Funjishainga Baana Benu
Lwiso Lwaletelejile Gehazi
NANCHI paji po bintu byo wakebesha bingi nyi?—a Inge byo byo kiji, kechi yobe yenka ne. Pa kuba’mba utane byo ubena kukeba, nanchi wafwainwa kubepa nyi?— Ine. Muntu uba byobyo ko kuba’mba uji na lwiso. Twaya tumone mwanamulume wa jizhina ja Gehazi lwiso byo lwamuletelejile. Wajinga kalume wa kwa Elisha, ngauzhi wa Lesa wa kine, Yehoba.
Elisha ne Gehazi bajingako myaka ya kala, Mwana Lesa, Yesu, saka akyangye ne kusemwa pano pa ntanda ne. Yehoba waingijishe Elisha kuba bintu byawama byavula—bya kukumya! Kyakumwenako, Baibolo waamba pa kinemanga umo wa nzhita ya bena Silya wajinga na mbumba. Kafwako wakonsheshe kumubuka ne, bino Elisha wamubukile.
Kimye Lesa kyo aingijishenga Elisha kukwasha bantu na kwibabuka, kechi waswilepo mali ne. Nanchi wayuka ene mambo nyi?— Mambo Elisha wayukile’mba abya byakukumya byo aubanga byafumanga kwi Yehoba—kechi aye mwine ne. Nemani byo bamubukile, wasekejile bingi kya kuba keakebe ne kupana bya bupe bya ngolode, siliva ne bivwalo kwi Elisha. Elisha kechi wasendelepotu nangwa kimo ne, bino aye Gehazi wakebeshe bingi bino bya bupe.
Nemani byo ayile, Gehazi wamupupijile kwakubula kubula Elisha ko aya. Byo amutaine Nemani, nanchi wayuka byo amwambijile nyi?— Wamwambijile’mba, ‘Ba Elisha bo bantuma, bafikilwa na benyi ponka pano. Kabiji babena kukeba ne bivwalo bibiji bya kwibapa bano benyi.’
Bwajinga bubela bufita! Gehazi wasombeletu kuba’mba kuji benyi babiji baiya. Waubile bino mambo wakebelenga bivwalo byo baletejile Elisha. Bino aye Nemani kechi wayukile bino ne. Onkao mambo aye waumvwine bingi bulongo pa kupana bya bupe kwi Gehazi. Nemani wapaine byavula kwi Gehazi kukila ne pa byo alombele. Wayuka byalondejilepo nyi?—
Gehazi byo afikile pa nzubo, Elisha wamwipwizhe’mba: ‘Waji kuya pi?’
‘Kumvwa aye’mba, ‘Ine mwane, kafwako ko najikuya.’ Nangwa byonkabyo, Yehoba wamubujile Elisha byonse byaubile Gehazi. Elisha wamwambijile’mba: ‘Kino kechi kimye kya kutambula mali ne bivwalo ne!’
Gehazi wasendele mali ne bivwalo byabula byanji ne. Onkao mambo, Lesa walengejile mbumba yajinga ne Nemani kutuntulukila Gehazi. Walanguluka’mba twafwainwa kufunjilako ka ku kino?— Kyo twafwainwa kufunjilako ke kya kuba’mba kechi twafwainwa kusomba ne kwamba bya bubela ne.
Mambo ka Gehazi kyo asombejile bya bubela?— Gehazi wajinga na lwiso. Wakebelenga kwikala na bintu byabujile byanji, kabiji waubile bino kupichila mu kubepa. Na mambo a bino wayanjile na mbumba mu bumi bwanji bonse.
Bino, Gehazi wayanjile ne kikwabo kyakila pa mbumba. Nanchi wikiyuka kino nyi?— Walekele kutalwa bulongo kwi Lesa, kabiji Lesa wamushikilwe. Kange tubenga bintu byakonsha kwitulengela kubula kutalwa bulongo kwi Lesa ne! Onkao mambo twikale na muchima wa kifyele, tupengapo ne bakwetu bintu byo tuji nabyo.
Tangai mu Baibolo Wenu
[Tubyambo twa mushi]
a Inge mubena kutanga na mwana, kakishilwa kabena kwimubula’mba mwafwainwa kutulumanako ne kwambila mwana amba akumbule.