Mwakonsha Kufwenya Byepi Kwipi ne Lesa?

1. Nanchi Lesa umvwa milombelo yonse nyi?

Lesa waswisha bantu bonse kufwenya kwipi ne aye mu lulombelo. (Salamo 65:2) Bino kechi umvwa nangwa kukumbula milombelo yonsetu ne. Nabiji milombelo ya banabalume bamanyika bakazhi babo kechi wiikumbula ne. (1 Petelo 3:7) Bena Isalela byo batwajijile kuba byatama, Lesa wakaine kumvwa milombelo yabo. Twafwainwa kunemeka lulombelo. Bino Lesa umvwa ne milombelo ya bandengamambo umvwe balapila.—Tangai Isaya 1:15; 55:7.

2. Twafwainwa kulomba byepi?

Lulombelo ke lubaji lwa mpopwelo yetu, onkao mambo, twafwainwa kulombatu kwi Mulenga wetu Yehoba kwapwa. (Mateo 4:10; 6:9) Kabiji byo tuji bambulwa kulumbuluka, twafwainwa kulomba mu jizhina ja kwa Yesu mambo ye witufwijile pa bundengamambo bwetu. (Yoano 14:6) Yehoba kechi ukeba milombelo ya kusungila ku mutwe nangwa ya kunemba ne. Ukeba kulomba kufuma panshi ya muchima.—Tangai Mateo 6:7; Filipai 4:6, 7.

Mulenga wetu umvwa ne milombelo ya mu muchima. (1 Samwela 1:12, 13) Waswisha bonse kulomba pa kimye kyonse, nabiji pa kubuka ne pa kulaala, pa kuja kajo ne mu bimye bya makatazho.—Tangai Salamo 55:22; Mateo 15:36.

3. Mambo ka bena Kilishitu o bapwijila pamo?

Kufwenya kwipi ne Lesa kechi kwapela ne, mambo twikala mu bantu babula lwitabilo bendeleka milaye yanji ya mutende ukeya pano pa ntanda. (2 Timoti 3:1, 4; 2 Petelo 3:3, 13) Onkao mambo, tukebwa kwitundaika na bakwetu ba mu lwitabilo, kabiji nabo betukeba bingi.—Tangai Bahebelu 10:24, 25.

Kupwanañana na bantu batemwa Lesa kwitukwasha kufwenya kwipi ne Lesa. Pa kupwila kwa Bakamonyi ba kwa Yehoba pekala kwitundaika na bakwetu ba mu lwitabilo.—Tangai Loma 1:11, 12.

4. Mwakonsha kufwenya byepi kwipi ne Lesa?

Mwakonsha kufwenya kwipi ne Yehoba inge ke mulanguluke pa byo mwafunda mu Mambo anji. Langulukainga pa mingilo yanji, pa mafunde anji ne milaye. Kulomba ne kulanguluka langulukapo kwitulengela kumona byabaya butemwe ne maana a Lesa.—Tangai Yoshua 1:8; Salamo 1:1-3.

Mwakonshatu kufwenya kwipi ne Lesa inge mwamuketekela na muchima yense ne kumwitabila. Lwitabilo luji nobe kintu kyumi kikebwa kuja. Pa kuba’mba lwitabilo lwenu lwikale lutuntulu, mwafwainwa kwilukoseshanga kupichila mukulanguluka pa bintu byo mwaitabilamo.—Tangai Mateo 4:4; Bahebelu 11:1, 6.

5. Mukamwenamo ka inge mwafwenya kwipi ne Lesa?

Yehoba ulama bonse bamutemwa. Wakonsha kwibazhikijila ku byonse byakonsha konauna lwitabilo ne luketekelo lwabo lwa kwikala na bumi bwa myaka ne myaka. (Salamo 91:1, 2, 7-10) Witujimunako ku bintu bipwisha lusekelo ne bileta bikola. Yehoba witufunjisha bwikalo bwawama bingi.—Tangai Salamo 73:27, 28; Yakoba 4:4, 8.