Bijikila—“Twazhokolokwa na Makatazho Apusana Pusana”

BANTU bonse bekala na bijikila nangwatu bantu ba Lesa. Nyimbi wa masalamo wanembele’mba, “Bijikila byamvujiile.” (Salamo 94:19) Yesu naye waambile’mba mu moba a kupelako, “bijikila bya mu buno bwikalo” byakonsha kukatazha muntu kwingijila Yehoba. (Luka 21:34) Kiji byepi kwi anweba? Nanchi muji na lukatazho lwa kubula mali, makatazho a mu kisemi nangwa kukolwakolwa nyi? Yehoba wakonsha kwimukwasha byepi kuchinchika?

“Bulume Bwakila bwa Bantu”

Kechi twakonsha kuyuka mwa kubila na bijikila atweba bene ne. Mutumwa Paulo wanembele’mba: “Twazhokolokwa na makatazho apusana pusana. Twasusubala . . . ; betunyakwila panshi.” Pano bino, waambile’mba “kechi twashinkilwa ne,” “kechi twabula pa kulupukila ne,” kabiji “kechi twaonaika ne.” Ñanyi bintu bitukwasha kuchinchika? “Bulume bwakila bwa bantu” bufuma kwi Lesa wetu wa bulume bonse, Yehoba.—2 Kolinda 4:7-9.

Vulukai kimye kyo mwatambwijile “bulume bwakila bwa bantu.” Nanchi mubena kuvuluka jashi jimulengejile kusanchila Yehoba pa butemwe bwanji bubula kwaluka nyi? Nanchi lwitabilo lwenu mu milaye ya Yehoba lwakosejileko byo mwafunjishenga bakwenu pa mambo a Paladisa nyi? Kutanwa ku kupwila kwa bwina Kilishitu ne kubuulako bakwetu byo twaitabilamo, kwitulengela kuchinchika makatazho ne kwikala na mutende pa kuba’mba twingijile Yehoba na lusekelo.

“Mutompai Yehoba Mumone byo Awama”

Kwambatu kine, mwakipitapo kala mu makatazho apusana pusana. Yehoba witukambizha kukeba Bufumu patanshi ne kwingila mingilo yanji. (Mateo 6:33; Luka 13:24) Mwakonsha kuba byepi inge kwimukanya, kukolwakolwa nangwa makatazho a mu kisemi emulengela kubula kwingilako pakatampe? Nangwa inge nkito ya ku mubiji imupwishisha kimye ne bulume bo mwafwainwa kwingijisha kutanwa ku kipwilo? Kyakonsha kwimulefula inge kya kuba mingilo imuvujila kabiji kimye nakyo kyakepa ne bulume bwimupwa bwa kwiingila. Kampe mwakilangulukapo kala kuba’mba Yehoba kechi witukebela byavula ne.

Yehoba wituyuka bingi bulongo. Aye kechi witukebela kupana byavula byakila pa bulume bwetu ne. Aye wayuka’mba papita kimye pa kuba’mba twikale na bulume ne kukosa inge twajinga mu makatazho nangwa twakolelwenga.—Salamo 103:13, 14.

Monai Yehoba byo akwashishe ngauzhi Elaija. Elaija byo alefwilwe ne kumvwa moyo ne kunyemena mungye, nanchi Yehoba wamukanjikizhe kubwela ku mwingilo wanji nyi? Ine. Yehoba watumine malaika bimye bibiji kuya na kubuusha Elaija ne kumupa kajo. Nangwa byonkabyo, papichile moba 40 Elaija saka akiji na bijikila ne moyo. Ñanyi kintu kikwabo kyaubile Yehoba pa kumukwasha? Kitanshi, Yehoba wamwesheshe’mba usakumuzhikijila. Kya bubiji, Yehoba watekeneshe Elaija na “jiwi jicheche, jaambijilenga munshi.” Kyapeleleko, Yehoba wamubuujile’mba kuji bantu bavula bingi babena kwingijila Lesa mu bukishinka. Ponkapo Elaija watendekele kwingila jibiji mwingilo wa bungauzhi. (1 Bamfumu 19:1-19) Tubena kufunjilako ka ku kino? Elaija byo aikele na bijikila, Yehoba wamubijile lusa ne kumutekenya. Yehoba kechi waaluka ne. Ne atweba wituta muchima.

Mupai Yehoba kintu kyonka kyo mwafwainwa kumupa. Kange mwesakanyenga byo mwaubanga kala na byo mubena kuba luno ne. Twayai tufwanyikizhe kino: Muntu unyema walekele kala kunyema, kechi wakonsha kutendeka ponkapotu kunyema byonka byo anyemanga kala ne. Pakuba utendeka pachepache pa kuba’mba akose. Bena Kilishitu baji byonka biji bantu banyema. Banyema kuba’mba bakatambule kyo bakeba. (1 Kolinda 9:24-27) Nanchi kechi mwakonsha kwingilako mingilo imo ya Lesa lonka luno nenyi? Kampe mwakonsha kwibikila kikonkwanyi kya kutanwanga ku kupwila kwa kipwilo. Mulombai Yehoba kwimukwasha kutanwangako. Umvwe mwakosesha bulunda bwenu ne Lesa, ‘mukatompa Yehoba ne kumona byo awama.’ (Salamo 34:8) Yukai’mba kintu kyonse kyo muba kimwesha’mba mwatemwa Yehoba nangwa kikepepotu byepi, kyanema kwi aye.—Luka 21:1-4.

“Kintu Kyankwashishe Kubwela”

Yehoba wakwashishe byepi June kubwela kwi aye? Waamba’mba: “Nalombanga bingi kwi Yehoba kunkwasha. Muko wami wa mukazhi wambuujile’mba kuji kubuñana mu muzhi mo naikalanga. Nafuukwilepo kutanwako juba jimo. Natemenwe bingi kupwanañana jibiji na bantu ba Yehoba! Kubuñana ko kwankwashishe kubwela. Natemwa bingi kwingijila Yehoba jibiji. Luno naikala bingi bulongo. Nayuka kuba’mba nafwainwa kwikala na balongo ne banyenga ne kuswa byo bankwasha. Natemwa bingi byo nabwela saka kukiji kimye.”