Mwana Walayilwe

Ba Yosefwa ne Maliya baikele mu Betelema, kechi babwelele ku Nazala ne. Yesu byo afikizhe moba atanu na asatu, bamutwajile ku mukanda monka mwakambizhizhe Mizhilo Lesa yo apele bena Isalela. (Bena Levi 12:2, 3) Kabiji kyajinga kisho kya kutumba mwana jizhina pa juba ja butanu na busatu. Onkao mambo, bamutumbile uno mwana amba Yesu, byonkatu byaambile malaika Ngabaliela.

Byo papichile moba kukila pa ñondo umo, Yesu wafikizhe moba 40. Bansemi banji bamutwajile kwepi? Bamutwajile ku nzubo ya Lesa mu Yelusalema kabiji kechi palepele na ko baikelanga ne. Mizhilo Lesa yo apele Mosesa yaambile’mba, pa kupitapo moba 40 panyuma ya kusema mwana wamulume, inanji wafwainwe kupana mulambo wa kwitokesha pa nzubo ya Lesa.—Bena Levi 12:4-7.

Mary does that. As her offering, she brings two small birds. This tAbino byo byaubile Maliya. Watwajile tuñonyi tubiji kwikala mulambo. Kino kimwesha byajinga bwikalo bwa ba Yosefwa ne Maliya. Kwesakana na Mizhilo ya Mosesa, bafwainwe kulambula mukooko mulume ne kañonyi. Bino umvwe inetu wakankalwa kutwala mukooko, walambulanga tutela tubiji nangwa twana twa nkunda tubiji. Abino byo byo apaine Maliya.

Mwanamulume mukote wajinga mu nzubo ya Lesa waishile kwajinga ba Yosefwa ne Maliya. Jizhina janji wajinga Shimeona. Lesa wamusolwejile’mba saka akyangye kufwa, ukamona Kilishitu nangwa’mba Mesiasa, Yehoba ye alayile. Pa jino juba, mupashi wazhila watangijile Shimeona kuya ku nzubo ya Lesa ko ataine ba Yosefwa ne Maliya ne mwanabo. Shimeona watambwile uno mwana mu maboko anji.

Shimeona byo atambwile Yesu, wasanchijile Lesa ne kwamba’mba: “Anweba Nkambo Mfumu, pano mwanswisha amiwa muzha wenu kuya mu mutende monka mo mwaambijile, mambo meso ami amona jishinda jenu jo mukaletelamo lupulukilo jo mwanengezha kuba’mba bantu bonse bamone, ye kyeya kikafumyapo kintu kilengela meso a bisaka bya bantu kubula kumona kabiji lo lukumo ku bantu benu bena Isalela.”—Luka 2:29-32.

Ba Yosefwa ne Maliya bakuminye bingi pa kumvwa bino byambo. Kabiji Shimeona wibapesheshe ne kwambila Maliya amba mwananji “bamutongola kulengela bantu bavula mu Isalela kupona ne kwimana,” ne kuba’mba Maliya ukekala na bulanda nobe bamupulankanya mpoko yatwa bingi.—Luka 2:34.

Kabiji patainwe ne muntu mukwabo pa jonkaja juba. Uno muntu wajinga ngauzhi wamukazhi wa jizhina ja Ana wajinga na myaka ya kusemwa 84. Ana watanwanga moba onse pa nzubo ya Lesa. Pa kyonkakya kimye, waishile kwajinga Yosefwa, Maliya ne mwanabo Yesu. Ana watatwile kusanchila Lesa ne kwamba pe Yesu ku bonse bamutelekelenga.

Kyamweka ba Yosefwa ne Maliya basangalele bingi na mambo a bino bintu byamwekele pa nzubo ya Lesa. Kine, bino byonse bibamwesheshe’mba uno mwanabo ye Mwana Lesa Walayilwe.