Nkalata Yafuma ku Jibumba Jitangijila

Kwi anweba bonse mwatemwa Yehoba Lesa ne Mambo anji Baibolo:

Yesu waambile’mba: “Mukayuka bukine, ne bukine bukemukasulula.” (Yoano 8:32) Mwatemenwe bingi kimye kitanshi kyo mwafunjile bukine bwa mu Baibolo. Kituletela bingi lusekelo nangwa kya kuba tubena kwikala mu ntanda mwavula bingi, bino tubena kufunda bukine.—2 Timoti 3:1.

Yehoba Lesa ubena kukeba’mba tuyuke bukine. Na mambo a kuba’mba twatemwa bantu, twafwainwa kwibafunjishanga bukine. Pano bino, kuji bintu byavula bingi bikebewa pa kwingijila Lesa. Twafwainwa kwibikako kwikala na byubilo byawama byo tuji bena Kilishitu mambo twatemwa bingi mafunde a Yehoba. Yesu walumbulwile jishinda janema jo twakonsha kumwesheshamo’mba twatemwa Lesa. Waambile’mba: “Umvwe mwalama mikambizho yami, mukekala mu butemwe bwami, byonkatu byo nalama mikambizho ya Batata ne kwikala monka mu butemwe bwabo.”—Yoano 15:10.

Yesu watemwa bingi Shanji kabiji uba bintu byonsetu Shanji byo amukambizha’mba obe. Inge twaikala na byubilo byajingapo ne Yesu, Yehoba uketutemwa bingi kabiji tukekala na lusekelo. Mambo Yesu waambile’mba: “Umvwe anweba mwibiyuka bino bintu, mwatokwa umvwe mwibyuba.”—Yoano 13:17.

Twashiinwa kuba’mba uno buku usakwimukwasha bingi kutemwa bukine bwa mu Baibolo ne kwikala mulunda na Lesa. Tubena kulomba kuba’mba musakukilamo kutemwa Lesa ne kwikala “mu butemwe bwa Lesa . . . buleta bumi bwa myaka ne myaka.”—Yuda 21.