Bantu Bepuzha’mba . . .

Ñanyi watumine “kabangabanga”?

▪ Nanchi mwakimonapo kala bipikichala bya kimye kyasemenwe Yesu, kya bamfumu basatu nangwa’mba ba maana basatu baishile na kumona Yesu aku usemwatu saka bamulajika mu kijilamo banyama nyi? Kwesakana na byaamba jishimikila, bamba’mba Lesa waingijishe kabangabanga kwibatangijila ku kipaka mu Betelema. Banyike bavula balabijila ne mazhina a boba bamfumu basatu, Melchior, Gaspar ne Balthasar. Nangwa byonkabyo, nanchi jino jishimikila jaya nkuwa jakwatankana na byaamba Baibolo nyi? Ine. Bishinka byavula bimwesha’mba bya bubelatu.

Kitanshi, aba banabalume bajinga bañanyi? Mu mulaka mwine wa Kingiliki, Baibolo kechi wibatelapo’mba bamfumu nangwa’mba banabalume ba maana ne. Bajinga bañanga nangwa’mba bañanga babuka kwingijisha tubangabanga. Baibolo kechi watongola mazhina nangwa kibelengelo kya bano banabalume ne.

Kya bubiji, bano banabalume baishile ñanyi kimye? Kechi baishile Yesu saka akiji lukeke saka bamulajika mu kijilamo banyama ne. Twayuka byepi? Nembi wa Mambo Awama aye Mateo waamba’mba: “Byo batwelele mu nzubo, bataine mwana saka aji na inanji aye Maliya.” (Mateo 2:11) Yesu kechi poasemenwetu ne, wajinga “mwana” wafukuma kala. Maliya ne Yosefwa kechi bakilajilenga mu kipaka ne, bajinga mu nzubo.

Kya busatu, ñanyi watumine “kabangabanga” katangijile bano banabalume? Basapwishi ba mu machechi lelo jino bafunjisha’mba Lesa ye watumine kano kabangabanga. Abya kya kine ye wikatumine nyi? Vulukai kuba’mba kano “kabangabanga” patanshitu kechi kebatangijile ku Betelema ne. Kakibatwajile kwi Mfumu Heloda ku Yelusalema. Bano banabalume bobabujile mfumu mbanzhi kusemwa kwa kwa Yesu ne kumulengela kumvwa kichima ne kushikwa uno mwana ukekala “mfumu wa Bayudea.” (Mateo 2:2) Mu bujimuku, Heloda wibambijile’mba bakabwele bakamubule kobakatana uno mwana, ne kwibabepa’mba naye wakebelenga kuya na kumupa munema. “Kabangabanga” panyuma ya bino, popo kebatwajile bano banabalume kwajinga Yosefwa ne Maliya. Bano bañanga bashi bakaletelele uno mwana inge Lesa ne kutwelamo ne. Kyawaminekotu, Lesa wamuzhikijile. Heloda wazhingijile bingi bano bañanga byo basezhezhe pa kubwela kwabo, kino kyamulengejile kukambizha kwipaya baana babalume bonse bakijinga na myaka ibiji ne kubwela panshi mu Betelema.—Mateo 2:16.

Mu kuya kwa moba Yehoba waambile’mba Yesu ye “Mwanami ye natemwa, mo namwena lusekelo.” (Mateo 3:17) Akikilangulukaipotu: Kine Shanji waoloka kabiji wamutemwa mwananji bino wakonsha kwingijisha bañanga babuka kwingijisha tubangabanga baubanga buñanga bwa lubuko bwakanya Mizhilo yanji nyi? (Mpitulukilo ya mu mizhilo 18:10) Nanchi wakonsheshe kwingijisha kabangabanga kwibatangijila patanshi ku mbanzhi ne kumubula byamulengejile Heloda kumvwa kichima nyi? Kabiji Lesa wakonsheshe kwingijisha kabangabanga kantu kamo kutwala bano banabalume kwajinga mwananji nyi?

Akilangulukai pa kino: Mukulumpe wa bashilikale watuma mushilikale ye akinkamo manungo mu ntanda ya balwanyi na kwingila. Nanchi wakonsha kubula balwanyi koaji nyi? Konsha wauba bino ne. Kyo kimotu, Yehoba watumine Mwananji mu ino ntanda mwaswalala. Nanchi Lesa wakonsheshe kubula Mfumu Heloda kwajinga uno Mwananji saka akijitu lukeke nyi? Ine.

Pano, ñanyi watumine “kabangabanga” nangwa kyamwekelenga nobe kabangabanga? Ñanyi wakebeshenga kwipaya Yesu saka akiji lukeke, kuchina’mba inge wakoma ukengila mwingilo ye aishijile pano pa ntanda? Ñanyi ukeba kongola bantu, utundaika bubela, bumbanzhi ne kwipayañana? Yesu mwine waambile’mba, uno ye “wa bubela kabiji ye shanja bubela,” waikele “mbanzhi byo atatwile kwenda mu mashinda anji atama”—Satana Diabola.—Yoano 8:44.