Nemani ne Nsongwakazhi Mwina Isalela

Nsongwakazhi umo mwina Isalela wajinga mu kyalo kya Silya kwalepele bingi nakwabo. Bamukwachile buzha ku bashilikale ba bena Silya. Ne kumutwala ku Silya ko akekele wa mwingilo wa kwa muka Nemani. Nemani wajinga mukulumpe wa nzhita. Uno nsongwakazhi wapopwelanga Yehoba nangwa kya kuba bo aikalanga nabo kechi bamupopwelanga ne.

Nemani wajinga na mbumba. Wamanamine bingi na misongo. Nsongwakazhi wakebelenga bingi kumukwasha. Waambijile muka Nemani amba: ‘Nayuka wakonsha kubuka kikola kya bamwatawenu. Mu Isalela muji ngauzhi wa Yehoba wa jizhina ja Elisha. Wakonsha kubuka bamwatawenu.’

Muka Nemani wabuujile Nemani byaambile uno nsongwakazhi. Ne aye waswile, ne kuya wayile ku nzubo ya kwa Elisha mu Isalela. Nemani waketekejilenga’mba Elisha usakumunemeka bingi. Bino Elisha kechi waambile nanji Nemani ne. Watumineko kalume wanji kuya na kwimuna Nemani ne kumubuula amba: ‘Yanga ukowe mu mukola wa Yodano bimye bitanu na bibiji. Inge ube bino usakubukwa.’

Nemani wazhingijile ne kwamba’mba: ‘Naji kulangulukanga’mba uno ngauzhi usakumbuka inge ankwate maboko anji ne kulomba kwi Lesa wanji. Bino wañambila’mba ngye nakowa mu mukola uji mu Isalela. Mu Silya muji mikola yavula bingi. Mambo ka o nafwainwa kubujila kuya na kowa mu ino mikola?’ Nemani wazhingijile, wafumako ne kizhi ku nzubo ya kwa Elisha.

Bino ba mwingilo banji bamukwashishe Nemani kulangulukapo bulongo pa byo bamubujile kuba. Bamwambijile’mba: ‘Nanchi kechi mwafwainwa kuba kintu kiji kyonse pa kuba’mba mubukwe nenyi? Ubai bimubula uno ngauzhi, mambo kechi byakatazha ne. Uba byonka byo emubula.’ Nemani waumvwine byamubujile ba mwingilo banji. Wayile ku Mukola wa Yodano na kowa bimye bitanu na bibiji. Byo aowele ja butanu na bubiji, mbumba yonse yo ajinga nayo Nemani yapwile. Wasanchile bingi, kabiji wayile ne na kusanchila Elisha. Nemani waambile’mba: ‘Pano nayuka’mba Yehoba ye Lesa wa kine.’ Walanguluka’mba nsongwakazhi mwina Isalela waumvwine byepi Nemani byo abwelele saka abukwa mbumba?