Kutundaika Mwingilo wa Bufumu Konkako Kwenu ne Ntanda Yonse

PA KUFIKIZHA bungauzhi bwa kwa Yesu bwaamba pa moba a kupelako, Bakamonyi ba kwa Yehoba basapwila mambo awama “monse mwapela ntanda.” (Byu. 1:8; Mat. 24:14) Pa kuba’mba bobe kino, bepana abo bene kwingijisha kimye kyabo ne bulume bwabo mu mwingilo wa Lesa. Byo baketekela mwi Yehoba amba ukwasha ba mwingilo umo ne aye, batwajijila kutangizhako Bufumu bwa Lesa mu bwikalo bwabo. (Mat. 6:25-34; 1 Ko. 3:5-9) Bintu bibena kufumamo bimwesha’mba Yehoba ubena kwibapesha.

KUKWASHA MU BINTU BYA BUFUMU NTANDA YONSE

² Inge bantu ke balanguluke pa mashinda o tusapwilamo ne kuyuka’mba tusampanya ma Baibolo ne mabuku alumbulula Baibolo ku bantu kyatutu, bamo bakonsha kwipuzha’mba: “Pano mwingila byepi uno mwingilo?” Ibyo kuba’mba kupulinta ne kusampanya ma Baibolo ne mabuku alumbulula Baibolo patayiwa mali avula. Kabiji pakebewa mali avula a kushimikila ne kuwamishisha mazubo a Betele pekala ba mingilo bengijila ku minkinyi ipulinta, kutala pa mwingilo wa kusapwila ne bengila mingilo ikwabo mu mwingilo wa kimye kyonse wa kutwajilamo mambo awama palutwe. Kunungapo, bakalama ba myanzo, bamishonale, bapainiya beikajila ne bakwabo baji mu mwingilo wiikajila wa kimye kyonse bebapapo mali a kwikwashishamo mu mwingilo wabo. Kwambatu kine, mwingilo wa kusapwila mu ano moba etu a lelo nangwa tubena kumwingijila ko twikela nangwa mwaya ntanda yonse, patayiwa mali avula bingi. Pano nanchi ano mali onse afuma pi?

³ Bavula banemeka mwingilo wa Bakamonyi ba kwa Yehoba wa kufunjisha Baibolo, bapanako mali ku mwingilo wa ntanda yonse. Nangwa byonkabyo, mwingilo wetu bamutundaika ku Bakamonyi bene, bamo befuukwilapo kutuma mali ku ofweshi wa musampi wa Bakamonyi ba kwa Yehoba uji monka mu kyalo mo bekala. Bamwesha muchima wa kwipana wajingapo na bakalume ba Lesa ba kala bakwashishe na muchima wabo yense kushimika nzubo ya Yehoba ya kumupopwelamo. (Lupu. 35:20-29; 1 Moba. 29:9) Mali amo afuma mu bipe byapaine muntu mwine saka akyangye kufwa, akwabo afuma ku bantu, ku bipwilo ne ku myanzo. Inge ano mali onse beabika pamo, beengijisha kutwajilamo mwingilo palutwe.

⁴ Bakamonyi ba kwa Yehoba batemwa bingi kwingijisha mali abo ne bintutu bikwabo kutundaikilamo mwingilo wa kusapwila. Yesu ne baana banji ba bwanga bajinga na kabokoshi ka mali mo bafumyanga mali a kwingijisha. (Yoa. 13:29) Baibolo witubuulapo banabakazhi baingijishe bintu byabo kukwashishamo Yesu ne baana banji ba bwanga. (Mako 15:40, 41; Luka 8:3) Mutumwa Paulo wasanchile bingi pa bupe bwamupanga bantu bakebelenga kutundaika mambo awama ne kwipana kukwasha mwingilo wanji. (Fili. 4:14-16; 1 Tesa. 2:9) Bakamonyi ba kwa Yehoba batwajijila kulondela bano bantu ba kala baingijile na kizaku kabiji bajinga bampanyi. Kuba bino kwalengela bantu ba michima ya kishinka baji konse konse kutambula “mema a bumi a bupetu.”—Lum. 22:17.

KUKWASHA MU BINTU BIKEBEWA PA KIPWILO KYENU

⁵ Mali o bengijisha pa kipwilo afuma mu mali apana balongo ne banyenga. Kechi kwikala kulipilisha nangwa kutongwela muntu mali o afwainwa kupana nangwa kupitamo na kulomba mali ku bantu ne. Pa mapunzha ponse pa kupwila babikapo tubokoshi twa kubikamo mali kuba’mba muntu yense akonshe kupanako “monka mo afuukwila mu muchima wanji.”—2 Ko. 9:7.

⁶ Ano mali beengijisha kikatakata ku bikebewa ku Nzubo ya Bufumu ne kwiilaminamo bulongo. Jibumba ja bakulumpe jakonsha kufuukulapo kutuma mali amo ku ofweshi wa musampi wa Bakamonyi ba kwa Yehoba uji mu kyalo mo baji, kutwajilamo palutwe mwingilo wa ntanda yonse. Umvwe kyaikala bino, kipwilo kilayañana lulayañano lwa kutuma oo mali. Mu jino jishinda, bipwilo byavula bipana jonse mali a mwingilo wa ntanda yonse. Umvwe bonse batako muchima ku bibena kukebewa pa kipwilo, kechi mwafwainwa kubijikanga kimye kyonse pa mambo a kukeba mali ne.

BYA KWINGIJISHA MALI

⁷ Inge kupwila konse kwapwa, balongo babiji bafumya mali onse aji mu tubokoshi twa mali ne kwianemba. (2 Mfu. 12:9, 10; 2 Ko. 8:20) Jibumba ja bakulumpe jimona mwa kulamina bulongo ano mali kufikatu ne kimye kyo bakeatuma ku ofweshi wa musampi nangwa kyo bakeengijisha ku bintu bibena kukebewa pa kipwilo. Mulongo utala pa mali a kipwilo unengezha sawakya wa pa ñondo pa ñondo ne kubijika ku kipwilo. Kabiji pa kupitapo bañondo basatu, ukwatankanya mingilo ya jibumba ja bakulumpe unengezha kubala mu mali a kipwilo.

MALI ENGIJISHA MWANZO

⁸ Mali o bengijisha pa kubuñana kwa mwanzo ne mali akwabo engila pa kubuñana afuma mu mali apana basapwishi baji mu yewo mwanzo. Pa kubuñana napo pekala tubokoshi twa kubikamo mali a kupana ku mwanzo. Pa kuba’mba pekalenga mali a kwingijisha, bipwilo byakonsha kupanangako mali ne pa bimyetu bikwabo, kechi kupembelelatu kubuñana ne.

⁹ Myanzo yafwainwa kupananga mali a bintu bibena kukebewa pa kubuñana kwingijisha mali ashalapo pa oa o bapana ku mwingilo wa ntanda yonse. Inge mu kipao kya mwanzo kafwamo mali avula a kulipila ku byonse bibena kukebewa pa kubuñana nangwa ku bikakebewanga pa kubuñana kukalondelapo, nabiji a kulipilako ku mpunzha ya kubuñenapo, kalama wa mwanzo wakonsha kubuula bipwilo amba bafwainwa kupanako mali. Jibumba ja bakulumpe mu kipwilo kyonse besambapo pa kino ne kumona mali anga kipwilo kyabo o kyakonsha kupanako ku mali a mwanzo. Kepo bakalayañana lulayañano pa kupana ano mali.

¹⁰ Inge mali akatazha ko kuba’mba bakulumpe mu bipwilo biji mu mwanzo bafwainwa kusambakana pa juba ja kubuñana kwa mwanzo ne kwisambapo. Bintu byonse byo bafuukula kuba byafwainwa kunembwa kwikala lulayañano lo balayañana bakulumpe, kechi kwisamba pa byaingila mali a mu mwanzo ne. Luno lulayañano lwafwainwa kwikala lwa kunemba mali ajipo ne kwietabizha kimye kyonse kyo babena kwingijisha mali a mwanzo.

¹¹ Kuji lunengezho lwa kuba’mba pa kimye pa kimye bafwainwa kupituluka mu mali a mwanzo.

KUKWASHA BAYANJI

¹² Ene mambo Yesu ne baana banji ba bwanga o baikejile na kabokoshi ka mali ke kukwasha bayanji. (Mako 14:3-5; Yoa. 13:29) Uno mwingilo waingilanga bena Kilishitu watwajijila, mambo Yesu waambile’mba: “Balanda [bayanji] mwikala nabo kimye kyonse.” (Mako 14:7) Nga Bakamonyi ba kwa Yehoba bengila byepi uno mwingilo lelo jino?

¹³ Bimye bimo, bantu ba kishinka mu kipwilo bakonsha kukebewa bukwasho bwa ku mubiji na mambo a bukote, kukolwakolwa, nangwa na mambo a bya malwa bimo bibaponena byakonsha kwibalengela kukankalwa kwikwasha abo bene. Ba mu kisemi, balongo, ne bakwabo bayuka lolo lukatazho bakonsha kwibakwasha. Byo byaambile ne mutumwa Yoano amba: “Yense uji na bintu bya ku mubiji bya pano pa ntanda umona mulongo wanji wakajilwa ne kumubila lusa ne, pano butemwe bwa Lesa bwaikala byepi mwi aye? Anweba baana, kechi twafwainwa kwitemwatu mu byambo nangwa pa kanwatu ne, poso mu byubilo ne mu bukine.” (1 Yoa. 3:17, 18; 2 Tesa. 3:6-12) Bupopweshi bwa kine bwavwangamo kukwasha bantu ba kishinka bakonsha kukebewa bukwasho bwa ku mubiji.—Yako. 1:27; 2:14-17.

¹⁴ Mu nkalata yanji itanshi yo anembejile Timoti, mutumwa Paulo walumbulwile byo bakonsha kukwasha bantu bakajilwa. Mwakonsha kutanga ano mafunde pa 1 Timoti 5:3-21. Mwina Kilishitu yense uji na mwingilo mukatampe wa kulama ba mu nzubo yanji. Bakote nangwa aba bakolwakolwa bafwainwa kwibakwasha ku baana babo, ku bankana babo, nangwa ku balongo babo bakwabo. Kimye kimo bakonsha kwibakwasha ku kafulumende nangwa ku tubungwe tukwabo. Onkao mambo, balongo nangwa bakwabotu bakonsha kukwasha bayanji kunembesha ku kafulumende kuba’mba batambulenga bukwasho. Kwakonsha kwikalapo bimye bimo kipwilo kyonse po kyakonsha kukwashako balongo ne banyenga bamo bakajilwa baingila mu bukishinka myaka yavula. Umvwe bantu bauno mutundu kechi bajipo na ba mu kisemi nangwa na balongo ba kwibakwasha ne, kabiji inge kafulumende kechi ubena kupaana bukwasho ne, jibumba ja bakulumpe mu kipwilo jakonsha kufuukulapo kwibakwasha. Bena Kilishitu bayuka’mba kyawama bingi kupapo bantu bakajilwa bintu bya ku mubiji.

¹⁵ Balongo ne banyenga bavula bakonsha kuyanda na mambo a kwibamanyika, makondo, bitentanshi, miyulo, bipowe bya nzala, nangwatu malwa akwabo abena kubiwa mu ano moba akatazha. (Mat. 24:7-9) Bipwilo bya ku yoyo mpunzha kampe kechi biji na bintu bya kupapo bakwabo ne. Onkao mambo, Jibumba Jitangijila jibuula balongo ba ku mpunzha ingi kukwashañana. Abino byo byaubile bena Kilishitu ba mu Asha Maina bapaine kajo ku balongo ba mu Yudea byo kwajinga kipowe kya nzala. (1 Ko. 16:1-4; 2 Ko. 9:1-5) Inge saka tulondela byo baubile, tumwesha’mba twatemwa balongo betu ne kumwesha’mba twi baana ba bwanga ba kine ba kwa Yesu Kilishitu.—Yoa. 13:35.

KUSAMPANYA MABUKU

¹⁶ Ma Baibolo ne mabuku alumbulula Baibolo engila mwingilo wanema pa kusampanya mambo a Bufumu. Javula jibumba ja bakulumpe jitongola nkwasho wa kwingijila ku mabuku mu kipwilo. Balongo bo batongola kwingila ino mingilo batako bingi muchima ku mingilo yabo. Banemba mabuku onse ajipo pa kuba’mba bayuke mabuku abena kukebewa pa kipwilo.

¹⁷ Byo tuji bena Kilishitu bepana, twayuka’mba kimye, maana ne bulume, busendwe ne bumi ke bya bupe bitupa Lesa kabiji twafwainwa kwibingijishanga bulongo mu mwingilo wanji. (Luka 17:10; 1 Ko. 4:7) Inge saka twingijisha bulongo bintu bitupa Yehoba, tumwesha’mba twamutemwa. Tukebesha bingi kunemeka Yehoba na bintu byawamisha byo etupa, mambo twayuka’mba usekela bingi inge twapana na muchima yense. (Maana 3:9; Mako 14:3-9; Luka 21:1-4; Kolo. 3:23, 24) Yesu waambile’mba: “Mwatambwiletu kyatu, ne anweba panaitu kyatu.” (Mat. 10:8) Twikala bingi na lusekelo inge ke twingijile Yehoba ne kupana bintu byo tuji nabyo na muchima yense.—Byu. 20:35.