Yoba Wanemekele Jizhina Ja Yehoba

“Jitotwe jizhina ja Yehoba.”—YOBA 1:21.

1. Ñanyi wanembele Buku wa Yoba, kabiji kimye ka?

MOSESA wajinga pepi na myaka 40 kimye kyo anyemene mu Ijipita ne kuvilukila ku Mijanyi kuchina amba bakamwipaya kwi Felo. (Byu. 7:23) Byo aikelenga mu yoya ntanda, wafwainwa waumvwine meseko apichilengamo Yoba waikalanga mu kyalo kya Uze kyajinga kipikipi. Byo papichileko myaka, Mosesa wafwainwa waumvwine ino nkuwa ya bwikalo bwapeleleko bwa kwa Yoba kimye Mosesa ne mukoka wa bena Isalela byo bajinga kwipi na kyalo kya Uze ku mpelo ya lwendo lwabo lwa mu kiselebwa. Kwesakana na mwayijile kisho kya Bayudea, Mosesa wanembele Buku wa Yoba panyumatu ya lufu lwa kwa Yoba.

2. Mu ñanyi mashinda buku wa Yoba mo atundaikila bakalume ba Yehoba ba mu ano moba?

² Buku wa Yoba ukosesha bingi lwitabilo lwa bakalume ba Lesa ba mu ano moba. Mu ñanyi mashinda? Jishimikila jitukwasha kumvwisha bintu byanema byamwekele mwiulu kabiji jaamba pa mambo a bumfumu bwa Lesa bwa pa bilengwa byonse. Jishimikila ja kwa Yoba jitulengela kumvwisha kyavwangwa mu kwikala bakishinka kabiji ne kwitukwasha kumvwisha ene mambo kimye kimo Yehoba kyo aswishisha bakalume banji kumanama. Kunungapo, buku wa Yoba ulumbulula Satana Diabola kwikala mulwanyi mukatampe wa Yehoba ne bantu. Uno buku umwesha ne kuba’mba bantu babula kulumbuluka nobe Yoba bakonsha kutwajijila kwikala bakishinka kwi Yehoba nangwa kya kuba bapita mu meseko akatampe. Twayai tubalaule bintu bimo byamwekele byatongolwa mu buku wa Yoba.

Yoba Waesekwa na Satana

3. Twayukapo ka pe Yoba, kabiji mambo ka Satana kyo amulukukijile?

³ Yoba wajinga munonshi kabiji wayile nkuwa, nsemi wajinga na byubilo byawama. Wajinga muntu wapananga maana wanemene bingi kabiji wakwashanga bakajilwa. Kyakijilemo kunema, Yoba wajinga na moyo wa kwakamwa Lesa. Yoba walondololwa’mba “wajinga walumbuluka ne waoloka, waakaminwe Lesa, ne kuvundamina wavundamijile ku bubi.” Munema wa kunemeka Lesa ye walengejile’mba Yoba bamulukuke kwi Satana Diabola, kechi bunonshi bwanji nangwa kuya nkuwa ne.—Yoba 1:1; 29:7-16; 31:1.

4. Bukishinka bo buka?

⁴ Buku wa Yoba patanshi waamba pa kushonkena kwa bamalaika ku meso a Yehoba kwajingako mwiulu. Satana naye washinkilweko, kabiji wapelemo Yoba mambo. (Tangai Yoba 1:6-11.) Nangwa kya kuba Satana waambile pa bunonshi bwa kwa Yoba, bino wakebelenga konauna bukishinka bwa kwa Yoba. Kyambo kya “bukishinka” kilumbulula kwikala wabula mambo, waoloka, kabiji wabula kaneneno. Byonka Baibolo byo aambapo, bukishinka bulumbulula kwipana kwa muntu na muchima yense kwi Lesa.

5. Satana waambilepo’mba ka pe Yoba?

⁵ Satana waambile’mba Yoba wapopwelanga Lesa na mambo a kajiilo, kechi na bukishinka ne. Satana wakoselepotu popolo amba Yoba wakonsheshe kwikalatu na bukishinka umvwe Lesa watwajijila kumufweta ne kumuzhikijila. Pa kumwesha kuba’mba Satana wa bubela, Yehoba waswishishe Satana kulukuka uno muntu wa kishinka. Mu jubatu jimo, Yoba waumvwine’mba banyama banji bo alelele bebeba nangwa’mba baonaunwa, bamwingilo banji bebepaya, kabiji ne baana banji jikumi bafwa. (Yoba 1:13-19) Nanchi kulukuka kwa kwa Satana kwaonawine bukishinka bwa kwa Yoba nyi? Jishimikila janembelwe na mupashi jalumbulula byaubile Yoba pa ano malwa amba: “Yehoba ye wampelebyo, kabiji Yehoba yenka ye wañangatabyo. Jitotwe jizhina ja Yehoba.”—Yoba 1:21.

6. (a) Ki ka kyamwekele pa kushonkena kukwabo kwajingako mwiulu? (b) Bañanyi bo alangulukilengapo Satana byo azhinaukile bukishinka bwa kwa Yoba?

⁶ Palutwe kacheche kwajinga kushonkena ne kukwabo mwiulu. Satana walengulwile Yoba ne kwaamba’mba: “Kikoba pa kikoba kikwabo, byonse byo aji nabyo muntu ukebipana mu kupulusha mweo wanji. Bino umvwe mutanyike kuboko kwenu ne kukwata ku bikupa byanji ne pa mubiji wanji aye ukemunena mwenga konka ku meso enu.” Satana wavwangilemo ne bantu bakwabo mu myendeleko yanji. Pa kwaamba’mba, “Byonse byo aji nabyo muntu ukebipana mu kupulusha mweo wanji,” Diabola kechi wazhinaukiletu bukishinka bwa kwa Yoba ne, wazhinaukile ne bukishinka bwa ‘bantu’ bonse bapopwela Yehoba. Kepo Lesa aswishishe Satana kumanyika Yoba na kikola kikatampe. (Yoba 2:1-8) Ano kechi o onkatu meseko a kwa Yoba ne.

Twafunjilako ka ku Byaubile Yoba

7. Mu ñanyi jishinda mukazhanji Yoba ne benyi mo bamukabishishenga Yoba?

⁷ Patanshitu, mukazhanji Yoba naye wapichile mu binkunka byonka byapichilemo mwatawanji. Kufwisha baana, ne konaunwa kwa bunonshi bwa kisemi byafwainwa byamulengejile kumvwa ku muchima kutama. Kabiji kyafwainwa kya mukolele bingi ku muchima pa kumona mwatawanji saka ayanda na kikola kikatampe. Waambijile Yoba’mba: ‘Nanchi ne pano mwakikakelatu ku kulumbuluka [nangwa’mba ku bukishinka] bwenu nyi? Munenai Lesa bya mwenga, mufwe!’ Kabiji, kwaishile bantu basatu, ba Elifwaza, Bilidada, ne Zofwala na kutekenesha Yoba. Bajinga na ndangulukilo ya bujimbijimbi kabiji bajinga “ba kutekenesha balengela mukose.” Kya kumwenako, Bilidada waambile’mba baana ba kwa Yoba bevwangile mu byubilo byatama kabiji bafwainwe kyonka kibamwekejile. Elifwaza waambile kuba’mba Yoba wamanaminenga na mambo a bundengamambo bo aubile kunyuma. Kabiji wazhinaukile ne boba balama bukishinka umvwe Lesa wibanemeka! (Yoba 2:9, 11; 4:8; 8:4; 16:2; 22:2, 3) Mu ano makatazho onse, Yoba walamine bukishinka bwanji. Kya kine, watamishe byo “ebingishishe mwine kechi wamubingishishe Lesa ne.” (Yoba 32:2) Nangwa byonkabyo, watwajijile na bukishinka mu byonsetu.

8. Kya kumwenako ka kyawama kyamwesheshe Elihu ku bapana lujimuno lelo jino?

⁸ Kyalondelapo, tutanga pa mambo a kwa Elihu, naye waishile na kupempula Yoba. Elihu watelekelenga byambo byaambilenga Yoba ne balunda nanji basatu. Nangwa kya kuba wajinga mwanyike pa boba banabalume bana, Elihu wamwesheshe maana akatampe. Waambile ne Yoba na mushingi, kupichila mu kumutela pa jizhina. Elihu watakaikile Yoba pa mambo a bololoke bwanji. Kabiji waambile’mba Yoba witentemeshenga mwine amba ke muntu umo wabula bujimbijimbi. Elihu wabujishetu Yoba amba kwingijila Lesa mu bukishinka kimye kyonse kwanema bingi. (Tangai Yoba 36:1, 11.) Kino ke kya kumwenako kyawama bingi ku boba bakeba kupana lujimuno lelo jino! Elihu wamwesheshe butekanye, kutelekesha bulongo, kutakaika umvwe kyakonsheka, kabiji wapaine ne lujimuno lukoseshañana.​—Yoba 32:6; 33:32.

9. Yehoba wamukwashishe byepi Yoba?

⁹ Kyapeleleko, Yoba wamwene kintu kyakukumya kimye Yehoba aambile nanji! Jishimikila jaamba’mba: “Yehoba wamukumbwile Yoba monka mu kinkunkwila.” Yehoba mu lusa lwanji waingijishe mepuzho alondankana, kujimunako Yoba amba olole ndangulukilo yanji. Yoba wakokejile lujimuno ne kwamba’mba: “Amiwa ne muntu watu . . . Nalapila saka nepukula mu lukungu ne mu buto.” Yehoba byo apwishishe kwaamba ne Yoba, wakajipijile balunda nanji basatu, mambo kechi baambile “bya kine” ne. Yoba wibalombejileko. Kabiji “Yoba, byo ebalombejile balunda nanji, Yehoba wamushamunwine ke pamotu na kala; kabiji Yehoba wamupele Yoba bintu byavula kukila pa byo ajinga nabyo kala, pa kintu kimo bibiji, pa kintu kimo bibiji.”—Yoba 38:1; 40:4; 42:6-10.

Twamutemwa Yehoba Kufika pa Ñanyi Kipimo?

10. Mambo ka Yehoba kyo abujile kumulekatu nangwa kumonauna Satana?

¹⁰ Yehoba ye Mfumu Mulenga wa bintu byonse. Mambo ka o abujile kulubakotu ku mambo amupelemo Diabola? Lesa wayukile kuba’mba kulekatu nangwa konauna Satana kechi kwakonsheshe kupwisha ano mambo ne. Diabola waambile’mba Yoba, muntu wa bukishinka kechi wakonsheshe kutwajijila na bukishinka umvwe bamwangata bunonshi bo ajinga nabo ne. Yoba watwajijile na bukishinka kechi na mambo a meseko ne. Bino Satana wakoselepotu’mba muntu yense wakonsha kuvundamina Yehoba umvwe wamanama. Yoba wamanamine, bino kechi watayile bukishinka bwanji ne. Onkao mambo Satana washiinwe kuba’mba wa bubela na mambo a lwitabilo lwa kwa Yoba nangwa kya kuba wajinga wabula kulumbuluka. I byepi bapopweshi bakwabo ba Lesa?

11. Yesu wamwesheshe byepi amba Satana wa bubela?

¹¹ Yense kalume wa Lesa ulama bukishinka bwanji nangwa kya kuba Satana alete kiji byepi nangwa byepi umwesha amba, awe mulwanyi wakanama wa bubela. Yesu waishile panopantanda kabiji wamwesheshe patoka kuba’mba Satana wabubela. Yesu wajinga muntu walumbuluka, byonka byajinga shetu mutanshi, Adama. Lwitabilo lwa kwa Yesu kufikatu ne kulufu lumwesha amba Satana wa bubela ne kuba’mba kushinawina kwanji kwa bubela.—Lum. 12:10.

12. Kalume wa Yehoba yense uji na ñanyi mutembo?

¹² Nangwa byonkabyo, Satana watwajijila kweseka bapopweshi ba Yehoba. Atweba bonse tuji na mutembo wa kwingijila Yehoba mu bukishinka mambo twamutemwa, kechi na mambo a bintu byo etupa ne. Tumwesha byepi uno mutembo? Kyanema bingi kwikala bakishinka kwi Yehoba. Kabiji kitutekenesha bingi kuyuka’mba Yehoba witupa bulume bwa kuchinchika, byonka byo kyajinga kwi Yoba, kuba’mba kechi wituleka’mba tumone lweseko lwakila pa bulume bwetu ne.—1 Ko. 10:13.

Satana ke Nsatuki Wakatazha

13. Buku wa Yoba waambapo amba ka pe Satana?

¹³ Binembelo bya Kihebelu byaambapo pa byubilo byatama bya kwa Satana bya kupamo Yehoba mambo ne kutwala bantu mungi. Mu Binembelo bya bena Kilishitu bya Kingiliki, tutanamo byambo byavula bya kwa Satana bya kwendeleka Yehoba, kabiji mu buku wa Lumwekesho, tufundamo kuba’mba katatakatu bumfumu bwa Yehoba bukatumbijikwe ne konaunwa kwa kwa Satana. Buku wa Yoba witulengela kuyukisha bunsatuki bwa kwa Satana. Satana byo ashinkilwepo pa kushonkena mwiulu, kechi watainweko na nkebelo ya kupopwela Yehoba ne. Diabola wajinga na byubilo byatama kabiji byakanama. Panyuma ya kupamo Yoba mambo ne kutambula lūsa lwa kumweseka, “Satana wafumine ku meso a Yehoba.”—Yoba 1:12; 2:7.

14. Satana wamwesheshe ñanyi byubilo kwi Yoba?

¹⁴ Buku wa Yoba uyukanyikisha Satana kwikala mulwanyi wakanama wa bantu. Pa kushonkena ko baambapo mu Yoba 1:6 ne kokwa kwa mu Yoba 2:1, papichile kimye kyabula kuyukanyikwa Yoba kyo amanyikijilwengamo pakatampe. Lwitabilo lwa kwa Yoba lwalengejile Yehoba kwambila Satana’mba: “Kabiji ne panotu ukijitu walumbuluka [wa kishinka] nangwa obewa wantundaikile amiwa mu kumonauna pa kubula mambo.” Bino Satana kechi waswile kuba’mba Yoba wamubepejiletu ne. Wakambizhe kuba‘mba Yoba bamweseke ne jikwabo. Onkao mambo Diabola waesekele Yoba kimye kyo ajinga munonshi ne kimye ajinga muyanji. Kyamwekeshatu patoka kuba’mba, Satana kechi ujipotu nangwa na lusa ku balanda nangwa baponenwa na bya malwa ne. Washikwa bantu bakishinka. (Yoba 2:3-5) Nangwa byonkabyo, lwitabilo lwa kwa Yoba lwamwesheshe kuba’mba Satana wa bubela.

15. Miteeto ka iji na bamo basenduka mu lwitabilo ba mu ano moba ijipo ne Satana?

¹⁵ Satana ye wajinga kilengwa kitanshi kusatuka. Bantu basenduka mu lwitabilo ba mu ano moba bamwesha miteeto ipasha na ya kwa Diabola. Mu michima yabo bakonsha kuba ke balengulule bakwabo mu kipwilo, bakulumpe mu kipwilo kya bwina Kilishitu, nangwa Jibumba Jitangijila. Basenduka mu lwitabilo bamo bakana kwingijisha jizhina ja Lesa ja kuba’mba Yehoba. Kechi bakeba kufunda pe Yehoba nangwa kumwingijila ne. Byonka biji shabo, Satana, basenduka mu lwitabilo bakeba konauna bukishinka bwa bantu. (Yoa. 8:44) Oene mambo bakalume ba Yehoba kyo bachinuzhukila kwipapika nabo!—2 Yoa. 10, 11.

Yoba Watumbijikile Jizhina ja Yehova

16. Yoba wanemekele byepi Yehoba?

¹⁶ Yoba waingijishanga jizhina ja Yehoba kabiji wamutotanga. Ne kimyetu kyo atambwijile mawi atama a lufu lwa baana banji, Yoba kechi wamunenene Yehoba amba mwauba kyatama ne. Nangwa kya kuba Yoba walangulukile kuba’mba lufu lwafumine kwi Lesa, wanemekele jizhina ja Yehoba. Kabiji Yoba waambile kishimpi amba: ‘Umvwai! Kumwakamwa Yehoba, ao o maana, ne kufuma ku bubi ayo yo milangwe.’—Yoba 28:28.

17. Ki ka kyakwashishe Yoba kulama bukishinka bwanji?

¹⁷ Ki ka kyakwashishe Yoba kulama bukishinka bwanji? Kwambatu kine, bya malwa saka bikyangye kumweka, bulunda bwanji ne Yehoba bwakosele bingi. Nangwa kya kuba kechi tuji na bishinka bimwesha amba Yoba wayukile’mba Satana wamupelemo Yehoba mambo ne, Yoba watwajijile kwikala wa kishinka. Waambile’mba: “Kufika ne ku juba jo nkafwa nkekalangatu walumbuluka [nangwa’mba wa kishinka]!” (Yoba 27:5) Yoba waikajile byepi na buno bulunda? Kwakubula nangwa kuzhinaukatu ne, wanemekele byo aumvwine Lesa byo aubile na balongo banji baikajilenga kwalepa ba Abalahama, Izaka, ne Yakoba. Kabiji bilengwa byamulengejile Yoba kuyuka byavula pe Yehoba.—Tangai Yoba 12:7-9, 13, 16.

18. (a) Yoba wamwesheshe byepi kwipana kwanji kwi Yehoba? (b) Mu ñanyi mashinda mo tulondela kya kumwenako kyawama kya kwa Yoba?

¹⁸ Yoba byo afunjile byamulengejile kukebesha kutokesha Yehoba ku muchima. Kimye kyonse wapananga milambo amba kampe ba mu kisemi kyanji baubapo kintu kimo kibula kutokesha Lesa pa muchima nangwa kampe “balenga mambo ne kumuba mwenga Lesa mu michima yabo.” (Yoba 1:5) Nangwatu byo apichilenga mu meseko, Yoba kechi waambile kyatama pe Yehoba ne. (Yoba 10:12) Byo aikalapo wa kumwenako wawama! Netuwa twafwainwa kufundanga maana a kuyuka Yehoba ne nkebelo yanji kimye kyonse. Tuji na muteeto wawama witulengela kwikala na bulunda bwakosa ne Yehoba nabiji lufunjisho, kutanwa ku kupwila, lulombelo, ne kusapwila mambo awama. Nangwa byonkabyo, tweseka papelela bulume bwetu kuyukanyikisha jizhina ja Yehoba. Byonka bukishinka bwa kwa Yoba byo bwatokeshe Yehoba pa muchima, ne bukishinka bwa bakalume ba Lesa lelo jino busangajika muchima wa Yehoba. Kino bekyambapo mu mutwe walondelapo.

Mukivuluka nyi?

•Mambo ka Yoba kyo akebwijile Satana Diabola?

• Ñanyi meseko Yoba o achinchikile, kabiji waubilepo byepi?

• Ki ka kyakonsha kwitukwasha kutwajijila bakishinka byonka byaubile Yoba?

• Twafundapo ka pe Satana kufuma mu buku wa Yoba?

[Kipikichala pa peja 4]

Jishimikila ja kwa Yoba jitukwasha kumvwisha bumfumu bwa Lesa bwa pa bilengwa byonse.

[Kipikichala pa peja 6]

Bukishinka bwenu bwakonsha kwesekwa mu ñanyi mashinda?