Banyemene Mfumu Wakanama

Yosefwa wabushishe Maliya amba amubuule byambo byanema. Malaika wa Yehoba wamwekele kwi aye mu kiloto ne kumwambila’mba: “Imana, usende mwana ne inanji munyemene ku Ijipita, mukekalenga konkakwa poso nkakubuule, mambo Heloda usakutendeka kukeba uno mwana kuba’mba amwipaye.”—Mateo 2:13.

Ponkapotu, ba Yosefwa, Maliya ne mwanabo banyemene bufuku. Banyemene pa kimye kyafwainwa mambo Heloda wayukile’mba bashayuka ba tubangabanga bamubepa. Vulukai’mba bafwainwe kubwela kwi Heloda ne kumubula ko bataaine Yesu. Bino, abo bafumine mu kyalo kwa kubula kubwela kwi aye. Heloda wazhingijile bingi. Na mambo a kuba’mba wakebelenga kwipaya Yesu, wakambizhe’mba bepaye baana babalume bonse ba myaka ibiji ne kubwela panshi ba mu Betelema ne mu mapunzha onse. Wabajile ino myaka kwesakana na kimye kyo bamubujijilemo bashayuka ba tubangabanga bafumine ku Musela.

Kwipaya bano baana babalume kyajinga kintu kyakankamikile bingi bantu. Kechi twayuka kuvula kwa baana bo baipayile ne, bino kujila mabingo ne kuwowakana kwaubile bainetu kwafikizhe bungauzhi bwa mu Baibolo bwaawile ngauzhi wa Lesa aye Yelemiya.—Yelemiya 31:15.

Pa kyokya kimye, Yosefwa ne kisemi kyanji banyemejile ku Ijipita, kabiji batwajijile kwikala konkakwa. Bino juba jimo bufuku, malaika wa Yehoba wamwekele jikwabo kwi Yosefwa mu kiloto ne kumwambila’mba: “Imana usende mwana ne inanji ubwele mu kyalo kya Isalela, mambo aba bakebelenga bumi bwa mwana bafwa.” (Mateo 2:20) Onkao mambo, Yosefwa wayukile’mba wakonsha kubwezha kisemi kyanji ku ntanda yabo. Kino kyafikizhe bungauzhi bukwabo bwa mu Baibolo bwaamba’mba Lesa waichile mwananji kufuma mu Ijipita.—Hoseya 11:1.

Kyamweka Yosefwa wakebele kwikala mu kyalo kya Yudea, kwipi na muzhi wa Betelema mo baikelenga saka bakyangye kunyemena ku Ijipita. Bino waumvwine’mba Akeleusa mwana wakanama wa kwa Heloda ye waikala ke mfumu mu Yudea. Kabiji mu kiloto kikwabo Lesa wamujimwineko pa kino. Onkao mambo, Yosefwa ne kisemi kyanji bayile ku kabeta ka buyeke ne kukekala mu muzhi wa Nazala wa mu Ngalilea. Uno muzhi wajinga kwalepa na muzhi wa Yelusalema, mpunzha ya bupopweshi bwa Bayudea. Yesu wakomejile mu Nazala, kabiji kino kyafikizhe bungauzhi bwa kuba’mba: “Bakamutela’mba, mwina Nazala.”—Mateo 2:23.