Kitango 40

Byo Twakonsha Kusangajika Lesa

TWAKONSHA kuba byepi pa kuba’mba tumusangajike Lesa? Nanchi twakonsha kumupa kiji kyonse nyi?— Yehoba waamba’mba: “Banyama bonse ba mungye bo bami.” Kabiji waamba’mba: “Siliva ye wami, ne ngolode yo yami.” (Salamo 24:1; 50:10; Hagai 2:8) Pano bino, kuji kintu kimo kyo twakonsha kupana kwi Yehoba. Ki ka kyonkakyo?—

Yehoba wituleka atwe bene kwisajila kana twakonsha kumwingijilanga nyi, inyi kana ne. Kechi witukanjikizha amba tumwingijilenga ne. Pa kuba’mba tumwingijilenga nangwa kubula kumwingijila, akitwaya tumvwishe Lesa kyo etulengejile.

Kampe wayukapo minkinyi imo ingila mingilo yakonsha kwingila bantu. Ino minkinyi beilenga kuba’mba ingilenga mingilo yakonsha kwingila mwine wiilenga. Ne Yehoba naye wakonsheshe kwitulenga nobe ino minkinyi. Wakonsheshe kwitulenga kuba’mba tubengatu byonka byo akeba. Pano bino, Lesa kechi byo byo aubile ne. Nanchi wayuka kyo abujile kubila bino nyi?— Byo biji ne twakukaisha tumo nato, tujitu nobe minkinyi yaambiwapo peulu po. Umvwe bachintapo pamo, minkinyi yuba bintu kwesakana na mo beilengela. Abya wakimonapo kala ka kukaisha kaji bino nyi?— Javula bantu batendeka kumvwa mukose umvwe kintu kyo babena kukaisha saka kyubatu bintu bimo kwesakana na mo bekilengela. Lesa kechi ukeba amba tumukokelenga byonka biji minkinyi yuba bintu kwesakana na mo beilengela ne. Yehoba ukeba’mba tumwingijilenga mambo twamutemwa kabiji tukeba kumukokela.

Shetu wa mwiulu umvwa byepi umvwe twamukokela?— Aki mbule, byubilo byobe bilengela bansemi bobe kumvwa byepi?— Baibolo washimuna amba mwana wa maana “ulengela shanji kusekela” pakuba mwana wakosama “uletela inanji bulanda.” (Byambo bya Mana 10:1) Nanchi wayuka’mba umvwe ke ube bikeba bainobe ne bashobe, kibalengela kusekela nyi?— Pano bakonsha kumvwa byepi umvwe ke ubule kwibakokela?—

Pano akitwaya twisambe pe Shetu wa mwiulu, Yehoba. Witubula byo twakonsha kuba pa kuba’mba tumusangajikenga. Akitola Baibolo obe uzhikule pa Byambo bya Mana 27:11. Lesa ubena kwamba kotuji amba: ‘Mwanami, wikale wa maana, usangajike muchima wami, namba mmone mwa kumukumbwila awa uñendeleka.’ Nanchi wayuka byo kilumbulula kwendeleka muntu nyi?— Bakonsha kuba ke bakwendeleke umvwe ke bakuseke amba wakankalwa kuba byo ubakebenga kuba. Nga Satana wendeleka byepi Yehoba?— Akitwaya tumone.

Vuluka byo twafunjile mu Kitango 8 kya uno buku. Twafunjile kuba’mba Satana ye ukebatu kwikala mutanshi kabiji ukeba’mba bantu bonse bamukokelenga. Satana wamba’mba bantu bapopwela Yehoba mambo ukebapa bumi bwa myaka ne myaka. Satana wazhinaukilenga Lesa kabiji walengejile ba Adama ne Evwa kusatukila Yehoba. Satana waambijile Lesa amba: ‘Bantu bemwingijila mambo a kuba paji byo mwibapa. Akindekaitu mumone byo nsakwibalengela bonse kwimusatukila.’

Bino byambo kechi byo biji mu Baibolo ne. Pano bino umvwe twatanga jishimikila ja kwa Yoba, kimwekanyikatu patoka kuba’mba Satana byo byo aambilenga kwi Lesa. Kyakebewenga kuyukanyikwa bulongo ku bonse babiji Satana ne Yehoba, kana Yoba wajinga wakishinka kwi Lesa nyi, nangwa ne. Akizhikula mu Baibolo pa Yoba Kitango 1 ne 2 tumone kyamwekele.

Akimona byaambiwa mu Yoba kitango 1, Satana wajinga ponka mwiulu kimye bamalaika kyo bemwesheshe ku meso a Yehoba. Yehoba wamwipwizhe Satana amba: “Wafuma pi?” Satana wakumbwile amba wafuma na kwendauka panopantanda. Yehoba wamushikishe amba: ‘Bino wayuka kuba’mba Yoba ungakamwa kabiji kechi uba bintu byatama nenyi?’—Yoba 1:6-8.

Satana wapampile pa kanwa amba: ‘Yoba wimupopwela mambo kechi upita mu makatazho ne. Umvwe muleke kumuzhikijila ne kumupesha, usa kwimunena mwenga konka ku meso enu.’ Yehoba wakumbwile amba: ‘Kyawama, uba byonse byo ubena kukeba kwi Yoba, pano bino kumukozha aye mwine ne.’—Yoba 1:9-12.

Satana waubilepo byepi?— Walengejile bangivi kwiba bañombe ne bambongolo ba kwa Yoba kabiji baipaile ne boba balaminenga bano banyama. Kalumba kaipaile mikooko ne bantu beilaminenga. Kabiji kwaishile bangivi baibile bangamela ne kwipaya bantu balaminenga bano bangamela. Kyapeleleko, Satana walengejile luvula kukundula nzubo mwajinga baana jikumi ba kwa Yoba kabiji bonsetu bafwile. Nangwa kya kuba kwajinga byonse bye, Yoba watwajijiletu na kwingijila Yehoba.—Yoba 1:13-22.

Yehoba byo amumwene Satana, waambile amba Yoba ke muntu walumbuluka bingi. Satana waambile’mba: ‘Umvwe mundeke nkwate pa mubiji wanji, ukemunena mwenga konka ku meso enu.’ Yehoba wamulekele Satana amba akwate pa mubiji wa kwa Yoba, pano bino amba kechi wafwainwa kumwipaya ne.

Satana wamanyikile Yoba na bipote byatumbile mubiji yense. Bino bilonda byanunkilenga bingi mambo kafwako nangwa umo wafwenyenyenga kwipi ne. Nangwatu muka Yoba wamwambijile’mba: “Munenai Lesa mwenga, mufwe.” Kabiji aba bebepekezhenga kwikala balunda nanji Yoba baishile na kumumona kabiji bamufichishe bingi ku muchima byo baambilenga amba Yoba wafwainwa walenga mambo akatampe bingi kyo kyo abena kumanamina. Nangwa kya kuba’mba Satana wamumanyikilenga, Yoba watwajijiletu kwikala walumbuluka ku meso a Yehoba.—Yoba 2:1-13; 7:5; 19:13-20.

Yoba byo atwajijile kwikala walumbuluka walengejile Yehoba kumvwa byepi?— Kyamulengejile kusekela mambo Yehoba wamwambijile Satana amba: ‘Akimona! Yoba ungakamwa mambo aye mwine byo byo akeba.’ Nanchi ne obewa wakonsha kwikala byonka byajinga Yoba, kwikala kya kumwenako Yehoba kyo akonsha kwingijisha kumwesha amba Satana wa bubela nyi?— Ee, kyawama bingi kumukumbula Satana amba wa bubela byo amba’mba wakonsha kulengela bantu bonse kusatukila Yehoba. Yesu wanemekele bingi kino.

Mufunjishi Wayukisha kechi walekele Satana amba amulengele kuba bintu byatama ne. Yesu wasangajikile bingi Shanji! Na mambo a kino, Yehoba wamwambijile Satana amba: ‘Akimona Mwanami! Watwajijilatu kwikala wakishinka mambo wantemwa.’ Kabiji Yesu wasekejile bingi pa kusangajika muchima wa Shanji. Luno lusekelo lo lwamulengejile Yesu kuchinchika lufu lwa pa kichi kya lumanamo.—Bahebelu 12:2.

Nanchi ne obewa ukeba kwikala byonka byajinga Mufunjishi Wayukisha ne kumusangajika Yehoba nyi?— Twajijila na kufunda bikeba Yehoba, kabiji ukamusangajikanga umvwe ke ube bino.

Tanga byaubile Yesu pa kuba’mba asangajike Lesa kabiji ne atweba byo twafwainwa kuba, pa Byambo bya Mana 23:22-25; Yoano 5:30; 6:38; 8:28; ne 2 Yoano 4.

[Kipikichala pa jipa 207]

Mambo ka Lesa o abujile kwitulengela nobe iwe munkinyi?

[Kipikichala pa jipa 208]

Wakonsha kusangajika byepi Yehoba ne bansemi bobe?

[Kipikichala pa jipa 209]

Ba Adama ne Evwa byo balengele mambo, Satana wamuzhinaukilenga Yehoba amba ka?

[Kipikichala pa jipa 210]

Bintu ka Yoba byo achinchikile, kabiji mambo ka o kyasangajikile muchima wa Lesa?