Yesu Wasangwile Kashimbi

Yelusa wamwene Yesu byo abukile mwanamukazhi wajinga na kikola kya kupita mashi. Onkao mambo, washiinwe’mba Yesu wakonsha ne kubuka mwananji wa mukazhi, nangwa kya kuba walangulukilenga’mba kampe ‘mwananji wafwa kala.’ (Mateo 9:18) Nanchi wakonsheshe kumukwasha nangwa saka afwa kala nyi?

Yesu byo akyambilenga na uno mwanamukazhi ye abukile, banabalume bamo bafumine ku nzubo ya kwa Yelusa baishile ne kumwambila’mba: “Mwanenu wa mukazhi wafwa! Nga mambo ka a kukatezha Mufunjishi?”—Mako 5:35.

Uno sawakya waletele bingi bulanda. Uno mwanamulume ye banemekele bingi mu nyaunda mo aikalanga byo bamubuujile’mba mwananji wamukazhi yenkatu ye ajinga nanji wafwa, bulume bwanji bwapwile. Bino Yesu byo aumvwine saka bamba bino byambo, watundaikile Yelusa amba: “Kwakamwa ne; ikalaitu na lwitabilo.”—Mako 5:36.

Yesu wayijile pamo ne Yelusa ku nzubo yanji. Byo bafikile ku nzubo ya kwa Yelusa, bataaine bantu bajijilenga mabingo ne kuwowakana. Bantu bavula bakonkene saka bajila ne kwipumpaula na mambo a bulanda. Yesu byo atwelele, waambile’mba: “Uno mwana kechi wafwa ne, walaalatu tulo.” (Mako 5:39) Bantu byo baumvwine kino, batatwile kuseka Yesu mambo bayukile’mba kashimbi wafwa. Byo aingijishe bulume bwamupele Lesa, Yesu wamwesheshe bantu kuba’mba wakonsha kusangula bantu byonkatu muntu byo akonsha kubusha mukwabo walaala.

Yesu wibalupwilemo bantu bonse kushamotu Petelo, Yakoba, Yoano, bashanji mwana ne bainanji. Yesu wayile na bano bantu batanu palaajile kashimbi. Byo amukwachile mwana pa kuboko, wamwambijile’mba: “Talifa kumi,” kulumbulula’mba: “Kashimbi, nakwambila namba, ‘Imana!’” (Mako 5:41) Ponkapotu uno kashimbi waimene ne kutatula kwenda. Kino kintu kyalengejile Yelusa ne mukazhanji kwikala na lusekelo lukatampe. Yesu pa kumwesha’mba uno kashimbi kya kine wasanguka, wakambizhe’mba bamupe kajo.

Bimye byavula, Yesu wakambizhanga bantu bo abukanga kubula kubuulako muntu nangwa umo byo ebobilanga. Abino byo byo abuujile ne bansemi ba uno kashimbi. Pano bino, bano bansemi basangalele bingi, kabiji abo ne bantu bakwabo bakumbenye nkuwa ya kino kyo aubile “mu yoya mpunzha yonse.” (Mateo 9:26) Umvwe yenu kyamwekejile, nanchi kechi mwakonsha kukumbanya nkuwa inge mutemwe wenu bamusangula nenyi? Luno lo lusanguko lwa bubiji lwaubile Yesu lwanembwa mu Baibolo.