KIPUNGU 6

Yoba Watwajijile Kwikala Wakishinka

Satana wazhinaukile bingi bukishinka bwa kwa Yoba bo ajinga nabo kwi Lesa. Nangwa byonkabyo, Yoba watwajijile kwikala wakishinka kwi Yehoba

NANCHI kujipo muntu wakonsha kutwajijila kwikala wakishinka kwi Lesa inge bumi bwanji buji mu kizumba nyi? Abya wakonsha kutwajijila kwikala wakishinka inge kya kuba kafwako kyawama kyo akamwenamo mu kukookela Lesa nyi? Abuno bo bwipuzho bwaipwizhe Satana kabiji Yoba wibukumbwile kupichila mu bukishinka bwanji.

Yoba wajinga mulongo wa kwa Abalahama kabiji waikalanga mu Alabya kimye bena Isalela kyo bajinga mu Ijipita. Pa kyokya kimye, bamalaika bakonkene kwi Lesa ne Satana nsatuki naye wajinga ponka. Bonse byo bakonkene mwiulu, Yehoba wabuujile bamalaika kuba’mba wamutemwa bingi Yoba na mambo a bukishinka bwanji. Yehoba waambile’mba kafwako muntu mukwabo uji na bukishinka biji Yoba ne. Pakuba Satana waambile’mba, Yoba waingijilenga Lesa na mambo a kuba’mba Lesa wamupesheshe ne kumuzhikijila. Satana watazhizhe mu kuba’mba inge kya kuba bintu byonse byajinga ne Yoba mwamwangatabyo, usakwimwalukamo.

Lesa waswishishe Satana kulengela Yoba kwikala muyanji, kumwipayila baana banji ne kumuletela kikola kyatama bingi. Yoba byo abujile kuyuka ene mambo bintu byatama o byamumwekejilenga, kyamupezhezhe bingi maana ene mambo Lesa o amuswishishe kupita mu ano makatazho onse. Nangwa byonkabyo, Yoba kechi wapeelemo mambo Lesa ne.

Balunda basatu baishile kwi Yoba. Byambo byavula biji mu buku wa Yoba, abano banabalume bakebeshe bingi kushiina Yoba kuba’mba Lesa ye ubena kumumanyika kyamweka walengele mambo mu bufyamfya. Kabiji baambile ne kuba’mba Lesa kechi wibatemwa bakalume banji ne kwibaketekela ne. Pakuba Yoba wakaine byo baambilenga. Kufuma panshi ya muchima, Yoba waambile’mba nkatwajijila kwikala wakishinka kufikatu ne byo nkafwa!

Pano bino, Yoba walubankenye. Waesekele bingi kumwesha’mba aye waoloka. Ponkapo nsongwalume wa jizhina ja Elihu watelekelengatu byo bepachikilenga, waimene ne kutendeka kwamba kuba’mba ololeko Yoba ne balunda nanji ba bubela pa byo baambilenga. Elihu wakwashishe Yoba kuba’mba kutumbijika bumfumu bwa Yehoba Lesa kwanema bingi kukila kutumbijika muntu. Kabiji Elihu wakajipijile bingi balunda ba bubela ba kwa Yoba.

Kepo Yehoba Lesa aambile ne Yoba pa kuba’mba amukwashe kumwenanga bintu mu jishinda jawama. Yehoba wisambile ne Yoba pa bilengwa kabiji wamukwashishe kuyuka’mba muntu kechi waesakana pamo na Lesa ne. Yoba waswile na muchima yense byo bamolweleko kwi Lesa. Yehoba byo aji wa “kifyele ne lusa” wabukile Yoba ne kumunungilapo pa bunonshi bwanji bwa kala ne kumupa baana 10. (Yakoba 5:11) Yoba wajinga wakishinka kwi Yehoba byo apichilenga mu makatazho. Kabiji Yoba washinawijile Satana kuba’mba wa bubela kimye kyo aambile’mba kafwako muntu wakonsha kwikala wakishinka kwi Lesa inge ke apita mu meseko ne.

Byafuma mu buku wa Yoba.

◼ Satana waambile’mba ka pe Yoba?

◼ Ñanyi bintu byafumine mu bukishinka bwa kwa Yoba kwi Yehoba?

[Kitenguluzha]

NANCHI BYAAMBILE SATANA BYA KINE NYI?

Byambo bya kuba’mba Yoba wajinga muntu wakishinka bingi kabiji waakamwanga Lesa kukila bantu bajingako pano pa ntanda kabiji waingijilenga Yehoba na mambo a bintu byo ajinga nabyo, Satana walumbulwilenga’mba bantu bonse pano pa ntanda ne bamalaika bengijilatu Lesa na mambo a bintu byo ebapa. Onkao mambo, ino ñambilo ya kwa Satana yamwesheshenga’mba bantu bonse kechi bakonsha kwikala bakishinka kwi Yehoba ne. Ano o mambo Satana o akolomwene mu bujimi bwa Edena. Wazhinaukile bingi luusa ne bololoke bwa Yehoba. Pakuba buku wa Yoba wamwesha kuba’mba bamalaika ne bantu bakonsha kutumbijika jizhina ja Yehoba inge batwajijila kwikala bakishinka kwi aye.

[Chati]

Ntendekelo

Kulupuka

Bena Levi

Kubala

Mpitulukilo ya mu Mizhilo

Yoshua

Mitonyi

Luta

1 Samwela

2 Samwela

1 Bamfumu

2 Bamfumu

1 Byambo bya Moba

2 Byambo bya Moba

Ezela

Nehemiya

Eshita

Yoba ●

Masalamo

Byambo bya Maana

Musapwishi

Lwimbo wa Solomone

Isaya

Yelemiya

Majilo a Yelemiya

Ezikyo

Danyela

Hoseya

Yoela

Amosi

Obadiya

Yona

Mika

Nahumi

Habakuka

Zefwaniya

Hagai

Zekaliya

Malakai

Mateo

Mako

Luka

Yoano

Byubilo

Loma

1 Kolinda

2 1 Kolinda

Ngalatiya

Efisesa

Filipai

Kolose

1 Tesalonika

2 Tesalonika

1 Timoti

2 Timoti

Titusa

Filemonyi

Bahebelu

Yakoba

1 Petelo

2 Petelo

1 Yoano

2 Yoano

3 Yoano

Yuda

Lumwekesho