Byo Bakwatankana Ntanda Yonse Kabiji ne byo Bengila
KUJI mashinda avula o bengijisha kutangijilamo mwingilo wa busapwishi mu byalo kukila pa 230 mo babena kumwingila. Lutangijilo lwine lufuma ku Jibumba Jitangijila jiji ku maofweshi akatampe mu Brooklyn, New York. Jibumba Jitangijila jituma bantomesha pa mwaka pa mwaka mu mapunzha apusana pusana na kwisambila pamo na batangijila misampi mu oo mapunzha. Pa maofweshi a misampi paji Tuvoto twa Misampi muji bantu basatu nangwa batanu na babiji bakumona mwingilo mu byobyo byalo. Pa misampi imo paji bishimikwa muji minkinyi ya bulume bukatampe ilenga mabuku. Kyalo kyonse muji musampi bekyabanya mu makambi kabiji makambi nao beabanya mu myanzo. Mu mwanzo umo mwikala bipwilo byafika ku 20. Kalama wa nkambi ufwakesha myanzo iji mu nkambi yanji. Pa mwaka pa mwaka kwikala kubuñana kubiji mu mwanzo yense. Kuji ne kalama wa mwanzo, aye ufwakesha bipwilo jibiji pa mwaka biji mu mwanzo wanji na kukwasha Bakamonyi kunengezha ne kwingila mwingilo wa busapwishi mu nyaunda yo bapa kyokyo kipwilo.
Nzubo ya Bufumu iji ko mwikela yo mpunzha po besambila mambo awama o basapwila mu kimasamasa kyenu. Mapunzha mwaikela kipwilo beabanya mu tumanyaunda tucheche. Kamonyi yense bamupapo nyaunda imo kabiji naye wibikako kuyamo na kwisamba na bantu pa mazubo abo. Kipwilo kyonse kikala na Bakamonyi bacheche kufika ne ku 200, kiji na bakulumpe batangijila mingilo yapusana pusana. Muntu yense utaya mbila ya mambo awama wanema bingi mu jibumba ja Bakamonyi ba kwa Yehoba. Kamonyi yense, kana wingijila pa maofweshi akatampe, pa misampi, nangwa mu bipwilo, uya mu mwingilo wa mu bujimi na kubula bantu pa mambo a Bufumu bwa Lesa.
Masawakya a uno mwingilo beatuma ku maofweshi akatampe kabiji anembwa pa mwaka pa mwaka mu Yearbook. Mu uno buku munembwa masawakya onse a mwingilo ye baingijile mu yewo mwaka pa mambo a kushimuna bukine pe Yehoba ne Bufumu bwanji buji mu maboko a Kilishitu. Mu ino myaka, bantu kukila pa 17,000,000 Bakamonyi ne bantu bamwesha lusekelo batanwa ku Kivuluko kya lufu lwa Yesu kikalako pa mwaka pa mwaka. Bakamonyi ba kwa Yehoba bengila maola kukila pa 1,000,000,000 pa mwaka pa mwaka na kusapwila mambo awama, kabiji bantu bafika ku 300,000 babatizwa. Kabiji mabuku o basha ku bantu avula bingi.