LUFUNJISHO 23

Kubatizhiwa Kwanema Bingi!

Buku ye Bapulinta

Yesu waambile’mba bena Kilishitu bafwainwa kubatizhiwa. (Tangai Mateo 28:19, 20.) Kubatizhiwa kulumbulula ka? Kabiji ñanyi kintu muntu kyo afwainwa kuba pa kuba’mba afikilemo kubatizhiwa?

1. Kubatizhiwa kulumbulula ka?

Kyambo kya kuba’mba “kubatizha” kyafuma ku kyambo kya Kingiliki kilumbulula “kwibizha” mu mema. Yoano byo abatizhenga Yesu, wamwibizhe mu mukola wa Yodano kepo Yesu “atuntukile mu mema.” (Mako 1:9, 10) Byonkatu Yesu byo bamwibizhe pa kumubatizha ne bena Kilishitu ba kine nabo bafwainwa kwibebizha mubiji yense mu mema.

2. Inge muntu wabatizhiwa umwesha ñanyi kintu?

Inge muntu wabatizhiwa, umwesha’mba wipana mwine kwi Yehoba Lesa. Pano muntu wipana byepi kwi Yehoba? Muntu saka akyangye kubatizhiwa, ulomba patanshi kwi Yehoba kumubuula’mba wasalapo kumwingijilanga myaka ne myaka. Muntu wabatizhiwa ulaya kuba’mba ukengijilangatu Yehoba yenka kwapwa ne kuba’mba kintu kyo akanemeka bingi mu bwikalo bwanji ke kuba kyaswa muchima wa Lesa. Aye mwine usalapo ‘kwikana mwine ne . . . kulondelanga’ byafunjishanga Yesu ne byo aubanga. (Mateo 16:24) Kwipana ne kubatizhiwa kulengela muntu kwikala mulunda ne Yehoba ne na balongo ne banyenga.

3. Ñanyi bintu byafwainwa kuba muntu saka akyangye kubatizhiwa?

Saka mukyangye kubatizhiwa, mwafwainwa kufunda pe Yehoba ne kwikala na lwitabilo lwakosa. (Tangai Bahebelu 11:6.) Inge mwamuyuka bulongo Yehoba ne kwikala na lwitabilo lwakosa, mukamutemwa bingi. Kabiji mukakebeshanga bingi kusapwila pe aye ne kulondela mikambizho yanji mu bwikalo bwenu bonse. (2 Timoti 4:2; 1 Yoano 5:3) Inge muntu ubena kwikela “monka mukebela Yehoba mwa kumutokeshesha ku muchima” kukamutundaika kwipana kwi Lesa ne kubatizhiwa.—Kolose 1:9, 10.a

FUNJILAIPO BIKWABO

Monai bintu byo twafwainwa kufunjilako ku lubatizhilo lwa kwa Yesu ne bintu byafwainwa kuba muntu pa kuba’mba abatizhiwe.

4. Twafwainwa kufunjilako ku lubatizhilo lwa kwa Yesu

Tangai Mateo 3:13-17 pa kuba’mba mufunjileko byavula pa lubatizhilo lwa kwa Yesu. Kepo mwisambe ano mepuzho:

Nanchi Yesu wabatizhiwe saka aji lukeke nyi?
Yesu bamubatizhe byepi? Nanchi Yesu bamusanshiletu mema pa mutwe nyi?

Yesu watendekele kwingila mwingilo wamupeele Lesa pano pa ntanda byo abatizhiwe. Tangai Luka 3:21-23 ne Yoano 6:38, ne kwisamba buno bwipuzho:

Yesu byo abatizhiwetu, ñanyi mwingilo ye atangizheko mu bwikalo bwanji?

5. Fuukulaipo kuba’mba mukabatizhiwe

Kimye kitanshi mwakonsha kuchina kulanguluka pa kwipana ne kubatizhiwa. Nangwa byonkabyo, mwafwainwa kwibikako kufikatu ne kimye kyo mukamona’mba mwafwainwa kwipana ne kubatizhiwa. Pa kuba’mba muyuke kyakwashishe bantu bamo kwipana ne kubatizhiwa, tambai VIDYO.

VIDYO: Bya Kwikala Mulunda ne Yehoba (1:11)

Tangai Yoano 17:3 ne Yakoba 1:5, ne kwisamba buno bwipuzho:

Ñanyi bintu byafwainwa kukwasha muntu kuba’mba afikilemo kubatizhiwa?

A. Mwanamukazhi ubena kulomba kwi Lesa amba wipana kwi aye.

B. Awe mwanamukazhi ye muntutu umo ubena kubatizhiwa kwikala Kamonyi wa kwa Yehoba byo babena kumwibizha mubiji yense mu mema.

Pa kwipana kwi Yehoba tumulaya kuba’mba twasalapo kumwingijilanga myaka ne myaka
Pa juba ja lubatizhilo tumwesha ku bantu batanwapo’mba twipana kwi Lesa

6. Inge twabatizhiwa twikala mu kisemi kya Yehoba

Inge twabatizhiwa, twikala mu kisemi kya ntanda yonse kyakwatankana. Nangwa kya kuba twafuma ku mapunzha apusana pusana ne nkomeno yapusana pusana, bino twaitabila bintu bimo kabiji tulondela mafunde antutu amo. Tangai Salamo 25:14 ne 1 Petelo 2:17, ne kwisamba buno bwipuzho:

Nanchi bulunda bwa muntu ne Yehoba ne na bakwabo bengijila Yehoba bwikala byepi inge wabatizhiwa?

Kipikichala: Nyenga wabatizhiwa watemwa bingi kabiji ubena kulanguluka pa bulunda bwanji ne Lesa ne bo aji na balongo ne banyenga mu kipwilo. 1. Ubena kubuula nyenga makatazho anji. 2. Ubena kukwashako nyenga mukote kwenda. 3. Wanengezha kujiila pamo kajo na balongo ne banyenga bakulumpe ne banyike. 4. Ubena kusapwila mwanamulume pamo na nyenga. 5. Ubena kukopa kipikichala na bakwabo banyenga babiji Bakamonyi ba kwa Yehoba bafuma ku kyalo kingi pa kushonkena kwa kijiiji.

BANTU BAMO BAMBA’MBA: “Amiwa kechi nafikilamo kubatizhiwa ne.”

Inge ne anweba byo byo mubena kulanguluka, nanchi mwashiinwa’mba kubatizhiwa kwanema nyi?

ÑANYI BISHINKA BYO MWAFUNDA?

Yesu waambile’mba bena Kilishitu bafwainwa kubatizhiwa. Onkao mambo, muntu saka akyangye kubatizhiwa, wafwainwa kwikala na lwitabilo lwakosa mwi Yehoba ne kukookelanga mikambizho yanji. Inge wauba bino, popo afwainwa kwipana kwi Yehoba.

Mepuzho a kupitulukamo

Kubatizhiwa kulumbulula ka kabiji mambo ka o kwanemena?
Kwipana ne kubatizhiwa kumwesha ñanyi kintu?
Ñanyi bintu byafwainwa kuba muntu saka akyangye kwipana ne kubatizhiwa?

Mwapwisha kufunda pa:

Ubai bino

Monai mutanchi uji papelela kipungu 4, “Nanchi Nafikilamo Kusapwila Pamo na Kipwilo Nyi?” ne “Nanchi Nafikilamo Kubatizhiwa Nyi?,” uno mutanchi wafwainwa kwimukwasha kukafikilamo kulutwe na lwendo.

Bikwabo:

Kikonkwanyi kyenu kikwabo

KEBAI BISHINKA BIKWABO

Yukai bilumbulula kubatizhiwa ne byo kubula kulumbulula.

“Nanchi Kubatizhiwa Kulumbulula ka?” (Kibaaba kiji pa jw.org)

Pitulukaimo mu bintu byafwainwa kukwasha muntu kuba’mba afikilemo kubatizhiwa.

“Kutemwa Yehoba ne Kumusanchila Kukemutundaika Kubatizhiwa” (Kyamba kya Usopa, March 2020)

Tangai bino bishinka muyuke kyatundaikile mwanamulume umo kusalapo kubatizhiwa.

“Bakebelenga’mba Nemwene Amiwa Mwine Bukine bwa mu Baibolo” (Kyamba kya Usopa, February 1, 2013)

a Inge muntu bamubatizhepo kala mu bupopweshi mo ayanga, wafwainwa kubatizhiwa jikwabo. Mambo ka a kumubatizhizha jibiji? Mambo bupopweshi mo ayanga kala kechi bafunjishanga bukine bwa mu Baibolo ne.—Monai Byubilo 19:1-5 ne Lufunjisho 13.