Bupopweshi bwa Bubela Bwamba bya Bubela pe Lesa

Inge Lesa butemwe, pano mambo ka bupopweshi bwitela’mba bwimenako Lesa o bubena kubila bintu byatama byavula? Mukumbu ke wa kuba’mba, mambo bupopweshi bwa bubela. Kabiji bintu byo bamba ne kuba bilengela bantu kuswa bubela bo bamba pe Lesa. Pano bamba byepi bya bubela pe Lesa? Lesa umvwa byepi ku muchima pa bintu bibena kuba bupopweshi? Kabiji ñanyi kintu kyo akooba bupopweshi bwa bubela?

1. Bupopweshi bwa bubela bwamba byepi bubela pe Lesa na byo bufunjisha?

Bupopweshi bwa bubela ‘bwapimpula bukine bwa Lesa na bubela.’ (Loma 1:25) Bupopweshi bwavula kechi bufunjisha bantu jizhina ja Lesa ne. Pano bino, Baibolo waamba’mba twafwainwa kwingijishanga jizhina ja Lesa. (Loma 10:13, 14) Bantangi bamo ba bupopweshi bafunjisha bantu amba inge kwamweka kintu kyatama, bamba’mba kyo kyaswa muchima wa Lesa. Abwe ke bubela bwafiitatu bwii. Lesa kechi ye ulengela byatama kumweka ne. (Tangai Yakoba 1:13.) Na mambo a kuba’mba bupopweshi bufunjisha bya bubela, bwalengela bantu kubula kutemwa Lesa.

2. Bupopweshi bwa bubela bwamba byepi bubela pe Lesa na mambo a byubilo byabo?

Bupopweshi bwa bubela kechi bwanemeka bantu byonka Yehoba byo ebanemeka ne. Baibolo waamba pa bupopweshi bwa bubela amba “bubi bwanji bwafika ne mwiulu.” (Lumwekesho 18:5) Pa myaka yavula, bupopweshi bwivwanga bingi mu bya bumulwila ntanda, kutundaika nkondo ne kulengela bantu bavula bingi kufwa. Bantangi ba bupopweshi bamo babena kwikala bwikalo bwa kwitobwela ne kukanjikizha bantu baya mu machechi abo kuba’mba bebapenga mali. Byubilo byabo bimwesha’mba kechi bamuyuka Lesa ne. Onkao mambo, kechi bemenako Lesa ne.​—Tangai 1 Yoano 4:8.

3. Lesa umvwa byepi ku muchima pa bintu byuba bupopweshi bwa bubela?

Inge anweba kimukola bingi ku muchima kumona bintu byatama bibena kuba bupopweshi bwa bubela, mwalanguluka’mba Yehoba umvwa byepi ku muchima pa kumona bino? Yehoba watemwa bantu, bino kimukola bingi ku muchima kumona bantangi ba bupopweshi byo babena kwamba bya bubela pe aye ne kuyanjisha bantu baya mu machechi abo. Witulaya kuba’mba ukafumyapo bupopweshi bonse bwa bubela kabiji ‘kechi bukamwekapo jibiji ne.’ (Lumwekesho 18:21) Katatakatu Lesa akonaune bupopweshi bonse bwa bubela.​—Lumwekesho 18:8.

FUNJILAIPO BIKWABO

4. Nanchi bupopweshi bonse butokesha Lesa ku muchima nyi?

Bantu bavula baitabila kuba’mba bupopweshi bujitu nobe mashinda apusana pusana bino onse atwala bantu kwi Lesa. Nanchi bino byambo bya kine nyi? Tangai Mateo 7:13, 14, ne kwisamba buno bwipuzho:

• Baibolo walumbulula byepi jishinda jitwala bantu ku bumi bwa myaka ne myaka?

Tambai VIDYO, ne kwisamba buno bwipuzho.

VIDYO: Nanchi Mpopwelo Yonse Yaitabilwa kwi Lesa Nyi?—(3:22)

• Nanchi Baibolo waamba’mba bupopweshi bonsetu butokesha Lesa ku muchima nyi?

5. Bupopweshi bwa bubela kechi bumwesha butemwe bwa Lesa ne

Bupopweshi bwibepekezha kuba bintu mu jizhina ja Lesa. Kintu kimo kyakilamo kutama kyo boba ke kwivwanga mu makondo. Pa kuba’mba mumvwishe kino, tambai VIDYO. Apa bino mwisambe ano mepuzho.

VIDYO: Machechi Atundaikile Bantu Kulwako Nkondo ya Bubiji ya Ntanda Yonse (2:22)

• Ñanyi kintu kyaubile machechi avula kimye kya Nkondo ya Bubiji ya Ntanda Yonse?

• Mwalangulukapo’mba ka pa kintu kyaubile ano machechi?

Tangai Yoano 13:34, 35 ne 17:16, ne kwisamba ano mepuzho:

• Yehoba umvwa byepi ku muchima bupopweshi byo butundaika bantu kuya ku nkondo?

• Bupopweshi bwa bubela bwauba bintu byatama byavula bingi. Mu ñanyi jishinda bupopweshi mo bwakankelwa kumwesha butemwe bwa Lesa?

6. Lesa ukeba kukwasha bantu kufuma mu bupopweshi bwa bubela

Tangai Lumwekesho 18:4,a ne kwisamba buno bwipuzho:

• Mumvwa byepi ku muchima kuyuka’mba Lesa wakebesha kukwasha bantu bo batwala mungi ku bupopweshi bwa bubela?

7. Twajijilai kufundanga pe Lesa wa kine

Nanchi bintu byatama byamba ne kuba bupopweshi bwa bubela bimulengela kuzhinauka Lesa nyi? Fwanyikizhai mwana walengulula mikambizho yamupa bashanji, wafuma ne pa nzubo ne kutendeka kuba bintu byatama. Shanji kechi waswisha byubilo byatama bya mwananji ne. Nanchi kyawama kupamo mambo shanji na mambo a kuba’mba mwananji wasatuka ubena kwikala bwikalo bwatama nyi?

• Nanchi kijitu bulongo kupamo mambo Yehoba ne kuleka kufunda pe aye na mambo a byubilo byatama bya bupopweshi bwa bubela nyi?

ÑANYI BISHINKA BYO MWAFUNDA?

Bupopweshi bwa bubela bwatamisha jizhina ja Lesa na mambo a kufunjisha bantu bya bubela ne bintu byatama byo buba. Lesa ukonauna bupopweshi bonse bwa bubela.

Mepuzho a kupitulukamo

• Mumvwa byepi ku muchima pa bintu bifunjisha bupopweshi bwa bubela ne byubilo byabo?

• Yehoba umvwa byepi ku muchima pa bintu byuba bupopweshi bwa bubela?

• Ñanyi kintu Lesa kyo akoba bupopweshi bwa bubela?

KEBAI BISHINKA BIKWABO

Monai ano mashinda abiji bupopweshi bwa bubela mo bubujila kutokesha Lesa ku muchima.

“Nanchi Bupopweshi Bonse Bujitu Pamo Nyi? Abya Bonsetu Bukwasha Bantu Kuyuka Lesa Nyi?” (Kibaaba kiji pa jw.org)

Mambo ka Yehoba o etukambizhizha’mba tukwashe bakwetu kumwingijila pamo ne atweba?

“Nanchi Kijitu Bulongo Kwikala mu Bupopweshi Muji Bantu Bakwatankana Nyi?” (Kibaaba kiji pa jw.org)

Pulishiti umo kyamukatezhe bingi ku muchima na byo bafunjishanga mu chechi mo ayanga. Pano bino, kino kechi kyamulengejile kuleka kufunda bukine bwaamba pe Lesa ne.

“Ene Mambo Pulishiti o Asankijilepo Bupopweshi Bwanji” (Labainga!, February 2015)

Kufumatu kala kufika ne luno, bupopweshi bufunjisha bantu bintu bya bubela pe Lesa ne kulengela bantu kuswa’mba Lesa kechi wituta muchima ne, kabiji wakanama bingi. Fundai bukine pa buno bubela busatu.

“Bubela Bulengela Bantu Kulanguluka’mba Lesa Kechi Witutemwa Ne” (Kyamba kya Usopa, November 1, 2013)