Kitango 17
Byo Twafwainwa Kwikala Balusekelo
ATWEBA bonse tukeba kwikala balusekelo, ke ibyo nenyi?— Bino bantu bavula kechi baji na lusekelo ne. Mambo ka?— Mambo kechi bayuka kilengela kwikala balusekelo ne. Balanguluka’mba umvwe waikala na bintu byavula bya ku mubiji, po po wakonsha kwikala na lusekelo. Pano bino nangwa baikala na bino bintu, kechi batwajijila kwikala na lusekelo ne.
Leka nkubule kyafwainwa kuleta lusekelo. Mufunjishi Wayukisha waambile’mba: “Lusekelo lo bamona aba bapana lwakila lo bamona aba batambula.” (Byubilo 20:35) Ki ka kyakonsha kwitulengela kwikala balusekelo?— Ee, kupa bakwetu bintu ne kwibengijila. Nanchi wayuka’mba kino kyo kileta lusekelo nyi?—
Aki twaya twisambepo pa kino. Nanchi Yesu waambile’mba muntu yebapa bupe kechi wakonsha kwikala na lusekelo nenyi?— Ine, kechi byo byo aambile ne. Umvwa bingi bulongo umvwe bakupapo bupe, ke ibyo nenyi?— Bonsetu tumvwa bulongo. Tusekela bingi umvwe betupa bintu byawama.
Bino Yesu waambile’mba mu kupana muji bingi lusekelo. Onkao mambo, ñanyi ye wakonsha kutongola amba wapana bintu byavula bingi ku bantu kukila uji yense?— Ee, Yehoba Lesa.
Baibolo waamba’mba Lesa “upana mweo ku bonse, ne muya, ne bintu byonse.” Witupa mvula ne mute, kuba’mba bijimwa bikomenga bulongo, twikalenga na kajo. (Byubilo 14:17; 17:25) O ene mambo Baibolo kyo atelela Yehoba amba, “Lesa wa lusekelo”! (1 Timoti 1:11, NW) Kupa bakwetu bintu kumuletela bingi Lesa lusekelo. Kabiji umvwe twapana, netuwa kituletela lusekelo.
Bi ka byo twakonsha kupa bakwetu?— Kimye kimo kya bupe kyakonsha kupotwa na mali. Umvwe ukeba kupana kya bupe kya kupota, patanshi wafwainwa ku kikipota. Onkao mambo, umvwe ukeba kupana kya bupe kya uno mutundu, wafwainwa kusunga mali kuba’mba afikile pa kipimo kya kupota kyokyo kya bupe.
Pano bino kechi bya bupe byonse byafwainwa kupotwa ne. Kya kumwenako, umvwe kwakaba, wakonsha kumupapo mema muntu waumvwa kilaka. Onkao mambo, umvwe wamupa mema muntu waumvwa kilaka, wakonsha kwikala na lusekelo lufuma mu kupana.
Juba jimo kampepo obewa ne bainobe mwakonsha kupanga bitumbuwa. Wakonsha kutemwa bingi kupanga bitumbuwa. Pano bino umvwe ukeba kwikala na lusekelo, nanchi wakonsha kujatu bitumbuwa byonse bunke bobe nyi?— Ine, wafwainwa kupapo bakwenu bimo. Nanchi ukeba ukobe bino nyi?—
Mufunjishi Wayukisha ne batumwa banji bonse bayukile’mba mu kupana muji bingi lusekelo. Wayuka byo bapaine ku bakwabo nyi?— Bapaine kintu kyanema bingi! Bayukile bukine bwa Lesa, kabiji babulangako bakwabo ano mambo awama. Baubilenga bino kwakubula kwibapapo nangwa kangwee ne.
Juba jimo mutumwa Paulo ne mulunda nanji Luka bataine mwanamukazhi wakebelenga kwikala na lusekelo lufuma mu kupana. Bamutaine kwipi na mukola. Ba Paulo ne Luka bayile konka mambo baumvwine’mba yajinga mpunzha ko balombelanga. Kabiji byo bafikile kokwa, bataine banabakazhi bamo saka balomba.
Paulo watendekele kwibabula bano banabakazhi mambo awama a Yehoba Lesa ne Bufumu bwanji. Umo pa bano banabakazhi wa jizhina ja Lidiya, wateleko bingi muchima. Panyuma ya bino, Lidiya wakebelenga kubapo kimo kumwesha’mba kine watemenwe bingi mambo awama o aumvwine. Onkao mambo wibasashijile ba Paulo ne Luka amba: “Umvwe mwandanguluka’mba, ye wa kishinka mwi Nkambo, twelai mu nzubo yami, mwikale.” Kabiji wibakanjikizhe kutwela mu nzubo yanji.—Byubilo 16:13-15.
Lidiya watemenwe bingi kwikala na bano bakalume ba Lesa mu nzubo yanji. Wibatemenwe bingi mambo bamukwashishe kufunda pe Yehoba ne Yesu kabiji ne bantu byo bakonsha kwikala myaka ne myaka. Kino kyamulengejile kwikala na lusekelo ne kwibapa ba Paulo ne Luka bya kuja ne kibamba mwa kukokolokela. Onkao mambo bumpanyi bwamuletejile bingi lusekelo Lidiya. Twafwainwa kuvulukanga kino kimye kyonse. Kimo kimye bakonsha kwitwambila’mba tupanepo bupe. Pano bino umvwe kechi tubena kukeba kupana ne, kechi twakonsha kwikala balusekelo nangwa twapana ne.
Kya kumwenako, twambe’mba uji na maswiti. Inge nkwambile namba papo mukwenu, abya usa kumupa nyi?— Kimye kimo, obe mwine wakonsha kutana mukwenu ye watemwa bingi saka uji ne na maswiti. Nanchi kechi kyawama kumupapo nenyi?—
Kimye kimo twakonsha kutemwa bingi mukwetu kya kuba twakonsha ne kumupatu byonse byo tuji nabyo. Byo byo twafwainwa ne kutemwa Lesa.
Mufunjishi Wayukisha wayukilepo mwanamukazhi mulanda wajinga na lusekelo. Wamumwene pa nzubo ya Lesa mu Yelusalema. Wajingatu na tubangwee tubiji kwapwa. Bino tonse witubikile mu kabokoshi ka bupe ku nzubo ya Lesa. Kafwako wamukanjikizhe ne. Bantu bavula bajingapo kechi bayukile nangwa kyo aubile ne. Wakebeshe bingi kuba kino mambo watemenwe bingi Yehoba. Kupana kwamuletejile bingi lusekelo.—Luka 21:1-4.
Kuji mashinda avula mo twakonsha kupaina bintu. Wakonsha kutongolapo amo nyi?— Umvwe twapana mu kwitemenwa atwe bene, tukekala bingi na lusekelo. O ene mambo Mufunjishi Wayukisha o etwambila’mba: “Panai.” (Luka 6:38) Umvwe twauba bino, tukalengelanga bakwetu nabo kwikala na lusekelo. Kabiji tukekala bingi na lusekelo!
Tangilapo ne byambo bikwabo byaamba pa kupana byo kuleta lusekelo, pa Mateo 6:1-4; Luka 14:12-14; ne 2 Kolinda 9:7.
[Kipikichala pa jipa 92]
Mambo ka Yehoba o aikela “Lesa wa lusekelo”?
[Kipikichala pa jipa 93]
Ki ka kyakonsha kukuletela lusekelo kukila kuvingatu bitumbuwa byobe bunke bobe?
[Kipikichala pa jipa 94]
Lidiya ubena kwibambila ba Paulo ne Luka amba ka?
[Kipikichala pa jipa 94]
Mambo ka Lidiya o aikejile na lusekelo pa kupapo ba Paulo ne Luka?
[Kipikichala pa jipa 96]
Mambo ka uno mwanamukazhi mulanda o aikejile na lusekelo lwa kupana byonse byo ajinga nabyo?