Butemwe Bwa Lesa bwa Myaka Ne Myaka

1, 2. Mambo ka o mwatemenwa Yehoba Lesa?

NANCHI Lesa mwamutemwa nyi? Umvwe mwipana kala kwi Lesa, ko kuba’mba mwamutemwa. Nangwatu saka mukyangye kutemwa Yehoba, aye wimutemenwe. Baibolo waamba’mba: “Atweba tutemwañana, mambo aye ye wajinga mutanshi kwitutemwa.”—1 Yoano 4:19.

² Akilangulukai pa mashinda Yehoba mo etumweshesha butemwe bwanji. Witupa ntanda yawama yo twikalamo ne bintu bya ku mubiji byo tukeba. (Mateo 5:43-48; Lumwekesho 4:11) Lesa ukeba’mba twikale na bulunda bwakosa ne aye, kabiji witupa bintu bitukwasha kufunda pe aye. Inge ke tutange Baibolo, ko kuba’mba tubena kuteleka kwi Yehoba. Kabiji wituteleka inge tubena kulomba kwi aye. (Salamo 65:2) Witutangijila ne kwitukosesha na mupashi wanji wazhila. (Luka 11:13) Bino kyakila pa byonse, watumine Mwananji ye atemwa kuba’mba etukuule ku bundengamambo ne lufu.—Tangai Yoano 3:16; Loma 5:8.

3. Twakonsha kwikala byepi na bulunda bwakosa ne Yehoba?

³ Langulukai pa balunda nenu bemukwasha inge muji na makatazho ne kimye kyo mwabula makatazho. Pa kuba’mba twikale na bulunda bwakosa na bakwetu, twafwainwa kwibikako bingi. Byo byo twafwainwa kuba pa kuba’mba twikale na Bulunda bwakosa ne Yehoba. Bulunda bwetu ne aye bwafwainwa kwikala bwa myaka ne myaka. O ene mambo Baibolo o aambila’mba: ‘Ikalai mu butemwe bwa Lesa.’ (Yuda 21) Pano twakonsha kuba byepi bino? Baibolo waamba’mba: “Kutemwa Lesa kulumbulula’mba tulondelenga mikambizho yanji; kabiji mikambizho yanji kechi yakatazha ne.”—1 Yoano 5:3.

‘KUTEMWA LESA BYO KULUMBULULA’

4, 5. (a) Byambo bya mu Baibolo bya kuba’mba “kutemwa Lesa,” byatala mwepi? (b) Lumbululai byo mwatendekele kutemwa Yehoba.

⁴ Byambo bya mu Baibolo bya kuba’mba “kutemwa Lesa,” byatala mwepi? Abino byambo kechi bilumbulula butemwe bwa Lesa bo etutemwa ne, bino bilumbulula butemwe bo twamutemwa. Nanchi muvuluka kimye kyo mwatendekele kutemwa Yehoba nyi?

⁵ Nanchi muvuluka kimye kitanshi kyo mwafunjile’mba Yehoba ukeba’mba mukekale myaka ne myaka mu ntanda ipya nyi? Mwafunjile bintu byawama byauba Yehoba ne bupe bwanema bwa Mwananji ye atumine pano pa ntanda. (Mateo 20:28; Yoano 8:29; Loma 5:12,18) Mwaumvwine bingi bulongo byo mwayukile’mba Yehoba wimutemwa. Kino kimulengejile kutendeka kumutemwa.—Tangai 1 Yoano 4:9,10.

6. Ñanyi bintu byavwangwa mu kutemwa muntu? Kabiji kutemwa Lesa kwimulengela kuba ka?

⁶ Buno butemwe bo bwajinga ntendekelo ya kutemwa Lesa. Kutemwa muntu kulumbulula bintu byavula bingi kechi kwambatu pa kanwa amba na kutemwa ne. Butemwe bwitulengela kubila bakwetu bintu byawama. Ne atweba, kutemwa Yehoba kwitulengela kwikala bwikalo bumutokesha ku muchima. Kabiji byo mwatwajijile kutemwa Lesa, mwipaine kwi aye ne kubatizhiwa. Byo mwaubile bino, mwalayile Yehoba kuba’mba mukamwingijilanga myaka ne myaka. (Tangai Loma 14:7, 8.) Mwakonsha kutwajijila byepi kufikizha uno mulaye?

“TULONDELENGA MIKAMBIZHO YANJI”

7. Kutemwa Yehoba kuketulengela kuba ka? Ñanyi mikambizho imo ya Lesa?

⁷ Kutemwa Yehoba ko kwitulengela’mba “tulondelenga mikambizho yanji.” Pano tuba byepi bino? Tuba bino inge ke tumukookele. Tufunda mu Baibolo byo twafwainwa kukookela Yehoba. Kabiji Lesa witubuula mu Baibolo kuba’mba kechi twafwainwa kupendwapendwa, kwiba, kubepa, kuba bulalelale nangwa kupopwela bankishi ne, bino twafwainwa kupopwelangatu bunke bwanji.—1 Kolinda 5:11; 6:18; 10:14; Efisesa 4:28; Kolose 3:9.

8, 9. Twakonsha kuyuka byepi bintu bitookesha Yehoba ku muchima inge mizhilo ya mu Baibolo kechi yaambapo ne? Mwakonsha kuba byepi bino?

⁸ Nangwa byonkabyo, pa kuba’mba tutokeshe Yehoba ku muchima, twafwainwa kuba ne bintu bikwabo, kechi kukookelatu mizhilo yanji ne. Lesa kechi witupa mizhilo yonse ya kwitutangijila mu bintu byonse byo tuba pa juba pa juba ne. Onkao mambo, bimye bimo twakonsha kupita mu bintu byavula byo babula kwambapo mu mizhilo ya mu Baibolo. Twakonsha kufuukula byepi bintu bulongo? (Efisesa 5:17) Mu Baibolo muji mafunde etukwasha kumona bintu byonka Yehoba byo ebimona. Kutanga Baibolo kwitulengela kuyuka bintu Yehoba byo atemwa ne byo ashikwa. Kabiji tuyuka ne byo alanguluka pa bintu.—Tangai Salamo 97:10; Byambo bya Maana 6:16-19; monai Byambo byo Balumbulula 1.

⁹ Mwakonsha kusala byepi bya kutamba pa TV ne pa Intaneti? Yehoba kechi witupa mizhilo ya kulondela pa kuba bino ne. Bino mafunde aji mu Baibolo etukwasha kufuukula bulongo bya kuba. Ano moba, mu mafilimu mwayulatu bya bukapondo ne bulalelale. Yehoba witubuula mu Baibolo amba: “Washikwa muntu yense watemwa bukapondo” kabiji “ukazhachisha ba bulalelale.” (Salamo 11:5; Bahebelu 13:4) Ano mafunde a mu Baibolo etukwasha byepi kufuukula bintu bulongo? Twafwainwa kuchinuzhuka bintu Yehoba byo ashikwa nangwa byo amona’mba byatama.

10, 11. Mambo ka o tukookela Yehoba?

¹⁰ Ñanyi kintu kitulengela kukookela Yehoba? Kechi tuba bino na mambo a kuchina kwitukambula nangwa kuchina bya malwa byakonsha kwitumwekela na mambo a kubula kufuukula bintu bulongo ne. (Ngalatiya 6:7) Bino tukookela Yehoba mambo twamutemwa. Byonkatu mwana byo akeba kusangajika bashanji ku muchima, ne atweba tukeba kusangajika Shetu wa mwiulu. Kitusangajika bingi ku muchima inge twayuka’mba Yehoba witutemwa!—Salamo 5:12; Byambo bya Maana 12:2; monai Byambo byo Balumbulula 2.

¹¹ Onkao mambo, twafwainwa kukookelanga Yehoba inge tuji na makatazho nangwa ne. Kechi tusala mikambizho yo twafwainwa kukookela ne. (Mpitulukilo ya mu Mizhilo 12:32) Pakuba atweba tukookela Lesa na muchima yense byonka byaambile nyimbi wa masalamo amba: “Natemwa bingi mikambizho yenu, kine, neitemwa.” (Salamo 119:47; Loma 6:17) Ne atweba tukeba kuba byonka byaubile Nowa. Watemenwe Yehoba kabiji waubile byonse byo amukambizhe. Baibolo waamba’mba “waubiletu byonse.” (Ntendekelo 6:22) Nanchi ne anweba mukeba Yehoba kwimwambila bino nyi?

12. Twakonsha kusangajika byepi Yehoba?

¹² Yehoba umvwa byepi inge ke tumukookele? ‘Tusangajika muchima’ wanji. (Byambo bya Maana 11:20; 27:11) Fwanyikizhai byo tutokesha Mulenga wetu wa mwiulu ku muchima inge ke tumukookele. Pano bino, kechi witukanjikizha ne. Witupa luusa lwa kwifuukwila bintu atweba bene. Kino kibena kulumbulula’mba twafwainwa kwifuukwilapo kuba byawama nangwa byatama. Yehoba ukeba’mba tumukookelenga na mambo a kuba’mba twamutemwa kabiji kuba bino kwitulengela kwikala na lusekelo.—Mpitulukilo ya mu Mizhilo 30:15, 16, 19, 20; monai Byambo byo Balumbulula 3.

“MIKAMBIZHO YANJI KECHI YAKATAZHA NE”

13, 14. Twayuka byepi kuba’mba mikambizho ya Lesa kechi yakatazha kwiikookela ne? Kabiji twakonsha kufwanyikizha byepi kino?

¹³ Twakonsha kuba byepi inge ke tulanguluke’mba mikambizho ya Yehoba yakatazha nangwa’mba itulengela kubula kwikala na luusa lwa kuba bintu byo tukeba? Baibolo waamba’mba: “Mikambizho yanji kechi yakatazha ne.” (1 Yoano 5:3) Kyambo kya kingiliki kyafuma ku kyambo kya ‘kukatazha’ kilumbulula kintu “kyanematu zaki.” Mu binembelo bikwabo, kino kyambo bekingijisha kulumbulula mizhilo yakatazha nangwa bantu babuula bakwabo bya kuba ne kwiboba byatama. (Mateo 23:4; Byubilo 20:29, 30) Baibolo wa New English Translation waamba’mba: “Mikambizho yanji kechi itulefula ne.” Mikambizho ya Yehoba kechi “yanematu zaki” ne, ko kuba’mba kechi yakatazha kwiilondela ne. Kabiji Lesa kechi witukambizha kuba bintu byakatazha ne.

¹⁴ Twakonsha kufwanyikizha bino: Mulunda nenu wimwambila’mba mumukwasheko kutwala bipe mu nzubo mo abena kuvilukila. Walonga bipe byanji byonse mu bibokoshi. Bipe bimo byapeela kya kuba muntu umo wakonsha kwibisenda kwa kubula lukatazho, pano bino bikwabo byanema bingi kabiji bikebewa bantu babiji pa kwibisenda. Nanchi mulunda nenu ukemwambila kusenda bipe byanema byo ayuka’mba kechi mwakonsha kwibisenda nenyi? Ine. Mambo ka? Mambo kechi ukakeba’mba mwikozhe pa kusenda bino bipe bunke bwenu ne. Po pamotu, Yehoba naye kechi witupa mizhilo yo twakonsha kukankalwa kukookela ne. (Mpitulukilo ya mu Mizhilo 30:11-14) Yehoba wayuka byo tuji. Mambo “aye wayuka bulongo byo twalengwa, uvuluka’mba twi lukungu.”—Salamo 103:14.

15. Mambo ka o twakonsha kuketekela’mba mikambizho ya Yehoba itukwasha kumwenamo bintu byawama?

¹⁵ Mosesa wabuujile kisaka kya bena Isalela kuba’mba Yehoba wibapeele mikambizho kuba’mba ‘bakamwenemo byawama’ ne kwibalengela “kutwajijila kwikala bomi” inge beikookela. (Mpitulukilo ya mu Mizhilo 5:28-33; 6:24) Byo byo kiji ne lelo jino, inge ketukookele bitubuula Yehoba, tukekala na lusekelo mu bwikalo bwetu. (Tangai Isaya 48:17.) Shetu aye Yehoba wayuka bituwamina. (Loma 11:33) Baibolo witubuula’mba: “Lesa butemwe.” (1 Yoano 4:8) Kino kibena kulumbulula’mba byonse byamba Yehoba ne byo oba byaimena pa butemwe.

16. Twayuka byepi amba twakonsha kwikala na lukookelo nangwa kya kuba tubena kwikala mu ntanda yatama kabiji twibambulwakulumbuluka?

¹⁶ Kukookela Lesa kechi kwapeela ne. Tubena kwikala mu ntanda yatama ibena kulamwa na Diabola. Utundaika bantu kuba byatama. (1 Yoano 5:19) Kabiji twafwainwa kwibikako kuchinuzhuka milanguluko yatama mambo yakonsha kwitulengela kulala mizhilo ya Lesa. (Loma 7:21-25) Kutemwa Yehoba ko kwitulengela kuba bintu byawama. Witupa mupashi wanji wazhila kabiji umona ne byo twibikako kumukookela ne kuba bintu byawama. (1 Samwela 15:22, 23; Byubilo 5:32) Mupashi wazhila witukwasha kwikala na byubilo bitukwasha kukookela Lesa.—Ngalatiya 5:22, 23.

17, 18. (a) Ñanyi bintu byo tusakufunda mu uno buku? (b) Kabiji tukesamba pa ka mu kitango kyalondelapo?

¹⁷ Mu uno buku, tusakwisamba byo twafwainwa kwikala bwikalo butokesha Yehoba ku muchima. Tusakufunda byo twafwainwa kwingijisha mafunde anji aamba pa kwikala na byubilo byawama mu bwikalo bwetu. Vulukai’mba Yehoba kechi witukanjikizha kumukookela ne. Inge twifuukwilapo kumukookela, tukamwenamo bintu byawama kabiji tukekala na bumi bwa myaka ne myaka. Bino kyakila pa byonse, tumwesha’mba twatemwa Lesa inge ketumukookele.—Monai Byambo byo Balumbulula 4.

¹⁸ Yehoba witupa jiwi ja mu muchima kuba’mba jitukwashenga kuyuka bintu byawama ne byatama. Onkao mambo, inge twafunjisha jiwi jetu ja mu muchima, jiketukwasha “kulondela mikambizho yanji.” Pano nga jiwi jetu ja mu muchima jo ji ka, kabiji twakonsha kwijifunjisha byepi? Twayai twisambe pa ano mepuzho.