Lufuunjisho 14

Bakamonyi Bakwa Yehoba Byobakwatankana

Ñanyi kimye kyatendekele Bakamonyi ba kwa Yehoba balelo? (1)

Kuloñana kwa Bakamonyi bakwa Yehoba kubiwa byepi? (2)

Kwepi kufuma maali obengijisha? (3)

Bañanyi batangijila mu kipwilo? (4)

Ñanyi kuloñana ku katampe kwikalako pamwaka pamwaka? (5)

Ñanyi mingilo yubiwa ku ofesi yabo ikatampe ne maofesi aacheache? (6)

1. Bakamonyi bakwa Yehoba balelo batendekele mu ma 1870. Patanshi, batelwanga’mba Bafuunda Baibolo. Bino mu 1931 betumbile jizhina ja mu Byanembwa Bakamonyi ba kwa Yehoba. (Isaya 43:10) Kufuma ku ntendekelo icheche jibumba ja koma jafika ku mamilyoni a Bakamonyi, baji na nkito ya kushimikila mu byalo bya kila pa 230.

2. Bipwilo bwavula bya Bakamonyi ba kwa Yehoba biji na kuloñana kusatu mu mulungu umo. Mwaitwa kushinkwako ku kuno kuloñana konse. (Bahebelu 10:24, 25) Mu Baibolo mo mobafumya byonse byo bafuunda. Kuloñana kutendeka ne kupwa na milombelo. “Nyimbo ya mupashi” ifuma panshi ya muchima, imbwa pa kuloñana kwavula. (Efisesa 5:18, 19) Kechi balipilisha nangwa kupishamo nsanyi ya bya bupe ne.—Mateo 10:8.

3. Bipwilo byavula biloñaina mu Nzubo ya Bufumu. Ano ke mazubo awama ashimikwa na Bakamonyi bepaana. Kechi mu kamonemo bipasha, misalaba, nangwa bintu bikwabo mu Nzubo ya Bufumu ne. Maali obengijisha afuma mu bya bupe byakwitemenwa. Kubobo bakebakupaana bupe, kuji kabokoshi kakubikamo bya bupe.—2 Kolinda 9:7.

4. Mu bipwilo byonse, muji bakulumpe, nangwa mba bantangi. Bobatangijila mu kufuunjisha kwa mu kipwilo. (1 Timoti 3:1-7; 5:17) Bebakwashako ku bankwasho bakipwilo. (1 Timoti 3:8-10, 12, 13) Bano baana balume kechi bakila bakwabo bonse mu kipwilo ne. (2 Kolinda 1:24) Kechi bapewa mazhina amushingi mukatampe ne. (Mateo 23:8-10) Kechi bavwala byapusanako na bakwabo ne. Kabiji kechi bafola maali na mambo a nkito yabo ne. Baeluda mukwitemenwa kwabo bata muchima pa kukajilwa kwa kumupashi kwa kipwilo. Basangajika ne kutangijila mu kimye kya lukatazho.—Yakoba 5:14-16; 1 Petelo 5:2, 3.

5. Bakamonyi ba kwa Yehoba bekala na kuloñana kwa kijiji ne kuloñana kwa kyalo pa mwaka pa mwaka. Pabino bimye bipwilo byavula bipwila pamo kwiya na kumvwa ku progalamu yasalululwa ya mikambizho ya Baibolo. Lubatizho lwa basambi ba bukuumo lwikalako kimye kyonse pa kuloñana kwa kijiji ne pa progalamu ya kuloñana kwa kyalo.—Mateo 3:13-17; 28:19, 20.

6. Ofesi ikatampe ya panopantanda ponse ya Bakamonyi bakwa Yehoba iji ku New York. Ko kuji Jibumba Jitangijila, jibumba ja bakulumpe bafikapo pa buyuuke abo bamona pa biloñaino byonse bya panopantanda. Kabiji kuji ne maofesi aacheache akila pa 100 panopantanda ponse. Mu bino bifulo, bamingilo ya kwitemenwa bakwasha kupulinta ne kutuma mabuuku a Baibolo. Kabiji ne buntangi bupewa bwa kukokozha kwa mwingilo wa kusapwila. Mambo ka omwabujila kwimana lweendo lwa kufwokashila ofesi icheche yo muji nayo kwiipi nako mwikala?