Mwanenu Wakonsha Kwamba Amba Ka?

BANSEMI: Mu Kyamba kya Usopa kya January 15, 2010, mapa 16-20, twaambile pa kupituluka mu bintu byakonsha kukwasha baana benu. Uno mutwe waamba pa mashinda o mwakonsha kwingijisha kukwashishamo baana benu kuyuka bya kuba na makatazho o bapitamo ku sukulu. Mwakonsha kupituluka mu ano mashinda kimye kya Kupopwela kwa Kisemi ko mwikala nako.

BAKAMONYI ba kwa Yehoba bakyanyike bapita mu makatazho avula. Bakwabo mo bafunjila javula bebepuzha ene mambo o babujila kwivwanga mu bintu bimo, nabiji kupana mushingi ku mbandela, kusekelela moba a kusemwa ne moba a kukokoloka. Umvwe mwanenu wamukazhi nangwa wamulume bamwipuzha ano mepuzho, wafwainwa kukumbula amba ka?

Baana bamo bakumbulatu amba: “Kechi nakonsha kuba kino ne. Bupopweshi bwami kechi bwaswisha ne.” Baana bakumbula bino bakebewa kwibatakaika. Nkumbwilo yabo yakonsha kulengela bantu kubula kutwajijila kwibepuzha. Pano bino Baibolo witukambizha amba: ‘Ikajilai jimo na mwa kwibakumbwila bonse bemwipuzha mambo a luketekelo lo muji nalo.’ (1 Pe. 3:15) Kuba bino kulumbulula byavula kukila kwambatu amba: “Kechi nakonsha kuba kino ne.” Nangwa kya kuba bamo kechi bakonsha kuswa byo twibabula ne, bino bakwabo bakonsha kukeba kuyuka ene mambo o twakaina.

Bakamonyi bakyanyike bavula bamba mashimikila a mu Baibolo ku bakwabo mo bafunjila kupichila mu kwingijisha mabuku nabiji wa Fundai ku Mufunjishi Wayukisha. Ano mashimikila akonsha kukwasha kulondolola ene mambo Bakamonyi bakyanyike o bobila nangwa kubula kubako bintu bimo. Baana ba sukulu bamo batako bingi muchima kumvwisha mashimikila a mu Baibolo, kabiji kino kilengela bavula kutendeka kufunda Baibolo. Baana ba sukulu bakwabo kyakonsha kwibakatazha kukwatankanya jishimikila jonse ja mu Baibolo. Kwakubula kwibalondolwela, mashimikila amo a mu Baibolo akonsha kukatazha bakwabo baana ba sukulu kumvwisha mo atala. Minhee wa myaka ya kusemwa 11 byo bamwambijile ku mulunda nanji kuba amba aye na kutanwa ko asekelejilenga juba ja kusemwa kwanji, waambijile uno mulunda nanji amba: “Baibolo kechi witwambilapo kusekelela moba a kusemwa ne. Yoano Mubatizhi waambiwapo mu Baibolo, bamwipayile pa juba jo basekelejilenga kusemwa.” Nangwa byonkabyo, Minhee uvuluka amba mulunda nanji kechi watondelwe na yewa mukumbu wanji ne.

Kimye kimo kintu kikwashañana ke kumwesha mukwenu mo mufunjila kipikichala nangwa jishimikila jiji mu mabuku etu. Pano ibyepi umvwe bakulumpe ba pa sukulu bakanya kuba amba kechi bakeba baana kumweshanga bakwabo baana basukulu mabuku aamba pa bupopweshi ne? Nanchi baana betu bakonsha kusapwila bulongo kwakubula kwingijisha mabuku nyi? Mwakonsha kukwasha byepi baana benu kuyuka mwakukumbwila?

Pitulukaingamo Nabo

Kupitulukilamo jimo ku nzubo na baana benu kwanema bingi, anweba bansemi mwakonsha kufwanyikizha kwikala baana ba sukulu. Baana benu byo bebikishako kuzhikijila lwitabilo lwabo, anweba bansemi mwafwainwa kwibasanchila kabiji ne kwibamwesha byo bakonsha kuwamishako mwakwambila ne ene mambo o kyanemena. Kyakumwenako, bakwashai kwamba byambo byakonsha kumvwa bakwabo ba jifumbi jimo. Nsongwalume wa jizhina ja Yoshua, wa myaka ya kusemwa itanu na ina waambile amba, bakwabo mo bafunjila kechi bayukile mwatala byambo nabiji “jiwi ja muchima” ne “bukishinka” ne. Onkao mambo waingijishanga byambo byo bayuka pa kwisamba nabo.—1 Ko. 14:9.

Baana ba sukulu bamo bepuzha mepuzho bakonsha kuleka kuteshako muchima umvwe bebabula mukumbu walepa. Kupichila mu kwisamba nabo ne kumona mwatala bintu, Bakamonyi bakyanyike bakonsha kukwasha bakwabo kutwajijila kwikala na muchima wa kuteleka. Haneul nsongwakazhi wa myaka ya kusemwa jikumi, waamba amba: “Bakwetu mo tufunjila bakeba kwisamba nabo, kechi kwibalondolwela ne.” Pa kuba’mba mwisambenga nabo mwafwainwa kwibepuzha mepuzho kabiji ne kuteleka ku byo babena kwamba.

Misambo yalondelapo yamwesha bena Kilishitu bakyanyike byo bakonsha kwisambanga na bakwabo baana ba sukulu. Kechi bafwainwa kusunga ku mutwe byambo biji mu ino misambo ne, mambo baana bapusana pusana, kabiji ne bintu byo bapitamo byakonsha kulengela nkumbwilo yabo kupusana. Onkao mambo, Kamonyi wakyanyike wafwainwatu kumvwisha kibena kwambiwapo kabiji ne kuyuka mwakwambila kwesakana na mwayila bintu ne byaipuzha bakwabo baana ba sukulu. Inge muji na baana baya ku sukulu, pitulukaimo nabo mu bino bintu.

Kufunjisha baana kukebewa kimye kyabaya ne kwibikishako. Bansemi bena Kilishitu bafwainwa kufunjisha baana babo mafunde a mu Baibolo ne kwibetabisha kulondela ano mafunde.—Mpitu. 6:7; 2 Timo. 3:14.

Kimye kikalondelapo kya Kupopwela kwenu kwa Kisemi, mukapitulukemo na baana benu mu bintu byaambiwapo kala. Mukamone kino byo kyakonsha kwimukwasha. Mwafwainwa kuyuka amba nkebelo ine kechi ke ya kulabijila ino mikumbu nangwa byambo bijimo ne. Mwakonsha kupitulukamo mu kintu kimo bimye byavula, saka mwamba mikumbu yapusana pusana ne kumona baana benu byo bakonsha kumona mwakukumbwila. Kimye kyo babena kulondolola bintu byo baitabilamo, bakwashainga kwikala bakoka muchima ne kuyuka mwakubila bintu. Mu kuya kwa kimye mukafunjisha baana benu bya kuzhikijila bintu byo baitabilamo ku bakwabo baana ba sukulu, ku bakinkalankulo ne ku bafunjishi.

[Kitenguluzha/Bipikichala pa peja 4, 5]

KUSEKELELA MOBA A KUSEMWA

Maliya: Byepi Yoano. Mbena kukeba ukeye na kutanwa ko tukasekelelanga juba jami ja kusemwa.

Yoano: Nasanta bingi, Maliya. Pano nkikwipuzheko, mambo ka kyo ukasekelelanga jino juba ja kusemwa kobe?

Maliya: Nkasekelelanga jino juba mambo jo jo nasemenwe. Nanchi obewa kechi usekelela juba ja kusemwa kobe nenyi?

Yoano: Ine, kechi nsekelela ne.

Maliya: Mambo ka? Kisemi kyami kyatemenwe bingi kimye kyo nasemenwe.

Yoano: Ne kyamitu nakyo. Batemenwe bingi kimye kyo nasemenwe. Pano bino kechi naketekela kuba’mba kijitu bulongo kusekelela jino juba pa mwaka pa mwaka ne. Pa juba ja kusekelela moba abo a kusemwa, bavula balanguluka kuba amba banema kukila bakwabo. Nanchi Lesa kechi ye wakilamo kunema nenyi? Nanchi kechi kyakonsha kuwama kumusanchilanga Lesa moba onse pa kwitupa bumi nenyi?

Maliya: Ubena kulumbulula amba kechi nafwainwa kusekelelanga juba ja kusemwa kwami nenyi?

Yoano: Maliya, kiji kwi obewa mwine. Pano mambo ka a kubula kulangulukapo pa kino? Bantu bavula batemwa kutambwila bya bupe kimye kyo basekelela moba a kusemwa, pano bino Baibolo waamba’mba: Lusekelo lo bamona aba bapana lwakila lo bamona aba batambula. Mu kifulo kya kuta muchima ku kusekelela moba etu a kusemwa, nanchi kechi kyafwainwa kuwama kumusanchila Lesa, kuta muchima ku bakwetu ne kwibobilanga byawama nenyi?

Maliya: Nkyangye kulangulukapo byobyo ne. Ko kuba amba bansemi bobe kechi bakupapo bya bupe nenyi?

Yoano: Bampa. Pano bino bansemi bami kechi bapembelelatu juba jonka jo nasemenwe ne. Bampatu kimye kyonse kyo bakeba kuba bino. Nangwa kiji bino, Maliya kechi wakonsha kutemwa kukubulako byatendekele bantu kusekelela moba a kusemwa nenyi?

Maliya: Ukeba kumbula nyi?

Yoano: Ee, nkakubula kesha jishimikila jimo jaamba pa byaubiwe kala kimye kyo basekelejilenga juba ja kusemwa.

KUPOPWELA MBANDELA

Mapesho: Bupe, mambo ka o ubujila kupopwela mbandela?

Bupe: Nasanta bingi pa byo wangipuzha Mapesho. Pano nkikwipuzheko, mambo ka o upopwela mbandela?

Mapesho: Nguba bino mambo natemwa kyalo kyami.

Bupe: Nayuka kuba’mba watemwa bainobe Mapesho. Pano nanchi wibapopwela nyi?

Mapesho: Ine. Mpopwela mbandela mambo neinemeka. Nanchi obewa kechi wiinemeka nenyi?

Bupe: Neinemeka. Pano bino kechi tupopwela muntu nangwa kintu ne, ke ibyo?

Mapesho: Ibyo ee, nanemeka bafunjishi, pano bino kechi nebapopwela ne. Namona nobe kechi nayuka ene mambo andengela kupopwela mbandela ne.

Bupe: Mapesho, bantu bavula balanguluka amba mbandela imenako kyalo kyabo. Bantu bapopwela mbandela bamwesha kuba’mba bakonsha kufwila kyalo kyabo. Pano amiwa kechi byo byo nekimona ne. Kechi nakonsha kufwila kyalo ne, mambo Lesa ye wampele bumi. Nafuukulapo kwipana kwi aye. Nangwa kya kuba nanemeka mbandela, pano bino kechi neipopwela ne.

Mapesho: Pano naumvwa mo watazha.

Bupe: Natemwa bingi pa kumvwa byobyo. Kabiji inge ukeba kuyuka ene mambo o ngubila nangwa kubula kuba bintu bimo, wakonsha kungipuzha. Baibolo waamba kuba’mba kala kene mfumu wa bena Babilona wakambizhe bantu kupopwela kipashañano. Bamo bakaine kwikipopwela nangwa kya kuba bebazakamishe kwibepaya.

Mapesho: Byonkabyotu? Pano ki ka kibamwekejile?

Bupe: Nsakukubula kyaubiwe kwi abo pachaile.

BUNSANJI PA SUKULU

Kabashila: Kyabakanga, ñanyi ye umona’mba wakonsha kwikala ntangi mu kalashi mwetu?

Kyabakanga: Kafwapo ye nakonsha kusala kwikala ntangi wetu ne.

Kabashila: Mambo ka?

Kyabakanga: Amiwa nji nanji kala ntangi wawama. Byo nji mwina Kilishitu, ndondela Yesu. Onkao mambo, kechi nakonsha kusala ntangi mukwabo ne. Wayuka ene mambo o naambila’mba ye Ntangi walumbuluka nyi?

Kabashila: Ine, kabiji kechi nkeba ne kwibyumvwa byo ne.

Kyabakanga: Kyawama, inge ubena kukeba kuyuka, nakonsha kukubula.

[Kipikichala]

“Mambo ka o ubujila kupopwela mbandela?”

[Kipikichala pa peja 4]

“Byepi Yoano. Mbena kukeba ukeye na kutanwa ko tukasekelelanga juba jami ja kusemwa”