Nkalata Kufuma ku Jibumba Jitangijila
Ku bakwetu bena Kilishitu:
Byonkatu byo mwayuka, Baibolo waamba pa bantu bapichile mu bintu byapusana pusana. Banabalume ne banabakazhi bavula ba kishinka nabo bapichile mu makatazho nabiji o tubena kupitamo. Bajinga bantu “byonka byo tuji.” (Yakoba 5:17) Bamo baikalanga na makatazho ne bijikila. Bakwabo bebalefulanga ku ba mu kisemi ne ku bapopweshi bakwabo. Kabiji bakwabo nabo bezhachishanga pa bintu byatama byo baubanga.
Nanchi bano bantu balekele kwingijila Yehoba nyi? Ine. Bavula bajinga nobe nyimbi wa masalamo walombele’mba: “Naya mungi nobe mukooko walubilamo. Nkebai amiwa kalume wenu, mambo kechi navulama mikambizho yenu ne.” (Salamo 119:176) Nanchi kino kyakimumwekelapo kala nyi?
Yehoba kechi ulubako bapopweshi banji bafuma mu kipaka ne. Wingijisha bena Kilishitu bakwabo kwibakwasha. Akimonai Yehoba byo akwashishe kalume wanji aye Yoba wapichile mu makatazho avula bingi, nabiji kubula mali, kufwisha baana ne kukolwa. Kabiji Yoba wachinchikile byambo byatama byamwambijilenga boba bafwainwe kumukwasha. Nangwa byonkabyo, aye kechi wasatukijile Yehoba ne, nangwa kya kuba kimye kimo milanguluko yanji yayile mungi. (Yoba 1:22; 2:10) Yehoba wakwashishe byepi Yoba kuchinchika?
Yehoba waingijishe mwina Kilishitu aye Elihu kukwasha Yoba. Yoba byo aambilenga byajinga ku muchima wanji, Elihu wamutelekele kabiji wakebelepo jishinda ja kwambilamo. Wamwambijile’mba ka? Nanchi wapelemo mambo Yoba kya kuba wamulengela kwizhachisha ne kumvwa bumvu nyi? Nanchi Elihu wimwene’mba wanema kukila Yoba nyi? Kwalepeshatu! Elihu byo bamutangijile ku mupashi wa Lesa, waambile’mba: “Amiwa njitu nobe anweba kwi Lesa wa kine; mambo ne amiwa nabumbilwe na buchimba.” Waambijile Yoba amba: “Kange munchine ne, kabiji kechi nsakwimukookesha na byambo byami ne.” (Yoba 33:6, 7) Elihu kechi wanungijilepo Yoba bijikila ne, bino wamufunjileko bulongo ne kumutundaika.
Yukai’mba kino kyo kyo twanembela uno buloshuwa. Patanshi twaumvwine, kepo twatajile pa makatazho ne byambo byaambile bantu bavula bafumine mu jibumba ja Yehoba. (Byambo bya Maana 18:13) Twaingijishe Binembelo, ne kumona Yehoba byo akwashishe bakalume banji ba kala byo bapichilenga mu makatazho nabiji o tubena kupitamo. Twasendele mashimikila a mu Binembelo ne a lelo ne kwianemba mu uno buloshuwa. Twimutundaika kutanga uno buloshuwa. Yukai’mba twimutemwa bingi.
Jibumba Jitangijila ja Bakamonyi ba kwa Yehoba