Twafwainwa Kupopwela Byepi Lesa mu Jishinda Jimutokesha ku Muchima?

Byonkatu byo twisambile mu mutwe wafumako, kechi bupopweshi bonse butokesha Lesa ku muchima ne. Nangwa byonkabyo, twakonsha kupopwela Mulenga wetu mu jishinda jimutokesha ku muchima. Nanchi ñanyi “kupopwela” nangwa’mba bupopweshi butokesha Lesa ku muchima? (Yakoba 1:27) Monai byaamba Baibolo.

1. Twafwainwa kuyuka byepi bya kupopwela Lesa mu jishinda jo aswisha?

Twafwainwa kufunda kino mu Baibolo. Yesu waambijile Lesa amba: “Byambo byenu bo bukine.” (Yoano 17:17) Bupopweshi bwavula bwalengulula bingi bukine buji mu Mambo a Lesa, Baibolo. Bupopweshi bwavula bufunjisha maana a bantu ne bisho. Bino Yehoba kimukola bingi ku muchima kumona bantu ‘balengulula bingi mikambizho ya Lesa.’ (Tangai Mako 7:9.) Pakuba tutokeshatu Lesa ku muchima inge bupopweshi bwetu bufunjisha biji mu Baibolo ne kulondela byo aamba.

2. Nanchi twafwainwa kupopwela byepi Yehoba?

Atweba twafwainwa kwingijilangatu Yehoba yenka kwapwa, mambo ye Mulenga wetu. (Lumwekesho 4:11) Akino kibena kulumbulula’mba twafwainwa kumutemwa ne kupopwelatu aye yenka kwa kubula kwingijisha bankishi ne bipashañano.​—Tangai Isaya 42:8.

Bupopweshi bwetu bwafwainwa kwikala ‘bwazhila kabiji bwaitabilwa’ kwi Yehoba. (Loma 12:1) Akino kibena kulumbulula’mba twafwainwa kukookelanga mikambizho yanji mu bwikalo bwetu bonse. Onkao mambo, bonse batemwa Yehoba bakookela mikambizho yanji yaamba pa masongola. Kabiji bachinuzhuka kwivwanga mu bintu byatama nabiji kupepa fwanka, kwingijisha michi kutama nangwa maalwa.a

3. Mambo ka o twafwainwa kupopwelanga Yehoba pamo na bakwetu bena Kilishitu?

Kupwila ko twikala nako pa mulungu pa mulungu kwitukwasha ‘kutota Yehoba . . . mu kipwilo.’ (Salamo 111:1, 2) Jishinda jimo jo tubilamo bino ke kwimba nyimbo ya kutota Lesa. (Tangai Salamo 104:33.) Onkao mambo, Yehoba witukambizha’mba tutanwenga ku kipwila mambo witutemwa kabiji wayuka’mba kutanwa ku kupwila kuketulengela kwikala na bumi bwa myaka ne myaka. Inge twatanwa ku kupwila, tutundaika bakwetu kabiji nabo betutundaika.

FUNJILAIPO BIKWABO

4. Kechi twafwainwa kwingijishanga bipashañano pa kupopwela Lesa ne

VIDYO: Nanchi Lesa Waswisha Kwingijisha Bipashañano pa Kumupopwela Nyi? (3:26)

• Ñanyi kintu kyamwekejile bantu ba Lesa bamo kala baingijishe bankishi pa kupopwela Lesa?

Bantu bamo bengijisha bipashañano pa kupopwela Lesa mambo balanguluka’mba kuba bino kwakonsha kwibakwasha kufwenya kwipi ne Lesa. Nanchi kine kuba bino kwakonsha kukwasha muntu kufwenya kwipi ne Lesa nyi, inyi kwakonsha kumupangila kwalepa ne Lesa? Tangai Kulupuka 20:4-6 ne Salamo 106:35, 36, ne kwisamba ano mepuzho:

• Ñanyi bintu nangwa bipashañano byo mwamona bantu na kwingijisha mu bupopweshi bwabo?

• Yehoba umvwa byepi ku muchima na bantu bamba’mba babena kumupopwela kupichila mu kwingijisha bipashañano?

• Nanchi Lesa waswisha kwingijisha bipashañano pa kumupopwela nyi? Mambo ka o mwakumbwila byobyo?

5. Kupopwelatu Yehoba kwitukasulula ku bintu bya bubela

VIDYO: Bukine Bwankasulula ku Bintu Byatama (5:16)

Tangai Salamo 91:14, ne kwisamba buno bwipuzho:

• Ñanyi bintu Yehoba byo alaya kwitubila inge twamutemwa ne kumwingijilatu aye yenka?

6. Tupopwela Lesa pa kupwila

Tutota Yehoba ne kwitundaika atweba bene na bene kupichila mu kwimba ne kukumbulapo pa kupwila. Tangai Salamo 22:22, ne kwisamba ano mepuzho:

• Nanchi mutemwa mikumbu ikumbula balongo ne banyenga pa kupwila nyi?

• Nanchi ne anweba mukeba kukakumbulapo pa kupwila nyi?

7. Yehoba utemwa bingi inge ketubuuleko bakwetu byo tubena kufunda pe aye

Kuji mashinda avula bingi o twafwainwa kubuujilamo bakwetu bukine bwa mu Baibolo. Tangai Salamo 9:1 ne 34:1, ne kwisamba buno bwipuzho:

• Ñanyi bintu byo mwafunda mu Baibolo byo mukebesha kubuulako bakwenu?

ÑANYI BISHINKA BYO MWAFUNDA?

Tutokesha Mulenga wetu ku muchima inge ketumupopweletu aye yenka kwapwa, ke tumutote pa kupwila ne kubuulako bakwetu bintu byo twafunda pe aye.

Mepuzho a kupitulukamo

• Twafwainwa kuba byepi pa kuba’mba tupopwelenga Lesa bulongo?

• Mambo ka o twafwainwa kupopwelangatu Yehoba yenka kwapwa?

• Mambo ka o twafwainwa kupopwelanga Lesa pamo na bakwetu bakebesha kumutokesha ku muchima?

KEBAI BISHINKA BIKWABO

Tangai bino bishinka muyuke ene mambo mwanamukazhi umo kyo atemenwa kuba’mba waleka kupopwela bankishi.

“Pano Luno Kechi Nemuzha wa Bankishi ne” (Kyamba kya Usopa, October 1, 2011)

Fundai muyuke kintu kyafwainwa kwimukwasha kuba’mba mukumbulengapo pa kupwila.

“Totainga Yehoba mu Kipwilo” (Kyamba kya Usopa, January 2019)

Umvwai bintu byamwenejilemo nsongwalume umo mu kupwila nangwa kya kuba kechi kyamupelejile kutanwa ku kupwila ne.

Yehoba Wantele Bingi Muchima (3:07)

Bantu bavula baitabila’mba musalabu ke kayukilo ka bena Kilishitu, nanchi twafwainwa kumwingijishanga mu mpopwelo yetu nyi?

“Mambo ka kyo Mubujila Kwingijisha Musalabu mu Mpopwelo Yenu?” (Kibaaba kiji pa jw.org)