Byo Tufunjilako Ku Nzubo Ya Lesa Yamwene Ezikyo Mu Kimwesho

Bupopweshi bwa Kine Bwatumbijikwa ne Kuzhikijilwa

Nzubo ya Lesa yamwene Ezikyo mu kimwesho yatumbijikwa mambo iji pa “mutumba walepesha” (1). Nanchi mutumbijika bupopweshi bwa kine kupichila mu kwibutangizhako mu bwikalo bwenu nyi?

Nsakwa (2), nzubo ya Lesa yajinga mu nsakwa yajinga pakachi ka nsakwa ikatampe (3), tufunjilako kuba’mba twafwainwa kuchinuzhuka bintu byatama byakonsha kulengela mpopwelo yetu kubula kwitabilwa kwi Yehoba. Inge kya kuba bintu “byabula kuzhila” byo tuba mu bwikalo kechi twibivwanga mu mpopwelo yetu ne, ko kuba’mba atweba bapopweshi ba Yehoba twafwainwa kuchinuzhuka bubipisho nangwa’mba byubilo byatama mu bwikalo bwetu.—Ezi 42:20.

Mapesho a Myaka ne Myaka

Mukola wafuma mu nzubo ya Lesa yazhila ulengela bantu kwikala na bumi ne kulengela mushiji kumenesha bijimwa (4). Tukesamba pa ano mapesho mu Kitango 19 mu uno buku.

Mizhilo ya Bonsetu

Bibelo byalepa bya pangye (5) ne bibelo bya mukachi (9) bitufunjisha kuba’mba Yehoba uji na mizhilo yafwainwa kulondelanga bonse bakeba kwikala mu bupopweshi bwa kine. Bibelo bya pangye ne bya mukachi byajingatu kimotu. Kino kyayilamo bingi mambo Yehoba wapa bantu banji mizhilo yanji imotu, nangwa bekale pa bifulo bya mutundu ka.

Kuja ku Tebulu wa Yehoba

Bibamba bya kujiilamo (8) mo mwajiilanga bantu milambo yo baletanga ku nzubo ya Lesa, kino kyamweshanga’mba bajinga balunda ne Yehoba. Kino kyapusanako na byuba bena Kilishitu mu nzubo ya Lesa ya ku mupashi lelo jino, mambo abo kitapisho kyapainwe “jimotu.” (Hebe. 10:12) Nangwa byonkabyo, tupana milambo ya kutota Lesa.—Hebe. 13:15.

Bimwesha’mba Milaye ya Lesa Kine Ikafika

Kampe twakonsha kumvwa mukose kutanga pa bipimo bya nzubo ya Lesa. Pano bino, tufunjilako kintu kyanema bingi. Tufunjilako kuba’mba kubwezha bupopweshi bwa kine kyo kyaswa muchima wa Yehoba kabiji kikafika byonkatu bibula kwaluka bipimo bya ku yoya nzubo ya Lesa. Nangwa kya kuba Ezikyo kechi wamwenepo bantu mu kino kimwesho ne, bino wanembele byambo bya Yehoba bya kujimunako bañanga, babitumbafumu ne bantu. Bantu ba Lesa bonse bafwainwa kukookelanga mizhilo yanji.