Kitango 29

Nanchi Bijiilo Byonse Bitokesha Lesa Pa Muchima Nyi?

NANCHI umvwa bulongo kuya ku bijiilo nyi?— Kwakonsha kwikala bintu byavula bingi. Nanchi Mufunjishi Wayukisha ukeba’mba ne atweba tuyenga ku bijiilo nyi?— Juba jimo wayile ku kijiilo kya masongola na baana banji ba bwanga bamo. Yehoba ke ‘Lesa wa lusekelo,’ onkao mambo umvwa bingi bulongo umvwe twaikala na kijiilo kyawama.—1 Timoti 1:11; Yoano 2:1-11.

Pa peja 29 ya uno buku paamba kuba’mba Yehoba waabenye mema pa Kalunga Kachila kuba’mba bena Isalela babuke pa mushiji wauma. Ubena kwijivuluka jino jishimikila nyi?— Palutwe kacheche, bantu batendekele kwimba ne kuzha ne kutota Yehoba. Kyajingatu nobe kijiilo. Bantu basekejile bingi, kabiji Lesa naye wafwainwa wasekejile.—Kulupuka 15:1, 20, 21.

Byo papichile myaka nobe 40, bena Isalela bayile ku kijiilo kikwabo. Bantu bebechile ku kino kijiilo kechi bapopwelanga Yehoba ne. Bapopwelanga balesa bangi kabiji bajinga na kisela kya kwilaala na bantu babujile bena kwabo. Nanchi kyajingatu bulongo kuya ku kijiilo kya uno mutundu nyi?— Ine, Yehoba kyamufichishe bingi ku muchima, kabiji wibakambwile bena Isalela.—Kubala 25:1-9; 1 Kolinda 10:8.

Kabiji mu Baibolo mwaambiwa ne bijiilo bibiji bya kusekelela moba a kusemwa. Nanchi kijiilo kimo kyajinga kya kusekelela juba ja kusemwa kwa Mufunjishi Wayukisha nyi?— Ine. Bino bijiilo byonse bibiji byajinga bya kusekelela moba a kusemwa a bantu babulanga kupopwela Yehoba. Kijiilo kimo kyajinga kya Mfumu Heloda Antipasa. Wajinga ndamakyalo wa kibunji kya Ngalilea mwaikalanga Yesu.

Mfumu Heloda waubile bintu byatama byavula bingi. Waangachile muka kolojanji ne kumwalula ke mukazhanji. Jizhina janji wajinga Helodyasa. Kalume wa Lesa aye Yoano Mubatishi wamwambijile Heloda amba kyatama kuba bino. Bino Heloda waumvwine bingi ku muchima kutama. Onkao mambo, wamutayile Yoano mu kaleya.—Luka 3:19, 20.

Yoano byo ajinga mu kaleya, juba jafikile kuba’mba Heloda asekelele juba janji ja kusemwa. Heloda wanengezhezhe kijiilo kikatampe. Waichile babineme bavula bingi. Bonse bajilenga ne kutoma kabiji basangalele bingi. Mwana wa mukazhi wa kwa Helodyasa watwelele mukachi na kuzha. Bonse bapwijile baumvwine bingi bulongo na mazha anji kabiji Mfumu Heloda wakebelenga amba amufupe. Wamwambijile amba: “Byonse byo usakungipuzha, nsakukupa, kufika ku lubaji lumo lwa bufumu bwami.”

Ki ka kyo afwainwe kwipuzha? Nanchi mali nyi, inyi bivwalo byawama nangwa jilapa? Kamwale kechi wayukile kya kuba ne. Wayile kwiinanji aye Helodyasa ne kwamba’mba: “Lelo i ki ka kyo nsakwipuzha?”

Helodyasa washikilwe bingi Yoano Mubatishi. Onkao mambo, waambijile mwananji amba kalombe mutwe wa Yoano. Kamwale wayile kwi mfumu ne kumwambila amba: “Bampe ponka pano pa lomvu mutwe wa Yoano Mubatishi.”

Mfumu Heloda kechi wakebelenga amba amwipaye Yoano ne, mambo wajinga muntu wawama bingi. Bino Heloda wachipile, kabiji wachiine bakwabo bajinga pa kijiilo kuba’mba kechi wafikizha mulaye wanji ne. Onkao mambo, watumine muntu mu kaleya na kuchiba mutwe wa Yoano. Kabiji awa muntu waubiletu ne kyabwela. Wabikile mutwe wa kwa Yoano pa lomvu ne kumupana kwi kamwale. Kabiji kamwale naye wamupaine kwi bainanji.—Mako 6:17-29.

Kijiilo kikwabo kya kusekelela juba ja kusemwa kyaambiwapo mu Baibolo nakyo kechi kyawamine ne. Kyajinga kya mfumu wa Ijipita. Kimye kya kino kijiilo, napo mfumu wachibile mutwe wa muntu. Panyuma ya kuchiba mutwe, mfumu wakobekele kivuvuma amba bañonyi baje! (Ntendekelo 40:19-22) Nanchi Lesa wasekejile pa bino bijiilo bibiji byaubiwe nyi?— Umvwe obewa wajingako, abya inge watainweko nyi?—

Twayuka kuba’mba byonse byanembwa mu Baibolo biji na nkebelo. Baibolo waambatu pa bijiilo bibiji bya kusekelela juba ja kusemwa. Kabiji pa bino bijiilo byonse bibiji, paubiwe bintu byatama. Nanchi Lesa ubena kwitufunjishapo amba ka pa mambo a kusekelela moba a kusemwa? Nanchi Lesa ukeba’mba tusekelelenga moba a kusemwa nyi?—

Ano moba, pa bijiilo bya uno mutundu kechi bachiba mitwe ya bantu ne. Pano bino bantu batendekeshe kino kisela kya kusekelela moba a kusemwa kechi bapopwelanga Lesa wa kine ne. “Buku umo washimuna pa mambo a kusekelela kwaambiwapo mu Baibolo amba: ‘Bandengamambo . . . bo basekelelanga moba abo a kusemwa.’ (The Catholic Encyclopedia)” Nanchi netuwa twafwainwa kwikala byonka byo baji nyi?—

Ibyepi Mufunjishi Wayukisha? Nanchi naye wasekelelanga juba janji ja kusemwa nyi?— Ine, Baibolo kechi waambapo amba Yesu wasekelelanga juba janji ja kusemwa ne. Mambo nangwatu baana banji ba bwanga batanshi kechi basekelelanga juba janji ja kusemwa ne. Nanchi wayuka kyalengejile bantu kutendeka kusekelela juba ja kusemwa kwa kwa Yesu pa December 25 nyi?—

Buku umo washimuna’mba: ‘Bena Loma basekelelanga jino juba amba Kijiilo kya Saturn, kusemwa kwa juba.’ (The World Book Encyclopedia) Onkao mambo, bantu batendekele kusekelela juba ja kusemwa kwa kwa Yesu pa juba ja sekelelanga bantu babulanga kupopwela Lesa!

Nanchi wayuka kuba’mba Yesu kechi wasemenwe mu December nenyi?— Mambo Baibolo waamba’mba kimye kyasemenwe Yesu, bakafunga mikooko bajinga mungye bufuku. (Luka 2:8-12) Kabiji kechi bakonsheshe kwikala mungye kimye kya mayoo, mvula saka abena kunoka mu December ne.

Bantu bavula bayuka’mba Kiminshiminshi kechi jo juba jasemenwe Yesu ne. Kabiji bayuka’mba pa jino juba bantu babula kupopwela Lesa po po baikalanga na kijiilo kifichisha Lesa ku muchima. Bino bavula kechi baleka kusekelela Kiminshiminshi ne. Batatu maana pa kwikala na kijiilo kwa kubula kuyuka Lesa byo aambapo. Pano bino, twafwainwa kutokesha Lesa ku muchima, ke ibyo nenyi?—

Onkao mambo umvwe twalenga bijiilo, byafwainwa kwikala bitokesha Yehoba ku muchima. Twafwainwa kuba bino kimye kijitu kyonse mu mwaka. Kechi twafwainwa kupembelelangatu amba kana juba kananga ne. Twakonsha kuja kajo kanengela bulongo ne kukaya bisela. Nanchi ukeba kuba bino nyi?— Wakonsha kwambila bansemi bobe kuba’mba banengezhepo byakukayakaya. Kyakonsha kuwama bingi kuba bino, ke ibyo nenyi?— Bino saka ukyangye kutendeka kunengezha kijiilo, wafwainwa kumona’mba byo ubena kuba bikatokesha Lesa ku muchima.

Buneme bwa kubanga kimye kyonse byaamba Lesa bwaambiwapo ne pa Byambo bya Mana 12:2; Yoano 8:29; Loma 12:2; ne 1 Yoano 3:22.

[Kipikichala pa jipa 152]

Nanchi kino kijiilo kyatokesheshe Lesa ku muchima nyi?

[Kipikichala pa jipa 153]

Ki ka kyaubiwe pa kijiilo kya kusekelela juba ja kusemwa kwa kwa Heloda?

[Kipikichala pa jipa 154]

Mambo ka Yesu kyo abujile kusemwa pa December 25?

[Kipikichala pa jipa 156]

Twakonsha kuba byepi pa kuba’mba bijiilo bitokeshenga Lesa ku muchima?