Bashayuka Ba Tubangabanga Bayile Na Kumona Yesu

Kwajinga banabalume bamo bafumine ku Musela. Bano bajinga bashayuka ba tubangabanga, ko kuba’mba bantu baambanga’mba bakonsha kubulañana bikamweka kulutwe kupichila mu kumona byaikala tubangabanga mwiulu. (Isaya 47:13) Byo bajinga kwabo ku Musela, bamwene “kabangabanga” kabiji bekalondejile museke walepa kuya ku Yelusalema, kechi ku Betelema ne.

Bashayuka ba tubangabanga byo bafikile ku Yelusalema, bashikishe’mba: “Mfumu wa Bayudea wasemwa uji pi? Mambo twaji kumona kabangabanga kanji kimye kyo twajinga ku Musela, kabiji twaiya namba tumulambile.”—Mateo 2:1, 2.

Mfumu Heloda wajinga mu Yelusalema byo aumvwine kino, wazhingijile bingi. Onkao mambo, waichile bañanga bakatampe ne bantangi ba bupopweshi bwa Bayudea ne kwibashikisha kwasemekejilwe Kilishitu. Abo bakumbwile monka mwaambila Binembelo amba: “Mu Betelema.” (Mateo 2:5; Mika 5:2) Kepo Heloda mu bufyamfya aichile bashayuka ba tubangabanga ne kwibambila’mba: “Yainga mukakebe bulongo kuji uno mwana, kabiji umvwe mwamutaana, mwafwainwa kubwela kuno na kumbuula pa kuba’mba ne amiwa nkayeko na kumulambila.” (Mateo 2:8) Bino kine kyakebelenga Heloda ke kwipaya mwana.

Byo bayile, kwamwekele kintu kya kukumya. “Kabangabanga” ko bamwene kimye kyo bajinga ku Musela, katangijileko kulutwe yabo. Kano kechi kajinga kabangabanga konkake ko twayuka ne, bino kuji wikanengezhezhe kwibatangijila. Bashayuka ba tubangabanga batwajijile kwikalondela posotu ne byo kaimene peulu ya nzubo mwajinga Yosefwa ne Maliya ne mwanabo.

Bashayuka ba tubangabanga byo batwelele mu nzubo, bataine Maliya ne mwananji aye Yesu. Ponkapo bano bashayuka ba tubangabanga bafukamine kwi aye. Kabiji bamupele bya bupe bya ngolode, binunka bulongo ne mola. Byo baubile’mba babwele na kubuula Heloda kuji mwana, bebajimwineko kwi Lesa mu kiloto amba babule kubwela kwi Heloda. Onkao mambo, bapichile jishinda jingi pa kubwela ku kyalo kyabo.

Ñanyi ye mwalanguluka’mba ye wanengezhezhe kano “kabangabanga” kapichilenga mwiulu kutangijila bashayuka ba tubangabanga? Vulukai’mba kano “kabangabanga” kechi kakibatangijile kwajinga Yesu ku Betelema ne. Bino patanshi kebatangijile ku Yelusalema ko bamonañene na Mfumu Heloda wasakilenga kwipaya Yesu. Inge ne kuba Lesa wajimunako bano bashayuka ba tubangabanga amba babule kubuula Heloda kwajinga Yesu ne, inge wamwipayile. Mulwanyi wa Lesa aye Satana ye wakebelenga kwipaya Yesu, kabiji waingijishe jino jishinda kuba’mba obe kyo akebelenga.