Kitango 35

Umvwe Twafwa Twakonsha Kusangulwa!

UMVWE twafwa, nanchi Lesa uketusangula nyi?— Muntu wawama aye Yoba wajinga na lwitabilo amba Lesa ukamusangula. Onkao mambo, Yoba byo ayukile amba usa kufwa, waambijile Lesa amba: “Mukangita ne amiwa nkemwitaba.” Yoba waambilenga’mba Yehoba Lesa ukamusangula.—Yoba 14:14, 15.

Yesu ujitu byonka biji Shanji, Yehoba Lesa. Yesu ukeba bingi kwitukwasha. Muntu wabelele kikola kya mbumba byo amwambijile amba, “umvwe mwaswa, mwayuka kumbuka,” Yesu wakumbwile amba: “Naswa, mubukwe.” Kabiji awa muntu wabelele mbumba bamubukile.—Mako 1:40-42.

Yesu wafunjile kwi Shanji kutemwa banyike. Kala kene, Yehoba waingijishe bakalume banji kusangula banyike. Elaija walombele kwi Yehoba amba asangule mwana wa mwanamukazhi wamutambwijile. Yehoba byo byo aubile. Kabiji Yehoba waingijishe kalume wanji aye Elisha kusangula kalombwana.—1 Bamfumu 17:17-24; 2 Bamfumu 4:32-37.

Tusangalala bingi umvwe twayuka’mba Yehoba witutemwa, ke ibyo nenyi?— Kechi wituvulukatu kimye kyo tuji na bumi ne. Nangwatu inge twafwa napo wituvuluka. Yesu waambile’mba bantu ba uno mutundu nangwa bafwa Lesa wibamona amba bomi. (Luka 20:38) Baibolo waamba’mba ‘nangwa lufu, nangwa bumi, nangwa bintu byakatataka, nangwa bintu bikeyako, kechi byakonsha kwitwabanya na butemwe bwa Lesa ne.’—Loma 8:38, 39.

Yesu byo ajinga panopantanda, wamwesheshe amba Yehoba ukeba bingi banyike. Yesu waikalangapo na kimye kya kwisamba na banyike pa mambo a Lesa. Nanchi wayuka kuba’mba Lesa wapele Yesu bulume bwa kusangula banyike nyi?— Akitwaya twisambepo kimye Yesu kyo asangwile kashimbi wa myaka jikumi na ibiji mwana Yelusa.

Yelusa waikalanga na mukazhanji ne mwanabo umotu kwipi na Kizhiba kya Ngalilea. Juba jimo, kashimbi wabelele bingi, kabiji Yelusa wamwene amba usa kufwa. Watendekele kulanguluka pe Yesu awo wajinga muntu wawama ye aumvwine bantu saka bamushimikizha. Yelusa wayile na kumukeba. Wamutaine Yesu ku kitulu kya Kizhiba kya Ngalilea saka afunjisha bantu bavula.

Yelusa wapichile mu jibumba ja bantu ne kukafukama ku maulu a kwa Yesu. Wamwambijile amba: ‘Kana kami ka kakazhi kabela bingi. Mwane kine twayai mwikakwasheko!’ Ponkapotu, Yesu wayile ne Yelusa. Kabiji aja jibumba jaishile na kumona Mufunjishi Wayukisha najo jalondejile. Byo baendeleko pacheche, banabalume bamo bafumine ku nzubo ya kwa Yelusa bebabujile’mba: “Mwanenu wafwa: mwamukabishisha ka Mufunjishi ne pano?”

Yesu waumvwine byaambile bano bantu. Wayukile Yelusa byo aubile bulanda na mambo a kufwisha mwananji umotu. Wamwambijile’mba: Inge mube moyo ne. Ikalaitu na lwitabilo mwi Lesa ne mwanenu usa kwikalatu bulongo.’ Bailengatu ne byo bakafikile ku nzubo ya kwa Yelusa. Batainetu balunda nanji Yelusa babena kujila. Bajijilenga mambo mwana wafwile. Bino Yesu wibambijile’mba: ‘Kilekai kujila. Mwana kechi wafwa ne, walaala tulo.’

Yesu byo aambile bino, bantu batendekele kuseka mambo bayukile amba mwana wafwa. Pano, nga mambo ka Yesu kyo aambijile amba walaala? Ñanyi lufunjisho lo akebelenga kufunjisha bantu?— Wibabujile’mba lufu lujitu nobe kulaala tulo twine. Wakebelenga kwibafunjisha’mba kupichila mu bulume bwa Lesa, wakonsha kusangula muntu wafwa byonkatu byo twakonsha kubusha muntu walaala.

Yesu waambijile bonse kulupukamo mu nzubo kanatu batumwa banji abo ba Petelo, Yakoba, ne Yoano kabiji ne bansemi ya mwana. Kabiji wayile kwajinga mwana. Wamukwachile pa kuboko ne kwamba’mba: ‘Obewa kashimbi, buka!’ Ponkapotu wabukile kaende ne kwenda! Bashanji ne bainanji basekejile bingi.—Mako 5:21-24, 35-43; Luka 8:40-42, 49-56.

Pano akilangulukapo pa kino. Yesu byo asangwile uno kashimbi, nanchi wakonsha ne kusangula bakwabo bantu nyi?— Nanchi kine kine ukoba bino nyi?— Ee, byo byo akoba. Yesu waambile’mba: “Juba jibena kwiya, jo bakomvwa bonse baji mu bilende jiwi [jami] kepo bakafumamo.”—Yoano 5:28, 29.

Nanchi Yesu ukeba kusangula bantu nyi?— Kya kumwenako kikwabo kya mu Baibolo kitukwasha kukumbula buno bwipuzho. Kintu kyaubiwe juba jimo kwipi na muzhi wa Naina kimweshatu patoka Yesu byo eumvwa umvwe bantu ke bajile pa kijilo.

Mu uno muzhi mwajinga mwanamukazhi wafwishishe mwananji wamulume kabiji wajinga pa jibumba jayilenga na kuzhika uno mwana. Patanshi wafwishishe mwatawanji, kabiji pano mwananji umotu naye wafwile. Byo aubilepo bulanda! Jibumba ja bantu mu Naina jalondejilenga bantu basendele mufu saka bafuma mukachi ka muzhi. Uno mwanamukazhi wajijilenga bingi, kabiji bantu kechi bamutekeneshepo ne.

Jo juba Yesu ne baana banji ba bwanga jo bayilenga mu muzhi wa Naina. Byo bafikile pepi na kibelo kya muzhi, basambakene jibumba jayilenga na kuzhika mwana wa yewa mwanamukazhi. Yesu byo amumwene awa mwanamukazhi saka ajila, waumvwine bingi lusa. Kyamupile bingi ku muchima pa kumona byo aubile bulanda. Wakebelenga kumukwasha.

Wamwambijile na lusa amba: “Kilekai kujila inetu.” Byubilo byanji ne jishinda jo aambijilemo jalengejile bonse kubokamatu na kumutala. Yesu byoaile kwajinga mufu, bantu bafwainwa bamutajilengatu’mba tumone kyo asakuba. Yesu wakambizhe mufu amba: “Nsongwalume nakwambila namba, Buka.” Ponkapotu wabukile, waikala ne kwikala! Kabiji watendekele ne kwamba.—Luka 7:11-17.

Aki kilangulukepotu uno mwanamukazhi byo aumvwine! Wakonsha kumvwa byepi umvwe mulongo obe wasangulwa?— Nanchi kino kechi kimwesha’mba Yesu kine watemwa bantu kabiji ukeba kwibakwasha nenyi?— Byo kikawamapo mu ntanda ipya ya Lesa kutambwila bantu bakasangulwanga!—2 Petelo 3:13; Lumwekesho 21:3, 4.

Pa kyokya kimye pa bantu bakasangulwanga pakekala ne bo twayuka, kubikapotu ne banyike. Tukebayuka byonkatu Yelusa byo ayukile mwananji wamukazhi Yesu byo amusangwile. Bakwabo ke boba bafwile kala kene. Nangwa kya kuba bajingako kala kene, Lesa kechi ukebavulamako ne.

Kyawama bingi byo twayuka kuba’mba Yehoba Lesa ne Mwananji Yesu betutemwa bingi, ke ibyo nenyi?— Bakeba’mba twikalenga na bumi bwa myaka ne myaka!

Byambo bikwabo bitekenesha byanembwa mu Baibolo pa Isaya 25:8; Byubilo 24:15; ne 1 Kolinda 15:20-22.

[Bipikichala pa jipa 182]

Yehoba wamwesheshe byepi amba watemwa banyike?

[Kipikichala pa jipa 184]

Yesu byo asangwile mwana wamukazhi wa kwa Yelusa kitufunjishapo ka?

[Kipikichala pa jipa 186]

Lusanguko lwa uno mwana umotu wa mwanamukazhi lumwesha ka?