LUFUNJISHO 15
Nanchi Yesu ye Ñanyi?
Yesu ke muntu umo ye bayuka bingi ku bantu bavula. Nangwa kya kuba bantu bavula bamuyuka Yesu, pano bino kechi bamuyuka bulongo ne. Kabiji bantu bavula bamba bintu byapusana pusana bingi pe Yesu. Nanchi Baibolo waambapo’mba ka pe Yesu?
1. Nanchi Yesu ye ñanyi?
Yesu ke malaika wa bulume wikala mwiulu. Yehoba Lesa ye walengela Yesu saka akyangye kulenga bintu byonse. O ene mambo Yesu o atelelwa’mba “mubeji wa bilengwa byonse.” (Kolose 1:15) Kabiji Baibolo watela Yesu amba ‘Mwana Lesa yenkawa umotu,’ mambo Yesu ye yenkatu walengelwe kwi Yehoba mwine kwapwa. (Yoano 3:16) Yesu waingijile pamo na Shanji aye Yehoba kulenga bintu bikwabo byonse. (Tangai Byambo bya Maana 8:30.) Kabiji Yesu watwajijila kwikala mulunda wa pa muchima ne Yehoba. Yesu ye wambilako Lesa nangwa’mba “Mambo” kabiji ye witubuula bikeba Lesa ne mikambizho yanji.—Yoano 1:14.
2. Mambo ka Yesu o aishijile pano pa ntanda?
Papita ne myaka nobe kukila pa 2,000, Yehoba waingijishe mupashi wanji wazhila kuvilula bumi bwa kwa Yesu kufuma mwiulu ne kwibubika munda mwa nsongwakazhi kisungu wa jizhina ja Maliya. Akino kyalengijile Yesu kusemwa ne kwikala muntu. (Tangai Luka 1:34, 35.) Yehoba watumine Yesu pano pa ntanda kwikala Mesiasa nangwa’mba Kilishitu kuba’mba apulushe bantu.a Onkao mambo, bintu byonsetu Yehoba byo aambijile jimo mu Baibolo pe Mesiasa, Yesu wibifikizhe. Kino kyakwashishe bantu kumuyuka Yesu kuba’mba ye wajinga “Kilishitu, Mwana Lesa mumi.”—Mateo 16:16.
3. Nanchi Yesu uji kwepi luno?
Yesu byo afwile, Lesa wamusangwile kwikala malaika kabiji wabwelele mwiulu. Byo abwelele mwiulu, “Lesa wamupele kifulo kikatampe.” (Filipai 2:9) Aluno, Yesu ke malaika uji bingi na bulume. Wakilatu Yesu bulume ke Yehoba kwapwa.
FUNJILAIPO BIKWABO
Kebelaipo bishinka bikwabo muyuke Yesu byo aji ne kuyuka ene mambo kufunda pe aye o kwanemena.
4. Yesu kechi Lesa wa Bulume Bonse ne
Baibolo waamba’mba nangwa kya kuba Yesu ke malaika uji bingi na bulume mwiulu, aye kimye kyonse ukookela Shanji, aye Yehoba Lesa. Mambo ka o twaambila bino? Tambai VIDYO pa kuba’mba mwimwene Baibolo byo aamba mwapusena Yesu ne Lesa wa bulume bonse.
Binembelo biji panshipo bisakwitukwasha kuyuka bulongo mwapusena Yehoba ne Yesu. Tangai bino binembelo byonse ne kwisamba mepuzho ajipo.
Tangai Luka 1:30-32.
Malaika walumbulwile byepi biji Yesu ne Yehoba Lesa “Mwine Wakila”?
Tangai Mateo 3:16, 17.
Yesu byo abatizhiwenga, jiwi jafumine mwiulu jaambile’mba ka?
Mwalanguluka’mba ñanyi waambilenga?
Tangai Yoano 14:28.
Ñanyi mukulumpe pa shanji ne mwana kabiji wepi uji na bulume bukatampe?
Yesu watongolanga Yehoba amba Shanji. Kino kitufunjishapo ka?
Tangai Yoano 12:49.
Nanchi Yesu waambile’mba aye ne Shanji muntutu umo nyi? Musakwambapo’mba ka?
5. Ñanyi kintu kimwesha’mba Yesu ye Mesiasa?
Mu Baibolo muji bungauzhi bwavula bingi bwaamba pe Mesiasa ko kuba’mba Lesa ye asala kupulusha bantu. Abuno bungauzhi bwakwashishe bantu kuyuka uno Mesiasa. Tambai VIDYO mwipi waamba pa bungauzhi bumo bwafikizhe Yesu byo aishile pano pa ntanda.
Tangai buno bungauzhi buji mu Baibolo ne kwisamba ano mepuzho:
Tangai Mika 5:2 pa kuba’mba muyuke kwasemekejilwe Mesiasa.b
Nanchi kusemwa kwa kwa Yesu kwafikizhe buno bungauzhi nyi?—Mateo 2:1.
Tangai Salamo 34:20 ne Zekaliya 12:10 pa kuba’mba muyuke byaambijile jimo Baibolo pa bikafwa Mesiasa.
Nanchi abwe bungauzhi bwafikile nyi?—Yoano 19:33-37.
Abya Yesu wafwainwe kufuukulapo byo bakooba na mubiji wanji inge wafwa nyi?
Abino byonse byamwekele bimufunjishapo ka pe Yesu?
6. Tumwenamo bintu byawama bingi inge ketufunde pe Yesu
Baibolo waamba’mba kyanema bingi kufunda pe Yesu ne bintu Lesa byo akeba’mba Yesu obe. Tangai Yoano 14:6 ne 17:3, ne kwisamba buno bwipuzho:
Mambo ka o kyanemena kufunda pe Yesu?
Yesu witubuula bya kwikala balunda ne Lesa. Yesu wafunjishenga bantu bukine pe Yehoba kabiji tukekala na bumi bwa myaka ne myaka na mambo a aye.
BANTU BAMO BAMBA’MBA: “Bakamonyi ba kwa Yehoba kechi baitabila mwi Yesu ne.”
Nga anweba mwakonsha kukumbula’mba ka?
ÑANYI BISHINKA BYO MWAFUNDA?
Yesu malaika wa bulume. Yesu ke Mwana Lesa kabiji ye Mesiasa.
Mepuzho a kupitulukamo
Mambo ka Yesu o atelelwa’mba “mubeji wa bilengwa byonse”?
Ñanyi kintu kyaubile Yesu saka akyangye kwiya pano pa ntanda?
Twayuka byepi amba Yesu ye Mesiasa?
KEBAI BISHINKA BIKWABO
Yukilaipo bishinka bikwabo bitukwasha kushiinwa’mba Yesu ye Mesiasa.
“Nanchi Bungauzhi Bwaamba pe Mesiasa Bumwesha’mba Yesu ye Mesiasa Nyi?” (Kibaaba kiji pa jw.org)
Kebai bishinka mu Baibolo muyuke mu jishinda Lesa mo aikela shanji Yesu.
“Mambo ka Yesu o Atelelwa’mba Mwana Lesa?” (Kibaaba kiji pa jw.org)
Kufunjisha’mba kuji balesa basatu kechi kwa mu Baibolo ne.
a Mu lufunjisho 26 ne 27 tukesamba pa ene mambo bantu o bakebela wa kwibapulusha ne Yesu byo aketupulusha.
b Monai Byambo byo Balumbulula 2 byaamba pa bungauzhi bo baambijile jimo kimye kikeya Yesu pano pa ntanda.