa?— Twafwainwa kwikala nabyo umvwe ke tube bintu bimutokesha pa muchima. Yesu waambile’mba: “Mbena kuba bya kumutokesha pa muchima moba onse.” (Yoano 8:29) Lesa utemwa bingi umvwe twauba bintu byo akeba. Aki mbule, bintu ka byo wakonsha kuba bya kutokesha Lesa pa muchima?— Ee, wakonsha kutanga Baibolo, kuya na kupwila, kulomba kwi Lesa, ne kufunjisha bakwenu nabo kuba’mba bamuyuke Lesa. Bino byo bintu byanema mu bwikalo.

Mambo a kuba Yesu wajinga na bya bunonshi mwi Lesa, Yehoba wamulamine. Yehoba wapele Yesu bumi bwa myaka ne myaka. Umvwe twaikala nobe Yesu, netuwa Yehoba uketutemwa ne kwitulama. Onkao mambo, twayai twikale byonka byajinga Yesu. Kechi twafwainwa kwikala nobe awa munonshi wabujile kutako muchima kwi Lesa ne.

Abye Binembelo byaamba’mba kechi twafwainwa kutemwisha bintu bya ku mubiji ne: Byambo bya Mana 23:4; 28:20; 1 Timoti 6:6-10; ne Bahebelu 13:5.

[Kipikichala pa jipa 87]

Uno muntu uji na ñanyi lukatazho?

[Kipikichala pa jipa 88]

Awe munonshi ubena kulanguluka ka?

[Kipikichala pa jipa 89]

Kintu ka kyo uji nakyo kyanema kukila bintu bya kukaisha?

[Bipikichala pa jipa 91]

Awe mwanyike ubena kuba ñanyi kintu kyanema?