Mambo ka Lesa o Aikela na Jibumba Jakwatankana?

1. Lesa watangijilanga byepi bena Isalela?

Lesa walengele mukoka kufuma mu kikota kya mushakulu Abalahama ne kwibapa mizhilo. Uno mukoka wamutelanga’mba “Isalela,” bo balamine bupopweshi bwa kine ne mambo anji. (Salamo 147:19, 20) Onkao mambo, bantu bonse bakamwenamo byawama mu mukoka wa bena Isalela.—Tangai Ntendekelo 22:18.

Lesa wasajile bena Isalela kwikala bakamonyi banji. Byo bapichilemo bitulengela kuyuka bantu byo bamwenamo mu kulondela mizhilo ya Lesa. (Mpitulukilo ya mu mizhilo 4:6) Onkao mambo, bantu bavula bayuka Lesa wa kine kupichila mu bena Isalela.—Tangai Isaya 43:10, 12.

2. Mambo ka bena Kilishitu bakine o bakwatankena?

Mu kuya kwa kimye, bena Isalela balekele kutalwa bulongo kwi Lesa, kabiji Yehoba wapingishepo kipwilo kya bwina Kilishitu pa uno mukoka. (Mateo 21:43; 23:37, 38) Pa kino kimye bemenako uno mukoka ke bena Kilishitu bakine bakamonyi ba Yehoba.—Tangai Byubilo 15:14, 17.

Yesu waajile kitendekesho kya jibumba ja baana banji ba bwanga ja kusapwila ne kulenga baana ba bwanga ba mu mikoka yonse ya bantu. (Mateo 10:7, 11; 24:14; 28:19, 20) Uno mwingilo ubena kwingilwa bingi byo tubena kunangijila ku mpelo ya buno bwikalo. Kyo kimye kitanshi Yehoba kukonkanya mu mpopwelo ya kine bantu bavula bafuma mu mikoka yonse ya bantu. (Lumwekesho 7:9, 10) Bena Kilishitu bakine bakwatankana kuba’mba betundaikenga ne kwikwasha abo bene na bene. Mwaya ntanda yonse bapwila pamo na kuteleka ku mikambizho ya mu Baibolo.—Tangai Bahebelu 10:24, 25.

3. Jibumba ja Yehoba ja Bakamonyi ba kwa Yehoba ja mu ano moba jatendekele byepi?

Mu ma 1870, kajibumba kacheche ka bafunda Baibolo katendekele kutana bukine bwa mu Baibolo. Bayukile kuba’mba Yesu wakambizhe kipwilo kya bwina Kilishitu kusapwila, onkao mambo nabo batendekele mukwekele wa kusapwila pa Bufumu mwaya ntanda yonse. Mu 1931 batendekele kutelwa’mba Bakamonyi ba kwa Yehoba.—Tangai Byubilo 1:8; 2:1, 4; 5:42.

4. Bakamonyi ba kwa Yehoba bakwatankana byepi?

Bipwilo bya bena Kilishitu batanshi byajinga mu mapunzha avula byamwenangamo mu lutangijilo lwa jibumba jibatangijilanga jayukile kuba’mba Yesu ye Mutwe wa kipwilo. (Byubilo 16:4, 5) Kyo kimotu ne lelo jino, Bakamonyi ba kwa Yehoba bamwenamo bingi mu lutangijilo lwa Jibumba Jitangijila muji bakulumpe bayuka bintu byavula. Jino jibumba jitangijila misampi ya Bakamonyi ba kwa Yehoba mo batuntulula, kunemba ne kusampanya mabuku a kufunjilamo Baibolo kukila pa milaka 600. Onkao mambo, Jibumba Jitangijila jipana lutundaiko lwa mu Binembelo ne lutangijilo mu bipwilo kukila pa 100,000 mwaya ntanda yonse. Mu bipwilo byonse, banabalume bafikilamo batongolwa kwikala bakulumpe bakwingila mingilo ya bukalama mu kipwilo. Bano banabalume balama jitanga ja Lesa na kifyele.—Tangai 1 Petelo 5:2, 3.

Bakamonyi ba kwa Yehoba bakwatankana kusapwila mambo awama ne kulenga baana ba bwanga. Byonkatu byaubanga batumwa, ne atweba tusapwila ku nzubo ku nzubo. (Byubilo 20:20) Kabiji tufunjisha ne Baibolo bantu batemwa bukine. Bakamonyi ba kwa Yehoba kechi jibumbatu ne. Twi kisemi, tuji na Shetu wa kifyele. Twi balongo ne banyenga, banabankazhi beta muchima. (2 Tesalonika 1:3) Byo kiji kuba’mba bantu ba Yehoba bakwatankana kutokesha Lesa ku muchima, ne kwikwasha abo bene na bene, balenga bwanabwankazhi bwakilamo kuwama pano pa ntanda ponse.—Tangai Salamo 33:12; Byubilo 20:35.