Kitango 23

Bantu Kyo Babelela

NANCHI wayukapo muntu uji yense wabela nyi?— Ne obewa kimye kimo ubela. Wakonsha kubela kifine nangwa munda. Bantu bamo babela bingi. Kechi bakonsha kwimana bunke bwabo ne, kanatu bebakwatako. Kino kimwekanyika kikatakata umvwe muntu wakota.

Bantu bonsetu babela. Nanchi wayuka ene mambo bantu o babelela, kukota, ne kufwa nyi?— Juba jimo baletele muntu wabulanga kwenda kwi Yesu, kabiji Yesu wamwesheshe ene mambo bantu kyo babelela ne kufwa. Leka nkushimikizhe byo kyajinga.

Yesu waikele pa kimye kicheche mu nzubo yajinga mu muzhi wajinga kwipi na Kizhiba kya Ngalilea. Kwaishile jibumba ja bantu na kumumona. Bantu bavujile bingi kya kuba’mba bakwabo baishilenga kechi bakonsheshe kutwela mu nzubo ne. Kafwako wakonsheshe nangwa kufwenya kwipi na kibelo ne. Pano bino, bantu baishilengatu! Jibumba jimo ja bantu jaletele muntu wajinga na kalepu. Uno muntu bamusendejiletu pa mwanya ku banabalume bana.

Nanchi wayuka bano banabalume kyo bamutwajile uno muntu wabelele kwi Yesu nyi?— Bajinga na lwitabilo kuba’mba Yesu usa kubuka kikola kyanji. Abya wayuka byo baubile pa kuba’mba bamufikizhe pajinga Yesu mu yoya nzubo mwayujile bantu nyi?—

Baubile byonka byo ubena kumona pa kikye kipikichala. Bamukanjizhizhe uno muntu wabela pa mutenge wa nzubo. Wajinga musemi wapapakana. Babwelele basaba ne jilozo jikatampe. Kepo bamuzenzumwijile uno muntu wabelele mu nzubo mwajinga Yesu. Bano bantu byo bajingapo na lwitabilo lwakosa!

Bantu bonse bajinga mu nzubo bakuminye bingi pa kumona kino. Muntu wa kalepu bamuzenzumwijiletu ponka po bajinga. Nanchi Yesu wibazhingijile bano bantu pa kuba bino nyi?— Ine. Waumvwine bingi bulongo mambo bajinga na lwitabilo. Wamwambijile awa muntu wa kalepu amba: “Mambo enu alekelwa.”

Bantu bamo baumvwine bingi kutama amba kechi kyawama Yesu kwamba bino ne. Kechi bayukile’mba wakonsha kulekelañana mambo ne. Pa kwibamwesha’mba kine wakonsha kulekela mambo, Yesu wamwambile awa mwanamulume amba: “Imanai, mushikule ne mwanya wenu, muyenga ku nzubo yenu.”

Aku Yesu wambatu bino, uno mwanamulume wabukilwe! Kechi watwajijile kwikala na kalepu ne. Pano wiendejilengatu aye mwine kwakubula wa kumukwatako ne. Bantu pa kumona kino bakuminye bingi. Kechi bamwenepo kintu kyakukumya nabiji kino mu bwikalo bwabo ne! Batotelenga Yehoba pa kwibapa uno Mufunjishi Wayukisha, wabukilenga bikola bya bantu.—Mako 2:1-12.

Ki ka kyo tufunda ku kino kya kukumya kyaubiwe?— Tufunda kuba’mba Yesu uji na bulume bwa kulekela mambo ne kubuka bantu. Kabiji tufunjilako ne kintu kikwabo kyanema bingi. Tufunda kuba’mba bantu babela na mambo a bundengamambo.

Atweba bonse tubela, nanchi kino kilumbulula’mba twibandengamambo nyi?— Ee, Baibolo waamba’mba tusemwatu na bundengamambo. Wayuka byo kilumbulula kusemwa na bundengamambo nyi?— Kilumbulula kusemwa babulakoloka. Kimye kimo tuba bintu byatama nangwa kya kuba kechi byo byo tubakebenga ne. Nanchi wayuka bonse byo twaikele ke bandengamambo nyi?—

Twibandengamambo mambo muntu mutanshi aye Adama kechi wakokejile Lesa ne. Walengele mambo byo alajile muzhilo wa Lesa. Ne atweba bonse twaswana bundengamambo kufuma kwi Adama. Wayuka byo twaswaine bundengamambo kufuma kwi Adama nyi? Leka nkulondolwele mu jishinda japela kumvwa.

Kampe wakimonapo kala muntu saka asoka shinkwa mu kikombola. Umvwe kya kuba’mba kikombola kiji na kikozha, shinkwa wakonsha kwikala byepi? Abya wayuka nyi?— Shinkwa ye basoka mu kino kikombola naye ukekala na kikozha, ke ibyo nenyi?—

Adama waikele nobe kino kikombola, kabiji ne atweba tuji nobe shinkwa. Adama waikele ke mbulwakoloka byo alajile muzhilo wa Lesa. Kyajingatu nobe waikala na kikozha. Nga baana bo asemenenga bakonsheshe kwikala byepi?— Baana banji bonse baikele na kino kikozha kya bumbulwakoloka.

Baana bavula kechi basemwa na kikozha kyo wakonsha kumona ne. Basemwa sa bajitu bulongo. Pano bino, konka kubela ko babela ne kufwa, bo bumbulwakoloka.

Bantu bamo babelabela bingi kukila bakwabo. Mambo ka? Nanchi kiji bino mambo a kuba’mba abo bandengamambo kukila bakwabo nyi?— Ine, atweba bonsetu twi bandengamambo. Twasemekelwetu saka tuji bambulwakoloka. Mu kuya kwa moba, ujitu yense wakonsha kubela. Nangwatu bantu bakokela mizhilo ya Lesa babulapotu nangwa kuba kintu kyatama ne, nabo babela.

Pano, nga mambo ka bantu bamo kyo babelela belela kukila bakwabo?— Kuji bintu byavula bingi bilengela. Kampe kechi bekala na kajo ka kuja kavula ne. Nangwa kampe bakonsha kuja kajo katama. Bakonsha kuja kajo kabulapotu nangwa munyimo ne. Kabiji kampe kechi balaala bukiji ne. Nangwa kampe kechi bavwala bya mashika umvwe kuji mashika ne. Bantu bamo mibiji yabo kechi yakosa ne. Kechi bakonsha kushinda bikola nangwa babena kwilamatu bulongo ne.

Nanchi kukekalapo kimye kyo tukabulanga kubela nyi? Nanchi bundengamambo bwetu bukapwa nyi?— Nga Yesu wamubilepo byepi awa muntu wajinga na kalepu?— Yesu wamulekejileko mambo anji ne kumubuka. Yesu byo aubile bino, wamwesheshetu patoka byo akobila aba boba byaoloka.

Umvwe ke tumweshe’mba twashikwa bundengamambo kabiji kechi tukeba kuba byatama ne, Yesu uketubuka. Kulutwe na lwendo, ukafumyapo bundengamambo bwetu bonse. Ukoba bino byo aji Mfumu wa Bufumu bwa Lesa. Bundengamambo bwetu kechi bakebufumyapotu juba jimo ne. Bakebufumyangapo pachepache. Bundengamambo bonse byo bukapwa, kechi tukabelanga jibiji ne. Bonse tukekala na mibiji yawama bulongo. Kino kintu byo kikekalapo kya lusekelo!

Umvwe ukeba kuyukilapo byavula bundengamambo byo bujitu ku muntu yense, tanga Yoba 14:4; Salamo 51:5; Loma 3:23; 5:12; ne 6:23.

[Kipikichala pa jipa 123]

Yesu waambijile muntu wa kalepu amba ka?

[Kipikichala pa jipa 124]

Ki ka kyo tufunda ku kino kya kukumya kyaubiwe?

[Kipikichala pa jipa 125]

Atweba bonse twaikele byepi ke bandengamambo?

[Kipikichala pa jipa 126]

Umvwe bundengamambo bonse bwapwa, bumi bwetu bukekala byepi?