Kitango 32

Yesu Byo Azhikijilwe

YEHOBA kimye kimo uba bintu mu jishinda ja kukumya kuba’mba azhikijile banyike bakonsha kubula kwizhikijila abo bene. Umvwe wauba’mba uye nakwendauka mwaya mande, wakonsha kumona jishinda jimo Yehoba mo obila bino. Pano bino kechi wakonsha kuyuka kibena kubiwa ne.

Wakonsha kumona kañonyi kaikala panshi pepi na kouji, uba nobe bekakozha. Katandubula kyapi, kabiji umvwe wauba amba ufwenye pepi, nako kaendako. Kabiji inge wauba’mba wikanangijilenga nako saka kayatu. Olo, ko kyakayanga kabwela katumbuka. Kano kañonyi kechi baji kwikakozha ne! Nanchi wayuka byo kabaubenga nyi?—

Pepi na po kajikwikela paji twana twako mu kakipupu. Kañonyi kaji kumvwa moyo amba kwendapo witunyanta. Kyo kyo kabaubilenga uba nobe bekakozha kukeba’mba upichile kwalepa. Abya wayuka wakonsha kwituzhikijila byonka kañonyi byo kazhikijila twana twako nyi?— Mu Baibolo, Yehoba wafwanyikizhiwa ku ñonyi utelwa’mba mpungu mambo uzhikijila bingi baana banji.—Mpitulukilo ya mu mizhilo 32:11, 12.

Mwana ye atemwisha Yehoba ke Yesu. Yesu byo ajinga mwiulu, wajinga kilengwa kya mupashi byonka biji Shanji. Wizhikijilanga aye mwine. Yesu byo asemekelwe panopantanda mu bumwana, wakebewenga bukwasho. Wakebewenga wakumuzhikijilako.

Pa kuba’mba obe kyaswa muchima wa Lesa panopantanda, Yesu wakomene ne kwikala muntu waoloka. Pano bino saka akyangye kukoma ne, Satana wakebelenga amba amwipaye. Ke jishimikila jawama bingi jashimikizha Yesu byo bakebelenga kumwipaya kabiji ne Yehoba byo amuzhikijile. Ukeba uyuke byo kyajinga nyi?—

Aku Yesu usemwatu, Satana walengele kintu kyamwekelenga nobe kabangabanga mwiulu ku Musela. Ba maana, ko kuba’mba bafunda biji tubangabanga bekalondejilenga kukafika ne ku Yelusalema. Byo bafikile, baipwizhe kwasemwa mfumu wa Bayudea. Banabalume bayukile byaamba Baibolo bebakumbwile’mba: “Mu Betelema.”—Mateo 2:1-6.

Heloda mfumu watama wa mu Yelusalema, byo aumvwine amba kwasemwa mfumu mu muzhi ujitu kipikipi wa Betelema, waambijile ba maana amba: ‘Yainga, kamukebeshai bulongo ao mwana, kabiji mwiye mumbule ne amiwa.’ Nanchi wayuka Heloda kyo akebejilenga kuyuka kuji Yesu nyi?— Mambo Heloda waumvwine bukaji, onkao mambo wakebelenga amba amwipaye!

Nga Lesa wamuzhikijile byepi Mwananji?— Ba maana byo bamutaine Yesu, bamupele bya bupe. Panyuma ya bino Lesa wibajimwine mu kiloto amba kechi bafwainwa kubwela kwi Heloda ne. Onkao mambo babwelele kwabo kwakubula kupita mu Yelusalema ne. Heloda byo aumvwine amba ba maana babwela kwabo, waubile bingi bukaji. Mu kukeba kuba’mba epaye Yesu, Heloda waipayile baana ba balume bonse mu Betelema ba myaka ibiji ne kubwela panshi! Pano bino, byo aubilenga bino Yesu saka afumamo kala.

Nanchi wayuka Yesu byo afuminemo nyi?— Ba maana byo babwelele kwabo, Yehoba wakambizhe Yosefwa muka Maliya amba anyemene ku Ijipita. Byo banyemejile ku Ijipita Yesu wazhikijilwe kuchina kumwipaya kwi Heloda. Byo papichile myaka icheche, ba Maliya ne Yosefwa bafumine mu Ijipita saka baji na Yesu, Lesa wamujimwine Yosefwa jibiji. Wamwambijile mu kiloto amba aye ku Nazala, pa kuba’mba Yesu akekale bulongo.—Mateo 2:7-23.

Wamona Yehoba byo azhikijile Mwananji nyi?— Ñanyi uji nobe twana twa kañonyi tuji mu kipupu nangwa byonka byajinga Yesu byo akijinga mwanyike? Nanchi obewa kechi byo byo uji nenyi?— Kuji bakeba kuba’mba bakukozhe ne obewa. Abya wibayuka nyi?—

Baibolo waamba’mba Satana ujitu nobe bokwe wimba ukeba amba etuje. Byonkatu bokwe byo akeba kukwata baana banyama, Satana ne bandemona banji nabo bakeba kukwata banyike. (1 Petelo 5:8) Pano bino Yehoba wakosa kukila Satana. Yehoba wakonsha kuzhikijila baana nangwa kukanya kiji kyonse kyatama Satana kyo akonsha kwiboba.

Ubena kuvuluka byo twafunjile mu Kitango 10 kya uno buku pe Diabola ne bandemona banji byo bakeba’mba tubenga nyi?— Ee, bakeba’mba twimonenga masongola mu jishinda jakanya Lesa. Bañanyi bonkatu bafwainwa kwimona masongola?— Ee, bamulume ne mukazhi bo bonkatu bafwainwa kwimona masongola.

Ke kya bulanda bingi, mambo bakulumpe bamo belaala na baana ba bacheche. Umvwe bauba bino, bakalombwana ne bakashimbi nabo batendeka kuba bintu byatama byo bafunda ku bano bakulumpe. Bano banyike nabo batendeka kwingijisha bya bwanabulume nangwa bya bwanabukazhi mu jishinda jabula kufwainwa. Byo byo kyajinga ne mu muzhi wa Sodoma. Baibolo waamba’mba bantu ba mu yewa muzhi, ‘bakulumpe ne banyike,’ bakebelenga’mba belaale na banabalume baile na kumona Lota.—Ntendekelo 19:4, 5.

Byonkatu Yesu byo akebewenga wa kumuzhikijila, ne obewa wafwainwa kuzhikijilwa ku bakulumpe nangwatu ku banyike bakwenu bakonsha kukeba’mba mwilaale nabo. Javula bano bantu bakonsha kwibepekezha’mba bakwenu. Bakonsha kukupa bintu umvwe wibambila’mba kechi ukabulako muntu mukwabo ne. Pano bino bano bantu ke bambanzhi byonka biji Satana ne bandemona, kabiji bakebatu kwisangajika. Bakeba kwisangajika kupichila mu kulaala baana babacheche. Kino kintu kyatama bingi!

Nanchi wayuka byo bakonsha kuba pa kuba’mba besangajike nyi?— Bakonsha kuba kebakinkanye kya bwanabulume nangwa kya bwanabukazhi na kyobe. Kechi wafwainwa kuswisha muntu kukukaisha ku bwanabulume nangwa ku bwanabukazhi ne. Nangwatu biji bakolojobe, bainobe, nangwa bashobe kechi bafwainwa kuba bino ne. Bino bibese bya mubiji byazhila.

Wakonsha kwizhikijila byepi ku bantu boba bintu byatama bya uno mutundu?— Kechi wafwainwa kuleka muntu kukukaisha ku bwanabulume nangwa ku bwanabukazhi ne. Umvwe wamona ke bobe bino, bijika na jiwi jakanza amba: “Kechi mbena kukeba ne! Nsakwiya ne mwambemo!” Umvwe bakwambila amba ao ke mambo obe, kechi wafwainwa kwibomvwina ne. Babena kubepa. Obewa bambemotu kwesakana na byonse byo ba baubenga! Wafwainwa kwamba nangwa kya kuba bakwambila’mba byo mwaji kubanga byafwainwa kuyukatu obewa ne abo kwapwa. Ao muntu nangwa akupe byawama nangwa ambe bya mutundu ka, obewa wafwainwatu kumwambamo.

Kechi wafwainwa kumvwa moyo ne, pano bino wafwainwa kujimuka. Umvwe bansemi bobe bakujimuna amba kechi wafwainwa kuya nangwa kwendañana na bantu baji na byubilo byabula kufwainwa ne, wafwainwa kumvwina. Umvwe waumvwina, bantu baji na byubilo byatama kechi bakakuba kyatama ne.

Tangilapo ne byambo bikwabo byaamba pa byo wafwainwa kwizhikijila ku byubilo byatama bya kwilaala, mu Ntendekelo 39:7-12; Byambo bya Mana 4:14-16; 14:15, 16; 1 Kolinda 6:18; ne 2 Petelo 2:14.

[Kipikichala pa jipa 167]

Ake kañonyi kabena kuzhikijila byepi twana twako?

[Kipikichala pa jipa 168]

Panyuma ya kuba ba maana bamumona Yesu, Lesa wibajimwine byepi pa kuba’mba apulushe Yesu?

[Kipikichala pa jipa 169]

Nga Yesu bamuzhikijile byepi jikwabo?

[Kipikichala pa jipa 171]

Wafwainwa kuba byepi umvwe muntu wakukwata mu jishinda jabula kufwainwa?