Baipayile Muntu Pa Kijiilo Kya Kuvuluka Juba Ja Kusemwa

Batumwa ba kwa Yesu byo basapwijile mu Ngalilea, muntu walumbulwile Yesu kechi wajinga na bwana bwa bene bwa kusapwila ne. Yoano Mubatizhi wakijinga mu kaleya. Kabiji saka apwishamo kala myaka pepi na ibiji.

Yoano waambile patoka kuba’mba kyatama Mfumu Heloda Antipasa kusongola Helodyasa muka kolojanji aye Filipa. Heloda wakaine mukazhanji ne kusongola Helodyasa. Byo kiji kuba’mba Heloda waambanga’mba walondelanga Mizhilo ya Mosesa, ko kuba’mba wazhilulwile mizhilo kabiji waubile bukende. Na mambo a kumusanzamo kwi Yoano, Heloda wamutayile Yoano mu kaleya kampe na mambo a kumukambizha kwi Helodyasa.

Heloda kechi wayukile bya kumuba Yoano ne, mambo bantu “bamutelanga amba ngauzhi.” (Mateo 14:5) Nangwa byonkabyo, Helodyasa aye wakebelengatu kwipaya Yoano. Helodyasa “wajinga nanji na mfika” kabiji wakebelenga mashinda a kumwipayilamo. (Mako 6:19) Kepo kimye kyafikile kyo akebelenga kuba kino.

Kijiilo kya Lupitailo kya mu 32 C.E. saka kikyangye kufika, Heloda watekele kijiilo kikatampe kya kuvuluka juba janji ja kusemwa. Ku kino kijiilo kwatainwe babinemanga banji bonse, bakulumpe ba bashilikale ne banabalume babineme ba mu Ngalilea. Kimye kya kijiilo, Salome mwana wa mukazhi wa kwa Helodyasa ye asemene na mwatawanji mutanshi aye Filipa, watwelelemo na kuzhila benyi. Jibumba jonse ja banabalume jasangalele bingi pa kumona byo azhilenga.

Na mambo a kuba’mba mwananji wa mukazhi wa kushinda wamutokeshe ku muchima, Heloda wamwambijile’mba: “Kyonse kyo usakundomba, nsakukupa.” Wachipile kwi aye amba: “Kyonse kyo usakundomba, nsakukupa, nangwatu lubaji lumo lwa bufumu bwami.” Saka akyangye kukumbula, Salome walupukile ne kuya na kushikisha inanji amba: “Ñanyi kintu kyo nsakulomba?”—Mako 6:22-24.

Pano kimye kyafikile Helodyasa kyo akebelenga. Wafikenejiletu kukumbula’mba: “Mutwe wa kwa Yoano Mubatizhi.” Ponkapotu Salome wayile kwi Heloda ne kumwambila’mba: “Mbena kukeba mumpe lonka luno mutwe wa kwa Yoano Mubatizhi pa nsanyi ikatampe yaselebala.”—Mako 6:24, 25.

Nangwa kya kuba kino kyamulengejile bulanda Heloda, bino benyi banji baumvwineko byo achipile kwi Salome. Onkao mambo, kechi wakebele kwilengulwisha ku benyi banji inge kya kuba wabula kupana kintu kyo achipile ne, nangwa kya kuba’mba kino kyalumbulwilenga kwipaya muntu wabula mambo. Nangwa kya kuba kechi wasekejilemo ne, Heloda watumine kapaso ku kaleya ne kumukambizha bya kuba. Kechi papichile ne kimye kyabaya ne, kapaso waletele mutwe wa kwa Yoano pa nsanyi ikatampe yaselebala. Wamupaine kwi Salome, ne aye wamupaine kwi inanji.

Baana ba bwanga ba kwa Yoano byo baumvwine kyamwekele, bayile na kusenda mubiji wanji ne kumuzhiika. Kabiji bayile na kubuula Yesu kyamwekele.

Mu kuya kwa kimye, Heloda byo aumvwine nkuwa ya kwa Yesu ya kubuka bantu ne kupanga bandemona, waumvwine bingi moyo. Walangulukilenga’mba Yesu ubena kuba bino bintu, ye Yoano Mubatizhi ‘wasangulwa mu bafu.’ (Luka 9:7) Onkao mambo, Heloda Antipasa wakebeshe bingi kumona Yesu. Kechi wakebelenga’mba omvwe byo asapwijilenga ne. Bino, Heloda wakebelenga kushiinwa inge kine Yesu ye Yoano wasangulwa.