Mambo ka Lesa o Aswishisha Bubi ne Buyanji?

1. Bubi bwatendekele byepi?

Bubi pano pa ntanda bwatendekele kimye Satana kyo abepele bubela butanshi. Satana wajinga malaika walumbuluka, pano bino ‘kechi watwajijile kwikala mu bukine ne.’ (Yoano 8:44) Watendekele kukumbwa mpopwelo yafwainwetu kuya kwi Lesa kwapwa. Satana wabepele mwanamukazhi mutanshi Evwa, ne kumujimbaika kuba’mba amukokele, mu kifulo kya kukokela Lesa. Adama naye waumvwijile Evwa ne kusatukila Lesa. Kufuukula kwa kwa Adama kwaleta buyanji ne lufu.—Tangai Ntendekelo 3:1-6, 17-19.

Satana byo aambijile Evwa kusatukila Lesa, wamutundaikilenga kusatukila bumfumu bwa Lesa, nangwa’mba bukalama bwa Mwine Wakila. Bantu bavula balondela Satana mu kukana’mba Lesa kechi ye Kalama wabo ne. Mu jino jishinda, Satana waikala ke “mfumu wa pano pa ntanda.”—Tangai Yoano 14:30; 1 Yoano 5:19.

2. Nanchi bilengwa bya Lesa byalengelwe byabula kulumbuluka nyi?

Mingilo ya Lesa yonse yalumbuluka. Lesa byo alengele bantu ne bamalaika, wibalengele balumbuluka bakonsha kukokela mikambizho yanji. (Mpitulukilo ya mu mizhilo 32:4, 5) Lesa witulengele na lūsa lwa kwifuukwila kuba kyawama nangwa kyatama. Buno bwanabwabene bwitulengela kumwesha butemwe bwetu pe Lesa.—Tangai Yakoba 1:13-15; 1 Yoano 5:3.

3. Mambo ka Lesa o aswishisha buyanji?

Yehoba waswisha buno bunsatuki bwa kusatukila bumfumu bwanji pa kakimye kacheche. Mambo ka? Pa kuba’mba bantu bayuke’mba kechi bakonsha kwilama bulongo kwakubula aye ne. (Musapwishi 7:29; 8:9) Pa myaka 6,000 yapitapo ya bukalama bwa bantu, kino kyamwekeshatu patoka. Bukalama bwa bantu bwakankalwa kupwisha nkondo, bumbanzhi, nshiji ne bikola.—Tangai Yelemiya 10:23; Loma 9:17.

Kupusanako na bukalama bwa bantu, aba baswa bukalama bwa Lesa bamwenamo byawama. (Isaya 48:17, 18) Katatakatu Yehoba akonaune makafulumende a bantu onse ajipo. Bantu basalapo kulamwa ne Lesa bo bonkatu bakekala pano pa ntanda.—Isaya 11:9.—Tangai Danyela 2:44.

4. Lesa byo etutekenya witupa kimye kya kuba ka?

Satana waambile’mba bantu kechi bengijila Yehoba kyatu ne. Nanchi mwakonsha kulengela buno bubela kulaala patoka nyi? Mwakonsha kuba bino. Lesa byo etutekenya witupa atweba bonse kimye kya kusalapo bukalama bwa Lesa nangwa bwa bantu. Bwikalo bwetu bo bumwesha bukalama bo twasalapo.—Tangai Yoba 1:8-12; Byambo bya Mana 27:11.

5. Tusala byepi Lesa kwikala Kalama wetu?

Twakonsha kusala Lesa kwikala Kalama wetu inge twakeba mpopwelo ya kine ne kuba byanembwa mu Mambo a Lesa, Baibolo. (Yoano 4:23) Kabiji twakonsha kukana bukalama bwa kwa Satana kupichila mu kubula kwivwanga mu bya bumulwila ntanda ne nkondo byonkatu byakaine Yesu.—Tangai Yoano 17:14.

Satana ulengela byubilo byatama ne miteeto incha kumweka kuwama. Umvwe twakana bino byubilo, balunda netu ne balongo betu bamo bakonsha kwitwendeleka nangwa kwitukanya. (1 Petelo 4:3, 4) Onkao mambo, twafwainwa kufuukulapo bya kuba atweba bene. Nanchi tupwanañananga na bantu batemwa Lesa nyi? Abya tukokelanga mizhilo yanji mumwekela butemwe bwanji nyi? Inge ke tube bino, tumwesha’mba Satana wabepele byo aambile’mba kafwako muntu wakonsha kwingijila Lesa inge waikala na makatazho ne.—Tangai 1 Kolinda 6:9, 10; 15:33.

Butemwe Lesa boatemwa bantu bumwesha kuba’mba ukafumyapo bubi ne buyanji. Aba baitabila bino bakekala na bumi bwa myaka ne myaka pano pa ntanda.—Tangai Yoano 3:16.