Libeka Wakebelenga Kusangajika Muchima wa Yehoba

Libeka wajinga mwanamukazhi watemenwe bingi Yehoba. Mwatawanji wajinga Izaka. Naye watemenwe bingi Yehoba. Libeka ne Izaka beyukile byepi? Nga Libeka wamwesheshe byepi kuba’mba wakebelenga kusangajika muchima wa Yehoba? Twaya tufunde byavula pe aye.

Bansemi ba kwa Izaka bajinga ba Abalahama ne Sala. Baikalanga mu kyalo kya Kenana mwajinga bantu babulanga kupopwela Yehoba. Bino Abalahama wakebelenga’mba mwananji akasongole mwanamukazhi wapopwelanga Yehoba. Onkao mambo, Abalahama watumine kalume wanji kuya ku mpunzha ya Halana na kukebela Izaka mwanamukazhi wa kusongola. Kyamweka uno kalume wanji wajinga Elieza, kabiji bamutumine ku Halana kwaikalanga balongo ba kwa Abalahama.

Elieza wayijile pamo na bakalume bakwabo ba kwa Abalahama. Ko bayilenga kwalepele bingi. Basendele bangamela 10 po basendejile kajo ne bya bupe. Pano Elieza wafwainwe kuyuka byepi mwanamukazhi wa kusongolwa kwi Izaka? Elieza ne bakalume bakwabo byo bafikile ku Halana, baikele ku mushima wa mema mambo Elieza wayukile’mba bantu koko baiyanga na kutapula mema. Walombele kwi Yehoba ne kwamba’mba: ‘Pano nsongwakazhi ye nsakwambila namba: Mpepo mema ntomemo, ne aye naye inge wampa, kabiji ne bangamela bami nabo wibapa, nsakuyuka kuba’mba i ye ye mwasala.’

Ponkapo Libeka waishile ku mushima wa mema. Baibolo wamba kuba’mba Libeka walambile bingi. Elieza wamulombele mema a kutoma kabiji aye waambile’mba: ‘Mwane, nsakwimupa, kabiji bangamela benu nabo amiwa nsa kwibatomesha.’ Akilangulukapotu! Bangamela inge baumvwa kilaka batoma mema avula bingi, onkao mambo, Libeka wafwainwa wabweleleko bimye byavula ku mushima na kutapula mema. Inge watala pa kipikichala, nanchi ubena kumona Libeka byo abena kwingila na ngovu nyi?— Elieza wakuminye bingi pa kumona Yehoba byo akumbwile lulombelo lwanji.

Kabiji Elieza wapele Libeka bya bupe byavula bingi byawama. Libeka watwajile Elieza ne bakalume bakwabo pa muzhi. Byo bafikile, Elieza wabuujile kisemi kya kwa Libeka ene mambo Abalahama o amutumijile, ne Yehoba byo akumbwile lulombelo lwanji. Kabiji Libeka bamuswishishe kusongolwa kwi Izaka.

Abya walanguluka’mba Libeka waswile kwikala mukazhi wa kwa Izaka nyi?— Libeka wayukile amba Yehoba ye watumine Elieza. Onkao mambo, kisemi kyanji Libeka byo kya mwipwizhe inge kya kuba waswile kuya ku Kenana na kwikala muka Izaka, aye waambile amba: “Ee, naswa kuya.” Kwa kubula nangwa kutaya kimye ne, Libeka wayile ne Elieza. Byo bafikile ku Kenana wasongwelwe kwi Izaka.

Na mambo a kuba Libeka waubile kyakebelenga Yehoba, Yehoba wamupesheshe. Byo papichile myaka yavula bingi, Yesu waishile na kusemekelwa monka mu kisemi kya kwa Libeka. Inge waikala nobe Libeka ne kusangajika muchima wa Yehoba, ne obewa Yehoba ukakupesha.